Þann 1. desember 2023 voru 49.870 Íslendingar með lögheimili erlendis.

Flestir voru skráðir í Danmörku eða alls 11.982 einstaklingar. Næst flestir eða 9.250 einstaklingar voru skráðir í Noregi og í þriðja sæti var Svíþjóð þar sem 9.046 íslenskir ríkisborgarar voru skráðir með lögheimili.

61,9% íslenskra ríkisborgara sem eru með skráð lögheimili erlendis eru á Norðurlöndunum.

Íslenskir ríkisborgarar voru með skráð lögheimili í alls 104 löndum af 193 aðildarríkjum Sameinuðu Þjóðanna þann 1. desember 2023.

Til gamans má geta að í 15 löndum er aðeins einn íslenskur ríkisborgari með skráð lögheimili samkvæmt gögnum Þjóðskrár. 

Á töflunni að neðan má sjá þau 10 lönd sem flestir Íslendingar búa í og þróun fjöldans frá 2004.

Alls voru 74.654 erlendir ríkisborgarar skráðir með búsetu hér á landi þann 1. janúar sl. Það eru nærri 25 þúsund fleiri en Íslendingarnir sem eru búsettir erlendis. Fyrir rúmum 4 árum, 1.desember 2019 voru erlendu ríkisborgararnir 49.347. Fjölgunin er 25.307 á þessum tíma.

Vesturbyggð og Rauði krossinn hafa gert samkomulag um afnot af félagsheimilinu Baldurshaga sem fjöldahjálparstöð á Bíldudal. Það var mat ofanflóðadeildar Veðurstofunnar að Baldurshagi myndi henta betur til fjöldahjálpastöðvar vegna varnargarða sem þegar hafi risið en íþróttahúsið Bylta kom einnig til greina.

Það getur komið til þess að opna þurfi fjöldahjálparstöð á hættutímum vegna náttúruhamfara eða annarra alvarlegra atvika og liggur þá fyrir hvar hún verður.

Bæjarráð Vesturbyggðar samþykkti samninginn á fundi sínum á mánudaginn. Í samningnum kemur fram að kostnaður vegna opnunar og reksturs fjöldahjálparstöðvar greiðist af Rauða krossinum og/eða
ríkissjóði.

Rauði krossinn leggur til allan búnað, veitir fræðslu til starfsfólks þegar þörf er á, heldur námskeið í starfrækslu fjöldahjálparstöðva fyrir sjálfboðaliða og aðra áhugasama. Námskeiðin eru þátttakendum að kostnaðarlausu.

Matvælastofnun hefur kært til ríkissaksóknara ákvörðun lögreglustjórans á Vestfjörðum um að hætta rannsókn á slysasleppingu úr kví Arctic Fish í Patreksfirði á síðasta ári.

Matvælastofnun kærði sleppinguna til lögreglustjórans á Vestfjörðum, sem rannsakaði málið, og tilkynnti í síðasta mánuði að hann hefði hætt rannsókn málsins og fellt það niður. Stofnunin hefur nú skotið málinu til ríkissaksóknara sem fer yfir ákvörðun lögreglustjórans. Samkvæmt lögum um meðferð sakamála ber ríkissaksóknara ber að taka afstöðu til kæru á ákvörðunum lögreglustjóra innan þriggja mánaða frá móttöku hennar. Getur hann staðfest ákvörðun lögreglustjóra eða fellt hana úr gildi.

27 kærur

Alls bárust 27 kærur til ríkissaksóknara að meðtalinni kæru Matvælastofnunar. Embætti ríkissaksóknara vildi ekki upplýsa um hverjir það eru, en bæði landssamband veiðifélaga og íslenski náttúruverndarsjóðurinn, icelandic wildlife fund höfðu tilkynnt að þau myndu leggja fram kæru.

Aðeins málsaðilar geta kært og sagði Hrönn Ólína Jörundsdóttir, forstjóri Matvælastofnunar á Bæjarins besta fyrr í janúar að hún liti ekki á landssamband veiðifélaga sem málsaðila. Frá embætti ríkissaksóknara fengust þau svör í gær að það yrði skoðað hverjir teljist málsaðilar og hafi kærurétt.

Í dag rennur út í samráðsgátt stjórnvalda umsagnarfrestur um áform til að útvíkka löggjöf um ofanflóðavarnir til atvinnuhúsnæðis. Verða þá reist varnarmannvirki eða farið í uppkaup. Einnig tiltekið að
eftirlit með hættu á ofanflóðum á skipulögðum skíðasvæðum sé á ábyrgð rekstraraðila þeirra.

Fyrir liggur skýrsla Veðurstofu Íslands frá síðasta ári þar sem skoðuð voru atvinnusvæði á tíu þéttbýlisstöðum á landinu, þar af voru sex á Vestfjörðum. Brunabótamat atvinnuhúsnæðisins á þeim stöðum er um 10 milljarðar króna, þar af mest á Seyðisfirði 4,5 miljarðar króna.

Lagðar eru til varnir þar sem þær eru mögulegar og kostnaðarmat er minna eða á pari við brunabótamat þess sem er varið. Miðað er við að varnir fyrir atvinnusvæði færi þau af hættusvæðum C og a.m.k. á hættusvæði B. Lagðar eru til varnir fyrir eignir á C-svæðum með brunabótamat samtals 4,5 milljarða með þeim vörnum yrðu einnig varðar eignir á B-svæðum með brunabótamat upp á 1,2 milljarða. Kostnaðarmat við þessar varnir er rúmir 4 milljarðar.
Brunabótamat eigna sem ekki er mögulegt að verja er hinsvegar rúmir 5,5 milljarðar. Stærstur hluti verðmæti eigna sem ekki er hægt að verja er á Seyðisfirði.

