Teitur Björn Einarsson alþm. (D) segir það hárrétta ákvörðun hjá forsætisráðherra að leggja til þingrof og þar með að boðað verði til kosninga.

„Ég hef frá því ég tók sæti á Alþingi fyrir einu og hálfu ári haft áhyggjur af afstöðu VG til atvinnu fólks og grundvallarréttinda og nú er það ljóst að Sjálfstæðisflokkurinn mun ekki sætta sig við kyrrstöðu í mikilvægum efnahagsmálum, sem varða störf fólks og kjör þess til framtíðar litið, gríðarlega miklu. Til að mynda er ekki boðlegt að ríkisstjórn geti ekki náð saman um frekari orkuöflun í landinu eða náð saman um áframhaldandi uppbyggingu fiskeldis eða mikilvægi sjávarútvegsins. Lengra var því ekki komist og því er það eina rétta í stöðunni að leggja þessi mikilvægu mál í dóm kjósenda.“

Um hvað verður kosið?

„Sjálfstæðisflokkurinn leggur verk sín stoltur í dóm kjósenda enda hefur náðst verulegur árangur í efnahags- og atvinnumálum síðustu ár þrátt fyrir margvísleg ytri áföll og áskoranir. En nú er verkefnið annað og kosningarnar munu fyrst og fremst snúast um framtíðina og hvernig kjör fólks geta haldið áfram að batna, hvernig við nýtum sem best tækifærin til að skapa góð og verðmæt störf, til að mynda í fiskeldi og ferðaþjónustu. En til þess þarf græna orku og samkeppnishæft skattaumhverfi og regluverk.“

Hvað fyrir Vestfirðinga?

„Fyrir Vestfirðinga skiptir mestu máli að í landinu séu stjórnvöld sem skilji bæði mikilvægi þess að fjórðungurinn fái að vaxa og dafna áfram á sínum forsendum og leggi uppbyggingunni beint lið með því að setja alvöru kraft í samgönguframkvæmdir og orkuöflun í fjórðungnum og fyrir því mun ég áfram berjast.

Ég hef ekki legið á þeim skoðunum mínum að tafir og frestun á mikilvægum samgöngubótum á Vestfjörðum eru með öllu óboðlegar og hef gagnrýnt innviðaráðherra fyrir að ekki hafi verið staðið við margítrekuð loforð um fjármögnun og áætlanir um verklok eins og til dæmis í Gufudalssveit og á Dynjandisheiði.

Ég hef eins verið þeirrar skoðunar að Vestfirðingar verði að nýta alla þá kosti sem eru á borðinu til orkuöflunar og styrkingar á raforkukerfinu. Hvalárvirkjun og efling flutningskerfisins frá Hrútafirði að Mjólkárvirkjun eru afar mikilvægar framkvæmdir en ég tel að Vatnsdalsvirkjun verði líka að verða að veruleika til þess að Vestfirðingar geti nýtt öll tækifærin sem til eru til að efla byggðirnar og bæta lífskjör fólks. Tækifærin eru sannarlega til staðar og til framtíðar litið mun gott aðgengi að raforku skipta lykilmáli hvernig til tekst.“          

Fjöldi fólks sótti opnun PIFF kvikmyndahátíðarinnar í Ísafjarðarbíói í gær. Pigeon International Film Festival er nú haldin í fjórða sinn og stendur yfir í fjóra daga. Fara sýningar fram bæði á Ísafirði og í Súðavík. Óhætt er að segja að hátíðin sé búin að festa sig í sessi miðað við fjölda gesta en metmæting var á opnunina. Fyrsta sýning hátíðarinnar var heimildarmyndin Afsakið meðan ég æli eftir Ísfirðinginn Spessa sem sagði frá myndinni bæði fyrir og eftir sýninguna í spjalli við rithöfundinn Eirík Örn Norðdahl.

