Mörg undanfarin ár (nema tvö covid árin) hefur Sjálfsbjörg í Bolungavík haft það sem sína aðalfjáröflun að baka og selja pönnukökur þá daga sem sólin sést aftur í Bolungavík.

Það eru félagsmenn og velunnarar félagsins sem baka pönnukökur og flestar nota til þess tvær pönnur í einu. Ein jók afköstin verulega en henni tókst að baka á fjórum pönnum samtímis. Enda eru það mörg þúsund pönnukökur sem eru bakaðar

Velunnarar Sjálfsbjargar gefa hráefni til bakstursins og umbúðir. Það eru fyrirtækin Jakob Valgeir , Mjólkurvinnslan Arna, Bónus og Kjörbúðin.

Í ár hófst baksturinn á mánudaginn og er næstu daga byrjað kl. 6 að morgni að setja á rjóma og sykra pönnukökurnar og var fengin til þess aðstaða í húsi Slysavarnafélagsins.

Fyrstu árin fór salan að mestu fram í Bolungavík en á seinni árum hefur verulegur hluti farið til Ísafjarðar.

Frá bakstri í morgun. Myndir: Sjálfsbjörg.

Í nóvember 2022 lagði Matvælastofnun 120 m.kr. stjórnsýslusekt á Arnarlax með þeim rökum að fyrirtækið hefði ekki tilkynnt um strok eldislaxa og hefði ekki heldur brugðist við með því að setja út net til veiða á sleppifiski næstu 3 sólarhringa eftir strok.

Arnarlax hefur þegar greitt sektina en með fyrirvara um lögmæti hennar og kærði ákvörðun Mast með bréfi þann 22.2. 2023 til Matvælaráðráðherra, sem stefnir að því að kveða upp úrskurð í næsta mánuði. Verður það endanleg niðurstaða á stjórnsýslustigi, en unnt er að bera hana undir dómstóla.

Arnarlax mótmælir því að hafa brotið lög með því að vanrækja að tilkynna um strok. Krefst fyrirtækið þess að sektin verði felld niður og til vara að hún verði lækkuð verulega.

Segir í kæru Arnarlax að gat hafi uppgötvast á kví 11 við Haganes í Arnarfirði 29.8. 2021 og hafi það verið tilkynnt daginn eftir og sett út net í samræmi við fyrirmæli laganna. Veiddust 4 fiskar þar af 2 sjóbirtingar. Því hafi fyrirtækið farið að fyrirmælum laganna.

Matvælastofnun heldur því hins vegar fram að strok hafi hafist úr kvínni í snemma júní 2021 eða nærri 3 mánuðum áður en gatið uppgötvaðist. Um það er deilt milli Matvælastofnunar og Arnarlax. Lokið var að slátra upp úr kvínni 11. október 2022. Segir Mast að ekki hafi verið gerð grein fyrir 81.564 fiskum þegar bornar er saman tölur um útsetningu seiða í kvína, afföllum og slátruðum fiskum. Þá segir í sektarákvörðun Mast að veruleg minnkun hafi orðið snemma í júní í fóðrun „í kví 11 í kjölfar þess að skipt er um nótarpoka þann 7. júní 2021. Eina trúverðuga skýringin sem völ er á sem skýrir þessa breytingu í fóðrun er að fiskum í kvínni hafi fækkað verulega.“

Matvælastofnun telur aðgæsluleysi Arnarlax hafi verið vítavert og afleiðingar þess mjög alvarlegar. Þá segir Mast að sumarið eftir 2022 hafi veiðst 24 laxar í Arnarfirði sem rekja mátti til kvíar 11 við Haganes. Með því að tilkynna ekki um strok í júní hafi allir möguleikar til að grípa til viðeigandi ráðstafana bæði sumarið 2021 og einnig sumarið 2022 þegar mátti vænta endurkomu strokfiska í Arnarfjörð verið því ónýttir.

Arnarlax segir í kæru sinni að ómögulegt sé að einhver tilkynningaskyldur atburður hafi átt sér stað í júní 2021 og að Matvælastofnun byggir ákvörðun sína um strok í júní á alfarið á getgátum. Engin gögn hafi verið lögð fram sem styðji að eldislax hafi sloppið út í júní eða júli 2021. Ekki sé deilt um að gat fannst í ágúst og er það harmað en bent á að það hafi verið tilkynnt eins og vera ber.

Aðilar deila svo um þetta atriði og eru margvísleg gögn lögð fram og rök lögð fram á báða bóga en Matvælastofnun segir í sektarákvörðun sinni að Arnarlax hafi greiðlega veitt Matvælastofnun allar þær upplýsingar sem um hefur verið beðið. Ekki sé um nein önnur brot á tilkynningarskyldu stroki um að ræða og þá sé ekki að sjá að fyrirtækið hafi haft neinn ávinning af því að brotið hafi verið framið.

Knattspyrnudeild Vestra hefur óskað eftir því við Ísafjarðarbæ að gerður verði samningur við deildina til 6 mánaða frá 1. apríl til 1. október um umsjón með knattspyrnusvæðinu á Torfnesi. Kostnaður er áætlaður vera 3,7 m.kr.

