Í dag er Gunnlaugur Jónasson, fyrrverandi bóksali 95 ára. Er hann næstelstur karlmanna á Ísafirði, aðeins Jón Páll Halldórsson er eldri.

Faðir hans Jónas Tómasson tónskáld og bóksali hóf rekstur Bókhlöðunnar 20. ágúst 1920 og Gunnlaugur tók við rekstrinum í janúar 1953 og starfaði sleitulaust við hann í 40 ár, þegar sonur hans tók við rekstrinum. Í viðtali við Bæjarins besta í september 2009 fór Gunnlaugur yfir lífshlaup sitt.

Í apríl 2020 birtist á bb.is skemmtileg afmælisgrein eftir Halldór Jónsson um Gunnlaug Jónasson og Vilberg V. Vilbergsson níræða.

Þar segir Halldór um Gunnlaug:

„En bóksalinn var ekki bara bóksali. Þau eru óteljandi félögin sem hann hefur lagt lið. Hann var formaður undirbúningsnefndar að stofnun menntaskóla á Ísafirði. Hann var lengi í stjórn Tónlistarfélagsins. Hann var í undirbúningsnefnd að uppsetningu fyrstu skíðalyftunnar á Ísafirði. Gott ef hann var ekki slökkviliðsmaður líka. Svona væri hægt að telja upp lengi lengi. Svo var hann líka söngvari. Söng með kórum um áratuga skeið. Ekki síst í Kirkjukór Ísafjarðarkirkju. Umfram allt var hann ávallt tvennt. Skáti og Harðverji.“

Villi Valli og Gunnlaugur. Myndin tekin í fyrra.

Mynd: Bjarndís Friðriksdóttir.

Þrjú fyrirtæki á Patreksfirði,Vélaverkstæði Patreksfjarðar annars vegar og Smur og dekk ásamt strandveiðiútgerð Páls Heiðars hins vegar , hafa fært Björgunarbátasjóði V-Barðastrandasýslu sitthvora miljónina til kaupa á nýju björgunarskipi.

Áður hefur sjóðurinn fengið veglegar gjafir frá Odda hf, 30. m.kr. og frá slysavarnardeildinni Unni, 10 m.kr.

Gert er ráð fyrir að á vegum Landsbjargar og ríkisins komi nýtt björgunarskip til Patreksfjarðar á næsta ári. Kostnaður við skipið eru tæpar 400 m.kr. og þar af þarf um fjórðungur að koma úr heimabyggð skipsins.

Rannsóknaskipið Bjarni Sæmundsson hefur verið selt til Holberg Shipping í Noregi og kveður því Hafrannsóknastofnun og heimahöfn í Hafnarfirði eftir ríflega 54 ára dygga þjónustu.

Smíðasamningur var undirritaður 11. mars 1969, skipinu hleypt af stokkunum 27. apríl 1970 en það kom til Reykjavíkur þann 17. desember 1970.

Vel var vandað til smíði Bjarna Sæmundssonar og í skipinu var ýmis nýr búnaður sem ekki hafði áður verið settur í íslensk skip. Í því eru dísel rafstöðvar sem knúa rafmótor sem knýr skipið áfram. Vélarrúm skipsins er sérstaklega einangrað og vélar og rafalar á sérstöku gúmmíundirlagi til þess að minnka hávaða og titring. Þessi búnaður var á sínum tíma alger nýlunda í íslensku skipi og síðan hefur hann aðeins verið settur í eitt annað íslenskt skip, þ.e. hafrannsóknaskipið Árna Friðriksson sem kom nýtt til landsins árið 2000. Innleiðing þessarar tækni á sínum tíma leiddi til töluverðs sparnaðar á olíunotkun.

Bjarni Sæmundsson lagði upp í sinn fyrsta rannsóknaleiðangur þann 6. janúar 1971. Skipið hefur gengt fjölþættum verkefnum í sambandi við íslenskar hafrannsóknir en stærstur hefur þar verið hlutur rannsókna á uppsjávar- og botnfiskum, ásamt sjó- og svifrannsóknum.

Í Mottumars, árlegu átaki Krabbameinsfélagsins, fer fram vitundarvakning um krabbamein hjá körlum og aflar félagið um leið fjár fyrir mikilvæga starfsemi Krabbameinsfélagsins.

