Nemendur Háskólaseturs Vestfjarða heimsóttu nýlega Jón Pál bæjarstjóra í Bolungarvík og var sú heimsókn hluti af námskeiðinu “Búferlaflutningar og íbúaþróun”.

Nemendurnir fengu að skoða sig um á bæjarskrifstofunni og kíktu yfir á Náttúrustofu Vestfjarða, Bláma og Rannsóknarsetur Háskóla Íslands í sömu byggingu.

Jón Páll kynnti átak sem kallast “Bolungarvík 1000+” sem snýr að því að fjölga íbúum Bolungarvíkur úr 950 í 1000. Átakið varð til vegna áforma um að sameina bæjarfélög sem væru með færri íbúa en 1000.

Fyrsti liðurinn í átakinu var að auka framboð á húsnæði. Það var gert með því að gera ráð fyrir nýjum byggingarreitum í aðalskipulagi. “Það er ekki hægt að auka íbúafjölda nema fjölga húsnæði, þó það hafi verið viss áhætta á sínum tíma þar sem það voru beinlínis ekki margir að óska eftir nýjum byggingalóðum” – segir Jón Páll.

Önnur megin stoð er að fjárfesta í innviðum og tók Jón dæmi um viðbyggingu við leikskóla og stækkun á vatnsbóli. Hann talaði einnig um stuðning við nýsköpun og stofnun nýrra fyrirtækja.

Þriðja stoðin er hins vegar einkageirinn. Efnahagur Bolungarvíkur byggðist upp á nálægðinni við fiskimiðin. Bærinn hefur reitt sig á útgerð og fiskvinnslu og fjárfestingar og skipulag bæjarins taka mið af því.

Jón fjallar um það hvernig íbúafjöldi bæjarins hafi farið lækkandi í mörg ár, en fyrir um 10 árum hafi eitthvað breyst og hann fór að hækka. Hann telur það vera vegna laxeldis, mjólkurframleiðslu og ferðaþjónustu. Hann telur þó laxeldið vera stærstu breytuna og segir að þessi geiri skapi um 30-35 störf.

Bæjarstjórn Vesturbyggðar hefur samþykkt reglur um kosningar til heimastjóra í sameinuðu sveitarfélagi Vesturbyggðar og Tálknafjarðar. Kosið verður á sama tíma og almennar sveitarstjórnarkosningar fara fram í maí. Kosningaaldur verður miðaður við þá sem orðnir eru 16 ára á kjördegi.

Heimastjórnir verða fjórar.
a) Heimastjórn Arnarfjarðar
b) Heimastjórn fyrrum Barðastrandarhrepps og Rauðasandshrepps
c) Heimastjórn Patreksfjarðar
d) Heimastjórn Tálknafjarðar

Gerð verður sérstök kjörskrá fyrir hverja heimastjórn. Hægt verður að kjósa utan kjörfundar allt að 20 áður dögum fyrir kjörfund.

Heimastjórnir skulu skipaðar þremur (3) fulltrúum. Tveir (2) fulltrúar og tveir (2) til vara skulu kosnir beinni
kosningu. Kjörgengir eru þeir í heimastjórn sem hafa kosningarrétt í sveitarfélaginu skv. 2. mgr. 133. gr.
sveitarstjórnarlaga. Einn fulltrúi og annar til vara eru kjörnir af sveitarstjórn og skulu þeir vera aðalfulltrúar í sveitarstjórn.

Framkvæmd heimastjórnarkosninga skal vera þannig að hver kjósandi kýs einn (1) aðalmann í
heimastjórn í beinni kosningu. Kjósandi skrifar á kjörseðil fullt nafn og heimilisfang þess sem hann kýs.
Þeir tveir (2) einstaklingar sem fá flest atkvæði eru kjörnir aðalmenn. Næstu tveir (2) þar á eftir eru kjörnir
varamenn í samræmi við fjölda atkvæða.

Heilbrigðisráðuneytið hefur sótt um byggingarleyfi fyrir viðbyggingu við hjúkrunarheimilið Eyri. Viðbyggingin er íbúða/meðferðarkjarni á einni hæð með 10 íbúðum. Byggingarfulltrúi hefur samþykkt byggingaráformin m með fyrirvara um lagfæringar hönnuðar á aðaluppdráttum. 

Núverandi hjúkrunarheimili var byggt 2014 og í því eru 30 íbúðaeiningar.

Flatarmál nýrrar íbúðaeiningar með tengigangi er 655,4 m², og hjóla-og rafskutlurými er 33,9 fermetrar og er viðbót við byggingu sem fyrir er.Heildarflatarmál nýbygginga er 689,3 m2 , og samtals gólfflötur bygginga á lóðinni 3007,8 m2 .

Í almennri lýsingu segir að rekstur nýs íbúðakjarna verður innifalinn í rekstri núverandi hjúkrunarheimilis.
Áætlaður fjöldi staðbundinna starfsmanna alls hjúkrunarheimilis er um 5-6, en aðrir starfsmenn eru samnýttir með aðliggjandi Fjórðungssjúkrahúsi Vestfjarða. Í íbúðakjarna er sameiginleg setustofa, borðstofa og eldhús. Í eldhúsi er gert ráð fyrir undirbúningi máltíða sem foreldaðar eru annars staðar. Einnig til notkunar af íbúum til einfaldrar matargerðar og baksturs, mögulega með aðstoð starfsmanna.