Hátt í 40 myndir verða sýndar í ár. Þar af tólf stuttmyndir, fimm heimildarmyndir, sex teiknimyndir, fimm nemendamyndir og tíu kvikmyndir í fullri lengd. Sýningar fara svo fram á Ísafirði og í Súðavík frá fimmtudegi til sunnudags – og ættu allir kvikmyndaunnendur að geta fundið eitthvað við sitt hæfi. Allt frá íslensku morðgátunni Eftirleikir og sannsögulega pólska njósnadramanu Doppelganger til indversku barnamyndarinnar Return of the Jungle.

Um 30 erlendir gestir hafa komið víðs vegar að til að fylgja myndu sínum eftir. Einn þeirra er John Farelly, leikstjóri fyrstu hrollvekjunnar sem fer fram á gaelísku. „Við erum sérstaklega ánægð með að vera hluti af PIFF vegna hollustu hátíðarinnar við að sýna kvikmyndir sem þrýsta á mörk og kanna nýjar frásagnir. Einstök umgjörð Ísafjarðar og orðspor hátíðarinnar fyrir að hlúa að innilegu og grípandi andrúmslofti gera hana að fullkomnum stað til að sýna An Taibhse,“ segir hann.

Dagskránni lýkur svo með verðlaunahátíð á sunnudagskvöld sem streymt verður í beinni útsendingu út um allan heim. Nánari upplýsingar er að finna á piff.is

Við setningu Björgunar í gær var fjórða björgunarskip sem Slysavarnafélagið Landsbjörg lætur smíða í Finnlandi afhent formlega.

Forstjóri Kewatec, finnsku skipasmíðastöðvarinnar, afhenti Borghildi Fjólu Kristjánsdóttur formanni félagsins björgunarskipið Björg formlega. Við sama tilefni tilkynnti Jón Gunnarson, formaður ráðgjafarhóps  um endurnýjun björgunarskipa, að fjármögnun lægi fyrir sem tryggði að raðsmíðaverkefni félagsins heldur áfram. Í dag var svo skrifað undir samning um smíði fimmta skipsins, sem verður staðsett á Höfn í Hornafirði.

Það voru útgerðarmaðurinn Guðmundur Kristjánsson sem lagði verkefninu til 50 milljónir og Hvalur hf með aðrar 50 milljónir, sem tryggðu um tíma, áframhald verkefnisins. Guðmundur og Kristján Loftsson voru báðir viðstaddir athöfnina ásamt Hermanni Björnssyni forstjóra Sjóva, sem hafði þegar styrkt félagið um 142 milljónir, og fulltrúum frá útgerðarfyrirtækinu Skinney Þinganes á Höfn, sem hefur stutt afar vel við starf Björgunarfélags Hornafjarðar í gegnum tíðina, og lagt fram rausnarlegt framlag til styrktar endurnýjunar björgunarskipsins Ingibjargar.

Auk þessara fyrirtækja hefur Ísfélagið í Vestmannaeyjum og Rammi hf á Siglufirði, stutt við endurnýjun skipa í þeirra heimabyggð.

Bjarni Benediktsson forsætisráðherra sagði í ávarpi sínu málið hafi verið rætt í ríkisstjórn í morgun og ríkur vilji væri til að þetta verkefni gengi snurðulaust áfram og fullvissaði viðstadda að ekki þyrfti að hafa áhyggjur af því að ríkið stæði ekki við sinn hlut. Áður hefur komið fram að sökum verðlagsþróunar hefur verð skipanna hækkað.

Bjarni sagði ýmsar áskoranir væru til staðar, en leyst yrði úr þeim og að verkefnið nyti almenns stuðnings á Alþingi og hlaut mikið lófatak ráðstefnugesta fyrir.

Enn er þó nokkuð í land að verkefnið sé full fjármagnað og þar með smíði sjötta skipsins, en samtal er í gangi við meðal annars útgerðina á vettvangi SFS og fleiri stærri fyrirtækja í landinu um myndarlega aðkomu þeirra að fjármögnun þeirra skipa sem út af standa.

Björgunarskipið Björg mun verða gestum Björgunar til sýnis fram á sunnudag, en halda þá til heimahafnar á Rifi, þar sem heimamenn hafa blásið til hátíðar af því tilefni. Áætlað er að ný Björg muni renna inn í höfn á Rifi klukkan 18:00 á sunnudagskvöld.

Myndir: Landsbjörg.