Verja húsnæði að verðmæti 3,6 milljarðar króna – kostnaður 1,3 milljarðar kr.

Á Vestfjörðum er brunabótamat atvinnuhúsnæðis sem þarf að huga að um 3,6 milljarðar króna á fimm þéttbýlisstöðum. Kostnaður við varnir er 1,3 milljarðar króna.

Hæsta fjárhæðin er í Súðavík en þar er brunabótamatið 1,4 milljarðar króna. Kostnaður við varnir er 260 m.kr. Einkum er það frystihúsið sem þarf að verja. Lagt er til að það verði varið með þvergarði ofan við allt húsið.

Hæsti kostnaður við varnir er hins vegar í Hnífsdal 430 m.kr. Brunabótamat atvinnuhúsnæðis á B og C svæði er 630 m.kr.

Á Ísafirði eru mannvirki fyrir 790 m.kr. á C svæði og kostnaður við varnir er 280 m.kr. Á Patreksfirði eru á hafnarsvæðinu mannvirki að brunabótamati 760 m.kr. á hættusvæði og varnir eru metnar á 300 m.kr.

Áformin um lagasetninguna voru kynnt á fundi skipulags- og mannvirkjanefndar í gær en ekkert bókað um afstöðu nefndarinnar.

Leynir ÍS 16 við bryggju í Reykjavík 6. janúar s.l. en hann er gerður út af Tjaldtanga ehf. og er með heimahöfn á Flateyri við Önundafjörð.

Leynir hét upphaflega Reykjaborg RE 25 og var smíðaður í Skipasmíðastöðinni á Ísafirði árið 1998.

Reykjaborgin var lengd um fjóra metra í Ósey í Hafnarfirði árið 2001 en báturinn var síðan seldur til Keflavíkur árið 2005.

Þar fékk hann nafnið Geir KE 6 og var í eigu Útgerðarfélgsins Óskar ehf. sem einnig gerði út Ósk KE 5. Árið 2008 fær báturinn nafnið Arnþór GK 20 eigandi hans var Nesfiskur hf. í Garði.

Águstson hf. í Stykkishólmi keypti bátinn árið 2017 og nefndi hann Leyni SH 120.

Það var svo um mitt síðasta ár að Leynir varð ÍS 16 en báturinn er 21,88 metrar að lengd og mælist 72 brl./107 BT að stærð. Hann er búinn 470 hestafla Cummins frá árinu 1998.

Af vefsíðunni skipamyndir.com

Óvenju margar ábendingar hafa að undanförnu borist Matvælastofnun um dauða auðnutittlinga, hvaðanæva af landinu frá fólki sem fóðrar smáfugla reglulega. Matvælastofnun mun á næstunni reyna að komast að því hvað veldur þessum dauða.

Auðnutittlingur er lítill finkufugl og er staðfugl á Íslandi. Auðnutittlingur er frææta og byggir tilveru sína á birkifræi og leitar sér ætis í trjám og öðrum gróðri. Kjörlendi auðnutittlinga er birkiskógar og kjarr, auk þess ræktað skóglendi og garðar. Þeir eru algengir á fóðurbrettum þar sem fræ eru gefin og eru sólblómafræ eitt besta fóðrið fyrir auðnutittlinga. Þeir eru þó ekki eins háðir fóðrun og margir aðrir smáfuglar og flytja sig oft á milli svæða eftir veðri og fæðisframboði.

Ábendingarnar sem hafa borist Matvælastofnun snúa oftast að einstaka eða fáum fuglum sem sýna veikindaeinkenni og drepast að því virðist á 2-3 dögum. Ekki hefur verið sýnt fram á fjöldadauða auðnutittlinga en sumir sem fóðra smáfugla upplýsa að auðnutittlingar séu hættir að koma á fóðurstöðvar. Skýring á því getur auðvitað einnig verið að fuglarnir hafi flutt sig á milli svæða, en tilkynningar um veika og dauða fugla eru þó óvanalega margar. Matvælastofnun mun á næstunni fá hræ af fuglum af mismunandi landsvæðum og senda í sýnatökur og krufningu að Tilraunastöð Háskólans í meinafræði að Keldum til að komast nær mögulegum ástæðum þessara veikinda og dauða. Jafnframt verður reynt að komast að hvort sömu ástæður liggja að baki í öllum tilvikum. Samkvæmt upplýsingum dýrafræðinga við Háskóla Íslands hafa álíka tilvik komið upp hér á landi áður á síðustu árum, en þó ekki í þessu umfangi. Ekki hefur áður verið kannað sérstaklega hvað veldur þessum afföllum.

Margir fóðra smáfugla á veturna og talið er mögulegt að fugladauðinn kunni að tengjast sýkingum sem geta komið upp við fóðurstöðvar. Matvælastofnun hvetur því fólk sem fóðrar smáfugla, að gæta fyllsta hreinlætis og dreifa fóðri sem mest á fleiri staði. Það minnkar einnig streitu hjá fuglunum að hafa fóðurstöðvar dreifðar.