Verkefnin sem þarf að sinna á knattspyrnusvæðinu á Torfnesi eru eftirfarandi:

• Umsjón með 1. hæð í Vallarhúsi, annast regluleg þrif.
• Vökva og bursta gervigrasvelli
• Sjá til að svæðið í kringum knattspyrnuvelli og Vallarhús sé snyrtilegt
• Sinna minniháttar viðhaldi á svæðinu.

Í fjárhagsáætlun ársins er gert ráð fyrir að þessi umsjón verði sinnt af Ísafjarðarbæ og er miðað við þriggja mánaða ráðningu á sumarstarfsmanni. Kostnaður er 1,7 m.kr.

Fram kemur í minnisblaði sviðsstjóra skóla- og tómstundasviðs að ef beiðni knattspyrnudeildar Vestra verður samþykkt þýði það kostnaðarauka upp á 1,9 m.kr.

Málið var lagt fyrir bæjarráð á mánudaginn og varð ekki útrætt og var bæjarstjóra falið að leggja málið fyrir að nýju.

Verkefnasamningur við HSV

Knattspyrnudeild Vestra er með verkefnasamning við Héraðssamband Vestfirðinga, HSV, þar sem kveðið er á um að Vestri annist gæslu á leikjum bæði á velli og inn í Vallarhúsi, sjái um að opna og loka vallarhúsi fyrir og eftir leiki/æfingar sem fara fram utan venjulegs vinnutíma. Þá sjá þau um að ganga frá og þrífa svæðið eftir leiki og halda auglýsingarskiltum sínum í þannig ástandi að þau séu svæðinu til sóma. Þessi verkefni falla því ekki undir þau verkefni sem Ísafjarðarbær er að sinna.

Bjarkarhlíð er miðstöð fyrir þolendur ofbeldis. Markmið er að veita stuðning, ráðgjöf og fræðslu um eðli og afleiðingar ofbeldis.

Bjarkarhlíð býður áfallamiðaða ráðgjöf, stuðning og upplýsingar fyrir þolendur ofbeldis af öllum kynjum, 18 ára og eldri. 

Nú er vakin athygli á því að Bjarkarhlíð er að bjóða upp á þjónustu fyrir alla íbúa á Vestfjörðum.

Ráðgjafi Bjarkarhlíðar verður á Hólmavík 30. janúar Ísafirði 31. janúar og á Patreksfirði 1. febrúar.

Upplýsingar um lausa tíma er að finna á heimasíðu Bjarkarhlíðar, bjarkarhlid.is eða í NOONA appinu.

Árlega fitjar Fuglavernd upp á talningu garðfugla yfir eina helgi. Venjulega er um að ræða síðustu helgina í janúar. Að þessu sinni verður Garðfuglahelgin 26.-29. janúar.

Í tilkynningu frá Fuglavernd segir að gott sé að hefja undirbúning talningar nokkrum dögum áður með því að hefja daglegar fóðurgjafir til að lokka að fugla.

Framkvæmd athugunarinnar er einföld. Það eina sem þátttakandi þarf að gera er að fylgjast með garði í einn klukkutíma yfir tiltekna helgi. Skrá hjá sér hvaða fugla viðkomandi sér og mesta fjölda af hverri tegund á meðan athugunin stendur yfir, þ.e. þá fugla sem eru í garðinum en ekki þá sem fljúga yfir.

Fyrir börn og þá sem eru að stíga sín fyrstu skref í fuglaskoðun, Fuglavernd útbúið sérstakt hjálparblað sem hægt er að prenta út og nota við talninguna.

Dagný Finnbjörnsdóttir hefur verið ráðin í starf íþrótta- og æskulýðsfulltrúa hjá Ísafjarðarbæ.

Dagný útskrifaðist með stúdentspróf frá Menntaskólanum á Ísafirði 2008, öðlaðist meistararéttindi í snyrtifræðum frá Verkmenntaskólanum á Akureyri 2012 og lauk B.Ed. gráðu í kennarafræðum frá Háskólanum á Akureyri 2020. Þá stundaði hún nýlega nám við Háskólann á Bifröst og hlaut þaðan MCM gráðu í menningarstjórnun árið 2023.

Dagný hefur starfað sem framkvæmdastjóri HSV frá árinu 2021. Áður starfaði hún m.a. sem umsjónarkennari/leiðbeinandi í Grunnskóla Bolungarvíkur, sem umsjónarmaður yngri flokka körfuknattleiksdeildar Vestra og sem körfuknattleiksþjálfari.

Frá árinu 2015 hefur hún verið annar eigandi fataverslunarinnar Jón og Gunna ehf og þá rak hún einnig fyrirtæki á eigin vegum á árunum 2010 til 2016.

Fiskbúð Sjávarfangs býður í fyrsta sinn viðskiptavinum upp á þorramat og er mikið úrval.

Kári Þór Jóhannsson sagði í samtali við Bæjarins besta að mikið hefði verið óskað eftir því í fyrra að boðið yrði upp á þorramat þar sem viðskiptavinurinn gæti valið sjálfur en þá hefði ekki verið hægt að fá þorramatinn hjá framleiðendum.

Núna er hins vegar allt til reiðu og kjötborðið tilbúið hjá Sjávarfangi og segir Kári að það verði út þorrann eða meðan birgðir endast.