Eyþór Guðmundsson hefur verið ráðinn sem deildarstjóri á umhverfis- og eignasviði Ísafjarðarbæjar. Frá mars 2019 hefur hann starfað sem innkaupa- og tæknistjóri hjá sveitarfélaginu. Aðrir umsækjendur voru Smári Karlsson, skrifstofufulltrúi og Þórður Jóhann Guðbrandsson, húsasmiður.

Starfið var auglýst fyrir áramót og rann umsóknarfrestur út 9. janúar, en var svo framlendur til 14. febrúar. Bæjarins besta óskaði 21. febrúar eftir upplýsingum um umsækjendur og ráðningu en svör bárust ekki fyrr en í gær.

Arna Lára Jónsdóttir, bæjarstjóri segir að það hafi verið „að auglýsa nýtt starf deildastjóra á umhverfis- og eignasviði í ljósi aukinna umsvifa og fjölgunar verkefna á sviðinu. Það var jafnframt verið að auglýsa í starf skipulagsfulltrúa, en fyrrum skipulagsfulltrúi er kominn til annarra starfa.“

Í auglýsingu Ísafjarðarbæjar um starfið segir: „Boðið er upp á sveigjanlegan vinnutíma með ýtrustu vinnustyttingu (36 stunda vinnuviku). Önnur hlunnindi eru sérstakur stuðningur vegna fjarnáms, íþróttastyrkur og afsláttur af árskorti í sund.“

Ákvörðun um hið nýja starf var ekki lögð fyrir bæjarráð né kynnt þar.

Bæjarstjórn Bolungavíkur ályktaði á fundi sínum í gær um jarðgangaáætlun sem hefur verið lögð fram á Alþingi með samgönguáætlun. Segir að mikilvægt sé að færa Álftafjarðargöng ofar í röðina en þar er lagt til.

„Bæjarstjórn Bolungarvíkur fagnar þeim tillögum um jarðgöng á Vestfjörðum sem fram koma í jarðgangnaáætlun sem lögð er fram í Samgönguáætlun 2024-2038. Forsenda öflugs atvinnu og mannlífs á Vestfjörðum eru öruggar og greiðar samgöngur. Mikilvægt er að sveitarfélög á Vestfjörðum vinni sameiginlega að því að færa Álftafjarðargöng ásamt öðrum jarðgangnakostum á Vestfjörðum ofar í forgangi en þau eru í dag.“

Á mánudaginn tók Hákon Hermannsson, Ísafirði sæti á Alþingi í forföllum Bergþórs Ólasonar, alþm Miðflokksins. Hákon skipaði 6. sæti á lista flokksins í Norðvesturkjördæmi við síðustu Alþingiskosningar.

Hákon mun sitja þessa vikuna og beið ekki boðanna og kvaddi sér hljóðs í gær á þingfundi undir liðnum störf þingsins. Ræddi hann um orkuskort á Vestfjörðum sem kæmi fram í því að Orkubú Vestfjarða áætlaði að brenna 3,4 milljónir lítra af olíu til húshitunar. Ástæðan væri að virkjunarframkvæmdir kæmust ekki af stað vegna andstöðu, ætti það við um Hvalárvirkjun og Vatnsdalsvirkjun væri líka stopp þar sem orkumálaráðherra hefði ekki svarað erindi Orkubúsins um afléttingu friðunarskilmála og meira að segja Botnsvirkjun í Dýrafirði væri gert að fara í umhverfismat að ákvörðun Skipulagsstofnunar. Vestfirðingar mættu hvorki framleiða né flytja raforku.

Hákon sagði í samtali við Bæjarins besta að veran á Alþingi væri skemmtileg og gaman væri að kynnast staðnum. Hann neitaði því ekki að hafa verið smá smeykur við að fara í ræðupúltið í fyrsta skiptið, eiginlega hefði það verið ótrúlega stressandi en þrátt fyrir það gekki jómfrúarræðan vel.

Í fyrra fór fram sáning og skipti á fræjum á Bókasafninu á Ísafirði.