Í ár er áhersla Mottumars á tenginguna á milli lífsstíls og krabbameina. Krabbameinsfélagið vill í Mottumars vekja athygli á að bæði óheilbrigðar og heilbrigðar lífsvenjur verða til á löngum tíma. Skilaboðin eru einföld.  Lífsstíll er ekkert til að grínast með, hann er þvert á móti dauðans alvara.

Að minnsta kosti þriðja hvert krabbameinstilvik tengist lífsstíl. Þó að enginn sé öruggur er hægt að draga úr líkum á krabbameinum með heilsusamlegum lífsstíl. Þar getum við svo sannarlega gert betur og tilfinningin er að of margir karlmenn taki lífsstíl sinn ekki nógu alvarlega. Því viljum við breyta. 

Óheilsusamlegur lífsstíll er summan af mörgum litlum, slæmum ákvörðunum sem teknar eru hversdagslega yfir langan tíma. Hver og ein ákvörðun vegur ekki þungt en samanlagt geta þær skaðað heilsuna og meðal annars aukið líkurnar á krabbameinum. 

Mottumarssokkarnir í ár eru hannaðir af Berglindi Häsler, ekkju Svavars Péturs og eiganda Havarí, í samstarfi við Björn Þór Björnsson (Bobby Breiðholt). Björn hefur undanfarin ár tekið að sér að viðhalda safni myndrænna sköpunarverka Svavars Péturs sem lést úr krabbameini árið 2022. Svavar Pétur var best þekktur sem tónlistarmaðurinn Prins Póló.

Hönnunin byggir á kórónunni sem var hans helsta og íkonískasta tákn. 

Allur ágóði af sölu Mottumarssokkunum rennur til starfsemi Krabbameinsfélagsins sem miðar að því að færri fái krabbamein, fleiri læknist, lifi lengi og njóti lífsins – með og eftir krabbamein. Öll starfsemi félagsins byggir á styrkjum frá einstaklingum og fyrirtækjum og Mottumars er ein af lykilstoðunum.

Umhverfissjóður sjókvíaeldis auglýsir eftir umsóknum um styrki til rannsókna og verkefna sem styðja við markmið sjóðsins um lágmörkun umhverfisáhrifa af völdum sjókvíaeldis.

 Til úthlutunar á árinu 2025 eru kr. 172.700.000,-.

Stofnanir, fiskeldisfyrirtæki, einstaklingar og lögaðilar geta sótt um styrki til sjóðsins. 

Hlutverk sjóðsins er að greiða kostnað við rannsóknir vegna burðarþolsmats og vöktunar. Sjóðurinn getur jafnframt greitt kostnað við önnur verkefni sem stjórn sjóðsins ákveður eftir því sem fjármagn leyfir. Verkefnum er forgangsraðað í samræmi við framangreint hlutverk og áherslur stjórnar hverju sinni.

Stjórn sjóðsins leggur faglegt mat á allar umsóknir, forgangsraðar verkefnum og ákveður styrkfjárhæð. Við úthlutun ársins 2025 mun stjórn hafa lögbundið hlutverk sjóðsins til grundvallar úthlutunar, en auk þess líta sérstaklega til verkefna sem stuðla að aukinni þekkingu á umhverfisáhrifum sjókvíaeldis á vistkerfi fjarða og verkefna sem ganga út á eflingu mótvægisaðgerða vegna umhverfisáhrifa sjókvíaeldis.

Stjórn sjóðsins skipa: Kolbeinn Óttarsson Proppé, án tilnefningar, formaður stjórnar sjóðsins, Hildur Hauksdóttir, tilnefnd af Samtökum fyrirtækja í sjávarútvegi, Þorgils Torfi Jónsson, tilnefndur af Landssambandi veiðifélaga og Valgerður Sigurðardóttir, tilnefnd af umhverfis-, orku- og loftlagsráðuneytinu.

Vakin er athygli á því að loka- og framvinduskýrslur verkefna sem sjóðurinn styrkir skulu almennt vera aðgengilegar á heimasíðu sjóðsins, sbr. starfsreglur stjórnar. Aðrar upplýsingar í umsóknum er varða fjárhag eða viðskiptahagsmuni umsækjenda og annarra einstaklinga og lögaðila er tengjast verkefnum á vegum sjóðsins skulu meðhöndlaðar sem trúnaðarmál að því marki sem lög takmarka ekki.