Fyrirtækið Rorum sem vinnur að rannsóknum og ráðgjöf í umhverfismálum opnar á morgun, miðvikudaginn 27. mars kl 11, vefsíðu þar sem unnt verður að skoða niðurstöðu umhverfisvöktunar á fiskeldissvæðum í sjó. Lífrænt álag frá fiskeldi er vaktað með athugun á fjölbreytni botndýrasamfélaga og breytingum á styrk lífrænna efna í sjó. Fylgst er sérstaklega með því hver uppsöfnun lífræns efnis undir sjókvíum er og áhrif þess á botndýrasamfélögin. Birt verða raungögn um styrk lífrænna efna og áhrif þeirra á botndýrasamfélög.

Í tilkynningu frá Rorum segir að þessar upplýsingar séu forsenda þess að starfrækja fiskeldi í sátt við umhverfið. „Vöktun á umhverfisþáttum fer fram á þremur mismunandi tímum í eldisferlinu: Áður en eldi hefst á eldissvæði til að meta hvert grunn ástandið er á eldissvæði (grunn sýnatökur). Þegar eldi hefur náð 75% af leyfilegum lífmassa eldissvæðis (hámarkssýnatökur). Þegar hvíldartíma eldissvæði líkur, venjulega 3 mánuðum eftir að slátrun líkur (hvíldarsýnatökur).“

Þátttakendur í þessu verkefni eru eldisfyrirtækin Ice Fish Farm á Austfjörðum Arnarlax, ÍS 47, Hábrún og Háafell á Vestfjörðum.

Samkvæmt minnisblaði sviðsstjóra umhverfis- og eignasviðs Ísafjarðarbæjar, sem lagt var fyrir bæjarráð í gær er kostnaður við gervigrasvellina á Torfnesi orðinn 143 m.kr. Heildarkostnaður samkvæmt tilboði er 256 m.kr. Fenginn styrkur frá KSÍ er 24 m.kr svo nettókostnaður Ísafjarðarbæjar verður 232 m.kr.

Mestur er kostnaðurinn orðinn við æfingavöllinn en samkvæmt minnisblaðinu er hann orðinn 67,7 m.kr. Í jarðvinnu við aðalvöllinn er komið 46,2 m.kr. og er verkstaðan 67% við þann þátt. Í jarðvinnu við æfingavöllinn hefur verið varið 10,7 m.kr. sem er 77% af því verki. Er það til viðbótar við 67,7 m.kr sem áður voru nefndar.

Tilboð vegna beggja vallanna hljóðar upp á 256 m.kr. Þar er gervigrasið langstærsti liðurinn 158,9 m.kr. auk 14,0 m.kr. við að fjarlægja eldra gervigras. Jarðvinna og lagnir á aðalvelli eru 68,5 m.kr.

Af kostnaði féllu til 128 m.kr. á síðasta ári og á þessu ári eru áætlaðar 104 m.kr. að frádregnum fengnum styrkjum KSÍ.

Húsnæðis og mannvirkjastofnun greiddi út 8,464 milljarða króna í húsnæðisbætur til 21.833 heimila vegna réttinda sem áunnust á síðasta ári.

Heildarfjöldi íbúa í heimilum sem þáðu húsnæðisbætur var 38.247. 

Húsnæðisbætur eru mánaðarlegar greiðslur sem eru ætlaðar til að aðstoða tekju- og eignaminni einstaklinga og fjölskyldur sem leigja íbúðarhúsnæði, hvort sem er í félagslega kerfinu, námsgörðum eða á hinum almenna leigumarkaði.

HMS fer með framkvæmd húsnæðisbóta skv. lögum og teymi húsnæðisbóta á Sauðárkróki sér um afgreiðslu, útreikning og greiðslur húsnæðisbóta, ásamt annarri umsýslu sem verkefninu fylgir. 

Árið 2023 fór fram lokauppgjör ársins 2022 á greiðslu húsnæðisbóta. Inneignir voru 141 milljónir króna, en skuldir 319 milljónir króna.  

Alls var heildarupphæð réttinda húsnæðisbóta árið 2023 8,464 milljarðar króna vegna réttinda á árinu. HMS greiddi hins vegar út 8,541 milljarða króna á árinu, þar sem stofnunin hafði til hliðsjónar lokauppgjör húsnæðisbóta fyrir árið á undan og skuldajöfnun bóta. 

Umhverf­is­stofnun hefur lagt fram til kynn­inga drög að stjórn­unar- og verndaráætlun fyrir Látra­bjarg.Landið var frið­lýst í mars árið 2021. 

Áætlunin er unnin af fulltrúum Umhverfisstofnunar, fulltrúum landeigenda og fulltrúa Vesturbyggðar. Eins er hún unnin í góðu samstarfi við Náttúrufræðistofnun Íslands.

Meginmarkmið með gerð stjórnunar- og verndaráætlunar er að leggja fram stefnu um verndun svæðisins og hvernig viðhalda skuli verndargildi þess þannig að sem mest sátt ríki um. Í áætluninni er lögð fram stefnumótum til framtíðar, ásamt aðgerðaáætlun til þriggja ára.

Áætlunin er sett fram í samræmi við lög um náttúruvernd.

Óskað er eftir athugasemdum frá almenningi við drög að áætluninni, skilafrestur athugasemda er til og með 7. maí 2024.