Og nú á að endurtaka leikinn og sá fræjum – kryddjurtum, matjurtum og blómum – á Bókasafninu Ísafirði föstudaginn 22. mars 16-18.

Fræ, ílát og mold verða á staðnum en velkomið að koma með eigin ílát ef það hentar betur.

Samhliða verður frædeilimarkaður: tilvalið að koma með hlutann úr fræpokanum sem þú þarft ekki og fá önnur fræ í staðinn.

Matvælastofnun varar við neyslu á nokkrum framleiðslulotum af Froosh jarðarberja, banana & guava hristing (smoothie) 250 ml og 150 ml sem Core heildsala flytur inn vegna þess að varan stóðst ekki gæðaeftirlit framleiðslunnar.

Myglueitrið patulin greindist of hátt í vörunni.

Fyrirtækið hefur í samráði við heilbrigðiseftirlit Garðabæjar, Hafnarfjarðar, Kópavogs, Mosfellsbæjar og Seltjarnarness innkallað vöruna.

Innköllunin á einungis við eftirfarandi framleiðslulotur:

• Vörumerki: Froosh
• Vöruheiti: Froosh Jarðarberja, Banana & Guava
• Framleiðandi: Fazer
• Innflytjandi: Core heildsala
• Framleiðsluland: Svíþjóð
• Lotunúmer/best fyrir dagsetning: 150 ml 3.8.2024, 1,9.2024, 7.9.2024. 250 ml 4.8.2024, 6.10.2024, 13. 10.2024
• Geymsluskilyrði: Kælivara eftir opnun
• Dreifing: Bónus, Krónan, Samkaup, Hagkaup, Melabúðin og Fjarðarkaup

Neytendum sem keypt hafa vöruna er bent á að neyta hennar ekki, farga eða skila henni til innflytjanda Core heildsölu, Víkurhvarf 1, Kópavogi.

Bergrós Kjartansdóttir prjónahönnuður, bókmenntafræðingur og gullsmiður og Ingibjörg G. Guðjónsdóttir þjóðfræðingur, leiðsögumaður og matgæðingur fara í sumar í átthaga sína í Jökulfjörðum.

Þær ætla að bjóða nokkrum frábærum prjónurum að koma og ljóma með sér.

Þar verður krafturinn úr íslenskri náttúru, ásamt anda formæðra og feðra virkjaður til að magna upp sköpunarkraftinn, sagnagleðina og innri ljómann sem í okkur býr.

Þegar sköpunarkrafturinn er virkjaður kviknar forvitni og almenn virkni, sem fær endorfínið til að flæða um líkamann og með taktfastri hreyfingu prjónsins viðhelst vellíðan og okkar innri ljómi fær byr undir báða vængi segir í kynningu á þessum einstæða viðburði.

Nánari upplýsingar má fá á facebook síðu

Þeim sérstöku 7 tonna ásþungatakmörkunum sem hafa verið í gildi á Vestfjarðarvegi í Dölum, frá Hringvegi (1) við Dalsmynni að gatnamótum Snæfellsnesvegar (54) við Haukadal, var aflétt kl. 10:00 í morgun. Áfram er þó Viðauki 1 úr gildi og ásþunginn því 10 tonn á þessum kafla, eins og á flestum vegum þarna í kring.

Katrín Sigríður J. Steingrímsdóttir, varaþingmaður Viðreisnar hefur lagt fram skriflega fyrirspurn til Sigurðar Inga Jóhannssonar innviðaráðherra um uppbyggingu jarðganga á Vestfjörðum.

Fyrirspurnin er í tveimur liðum:

1.      Kemur til greina að mati ráðherra að flýta áætluðum framkvæmdum við Súðavíkurgöng samkvæmt jarðgangaáætlun Vegagerðarinnar, í ljósi þeirra aðstæðna sem íbúar Súðavíkur og nágrennis búa við vegna snjóflóða- og aurskriðuhættu?
2.      Hefur ráðherra íhugað að flýta jarðgöngum um Mikladal og Hálfdán til að tryggja íbúum svæðisins jafnan aðgang að heilbrigðisþjónustu og flugsamgöngum allan ársins hring?

Von er á svari innan tíu virkra daga.