Spilkoppur, grár á litinn, en á hann hefur verið skrifað með tússpenna: „Versl. Sig Fanndal Siglufirði“ og var hann til sölu í Veiðarfæraverzlun Sigurðar Fanndal.

Skv. viðtali við Sigurð Fanndal (02.10.1942) var þessi spilkoppur framleiddur á Þingeyri af Vélsmiðju Guðmundar J. Sigurðssonar – en sú vélsmiðja hóf starfsemi undir nafni Guðmundar árið 1927.

Í dag (2023) er Vélsmiðjan varðveitt af Byggðasafni Vestfjarða á Ísafirði.

Spilkoppar voru notaðir til að draga inn net og annað skv. Sigurði.

Gripurinn kemur af lager Veiðarfæraverzlunar Sigurðar Fanndal sem var staðsett að Eyrargötu 2 á Siglufirði og stofnuð árið 1921, þá sem matvöruverslun. Stofnandi verslunarinnar var Sigurður Jóhann Sveinsson Fanndal (06.04.1876 – 14.10.1937). Georg Fanndal (13.07.1917 – 12.01.1970), sonur hans tók við búðinni við andlát föður síns, en um ári fyrir andlát hans hafði versluninni verið breytt úr matvöruverslun í veiðarfæraverslun. Sigurður Fanndal (02.10.1942), bróðursonur Georgs, tók við versluninni við andlát Georgs árið 1970, en þar hafði hann starfað sem sendill og aðstoðarmaður frá 12 ára aldri, og rak þar Veiðarfæraverzlun Sigurðar Fanndal allt til að henni var lokað árið 1997.

Af vefsíðunni sarpur.is

100% félagsmanna Félags kennara og stjórnenda í tónlistarskólum (FT) sem starfa í Tónlistarskóla Ísafjarðar samþykktu verkfallsaðgerðir segir í tilkynningu frá Kennarasambandi Íslands.

Kjörsókn var rúmlega 83%. Þar með hefur verið boðað til verkfalls í níu skólum aðildarfélaga KÍ 29. október. Aðgerðirnar taka til allra skólagerða og -stiga.

Verkfall félagsmanna FT sem starfar í Tónlistarskóla Ísafjarðar hefst 29. október og lýkur 20. desember, hafi samningar ekki náðst.

Verkföll eru áformuð 29. október í níu skólum; fjórum leikskólum, þremur grunnskólum, einum framhaldsskóla og einum tónlistarskóla, hafi samningar ekki náðst.

Ríkissáttasemjari hefur boðað til fundar á þriðjudag og mætir þá viðræðunefnd Kennarasambandsins sem er skipuð formönnum aðildarfélaganna sjö og formanni KÍ, til fundar með samninganefndum sveitarfélaga og ríkisins.

Opnað hefur verið fyrir umsóknir um styrki til að fjölga óstaðbundnum opinberum störfum á landsbyggðinni.

Ríkisstofnanir geta sótt um styrki til að ráða í óstaðbundin störf á þeirra vegum utan höfuðborgarsvæðisins. Svandís Svavarsdóttir innviðaráðherra kynnti áform um úthlutunina fyrr í haust en veittar verða allt að 150 milljónir kr. í þessum tilgangi af byggðaáætlun.

Ríkisstofnanir sem hafa aðsetur á höfuðborgarsvæðinu geta sótt um styrkina vegna starfa utan svæðisins eða verða færð frá höfuðborgarsvæðinu frá og með 1. nóvember 2024. Styrkjum er ætlað að koma til móts við ferðakostnað og leigu á aðstöðu í vinnustaðaklösum. Ekki verða veittir styrkir vegna tímabundinnar fjarvinnu eða blendingsstarfs, þ.e. starfs sem unnið er bæði utan og innan höfuðborgarsvæðisins.

Veita má styrk til stofnunar vegna starfs til allt að þriggja ára. Hámarksstuðningur við hvert starf getur numið allt að 2 milljónum króna á ári. Byggðastofnun mun annast umsjón með úthlutun styrkja og gerð samninga og verður árangur af verkefninu metinn fyrir lok árs 2025.