Íslandsmeistaramót Lyftingasambands Íslands var haldið laugardaginn 8. febrúar síðastliðinn í Hafnarfirði. Alls tóku 44 keppendur þátt í mótinu, 13 karlar og 31 kona. Þrír keppendur voru frá Vestra, þær Guðrún Helga Sigurðardóttir, Hjördís Ásta Guðmundsdóttir og Aldís Höskuldsdóttir.

Aldís Huld keppti í -76 kg. flokki og lyfti 73 kg í snörun og 90 kg. Í jafnhendingu og lyfti því samanlagt 163 kg. og hlut annað sætið í sínum flokki.

Hjördís Ásta keppti í -87 kg. flokki og lenti í þriðja sæti í þeim flokki. Hún lyfti 50 kg í snörun og 70 kg í jafnhendingu samtals 120 kg.

Guðrún Helga keppti í +87 kg. flokki og varð í fjórða sæti í þeim flokki. Hún lyfti 65 kg. í snörun og 85 kg. í jafnhendingu, samtals 150 kg.

Næsta mót, Íslandsmeistaramót unglinga, fer fram 8.-9. mars nk. og verður Guðrún Helga meðal keppenda þar.

Finnbogi Sveinbjörnsson, formaður Verkalýðsfélags Vestfirðinga segist vilja byrja á því að óska kennurum til hamingju með nýjan kjarasamning. En hvort hann kalli á viðbrögð innan ASÍ á eftir að koma í ljós eftir að innihald samninganna hafa verið rýnd ofan í kjölinn.

„Við erum að tala um að mig minnir 7 mismunandi kjarasamninga við kennara og eina sem hefur verið sagt er að hækkunin nemi 24%, ekki hefur komið fram hvort það er flöt hækkun eða ekki. Okkar fólk sem er með lökustu kjörin fengu ca. 15 – 17% hækkun í 4 ára samningi og ef við berum þá tölu flata við hækkun kennara þá er munurinn í hrópandi ósamræmi við þá línu sem verkalýðshreifingin í samráði við stjórnvöld og sveitarfélög sömdu um árið 2024.“

gæti kallað á endurskoðun okkar kjarasamninga

Finnbogi bætir því við að „Ég hef í raun meiri áhyggjur af því hvernig ríki og sveitarfélög ætla að fjármagna þessar hækkanir og hvort þessar umframhækkanir muni hafa áhrif á þá kjarasamninga meðal félaga innan ASÍ sem enn hafa ekki verið kláraðir. Slíkt gæti kallað á endurskoðun forsenduákvæða kjarasamninga okkar.“

Eyjólfur Ármannsson, samgönguráðherra sagði það stefnu ríkisstjórnarinnar að ráðast í innviðaframkvæmdir sem leiða til aukinnar verðmætasköpunar í þjóðfélaginu strax. Nefndi hann hafnaframkvæmdir sem dæmi.

Þessi yfirlýsing vekur athygli þar sem á Ísafirði og í Bolungavík hafa verið miklar framkvæmdir eða eru áformaðar til þess að mæta auknum umsvifum í laxeldi og móttöku skemmtiferðaskipa.

Þetta kom fram á fundi ráðherra og Lilju Rafneyjar Magnúsdóttur,alþm. á Ísafirði á þriðjudaginn. Ráðherrann var ítrekað inntur eftir því hver yrðu næstu jarðgöng sem ráðist verður í en hann varðist allra svara af því og sagði að það yrði upplýst næsta haust þegar mælt verður fyrir samgönguáætlun ríkisstjórnarinnar á Alþingi.

Þó kom fram í máli hans að Fjarðaheiðagöng, milli Seyðisfjarðar og Egilsstaða, væru tilbúin og unnið væri að undirbúningi að Fljótagöngum og Súðavíkurgöngum. Þá sagðist hann vera tilbúinn til að skoða nánar hugmyndir um að göng undir Klettsháls yrði fjármögnuð að hluta með veggjöldum, en í skýrslu Rannsóknarstofnunar Háskólans á Akureyri um jarðgangakosti kemur fram það mat að veggjöld geti staðið undir verulegum hluta kostnaðar við göngin.

Lilja Rafney Magnúsdóttir, alþm sagði um samgöngumálin að á Vestfjörðum væri kallað á sérstaka samgönguáætlun fyrir Vestfirði og vísaði m.a. til málflutnings Innviðafélags Vestfjarða fyrir síðustu alþingiskosninga.