Daglega er unnið að samein­ing­unni bæði hjá starfs­fólki sveit­ar­fé­lag­anna og kjörnum full­trúum og er í mörg horn að líta. Mikið mun vinnast áður en til samein­ing­ar­innar kemur 19. maí nk. en ýmiss vinna mun bíða sameinaðs sveit­ar­fé­lags.

Nýjar samþykktir sameinaðs sveitarfélag voru samþykktar á síðasta fundi undirbúningsstjórnar þann 4. mars sl.  og hafa þær verið sendar til innviðaráðuneytisins til staðfestingar.

Með samþykktunum voru sendar reglur um íbúakosningu í heimastjórnir og samantekt yfir samþykktir, reglur og gjaldskrár sveitarfélaganna. Er nú beðið  eftir afgreiðslu ráðuneytisins en hún er forsenda þess að sveitarfélögin hafi heimild til að sameinast.

Eins og margir vita var óskað eftir tillögum og nafn á sameinað sveitarfélag frá íbúum. Fjölmargar tillögur bárust og var það niðurstaða undirbúningsstjórnar að senda tillögurnar til örnefnanefndar til umsagnar.

Samhliða sveitarstjórnarkosningum verður kosið í heimastjórnir. Tveir fulltrúar íbúa eru kosnir á hverjum stað en það verða fjórar heimastjórnir. Á Patreksfirði, Arnarfirði, Tálknafirði og Barðaströnd og gamla Rauðasandshreppi.

Allir íbúar hvers svæðis eru í framboði og kýs hver íbúi einn einstakling á því svæði sem hann býr. Þeir tveir sem fá flest atkvæði á hverju svæði munu sitja í heimastjórn fyrir sitt svæði næstu tvö árin eða þar til kosið verður næst til sveitarstjórnar.

Ferðaveður er fremur gott á Vestfjörðum miðað við vetur, hægviðri og flestir vegir opnir. Þæfingsfærð er þó í Reykhólasveit. Ófært er norður í Árneshrepp. Hálka eða hálkublettir eru víða.  Vestfjarðavegur frá Reykhólasveit og til Patreksfjarðar og þaðan til Bíldudals er auður samkvæmt yfirliti Vegagerðarinnar.

Vegagerðin varar við ástandi á slitlaginu á Vestfjarðavegi frá Bröttubrekku yfir í Gufudalssveit og á Reykhólasveitarvegi og segir það mjög slæmt. Hraði er af þeim sökum takmarkaður á nokkrum stöðum.

Íþróttahreyfingin á Ísafirði setti fram á samræðsfundi með Ísafjarðarbæ tillögu um breytta rekstrarleið íþróttamannvirkja á Torfnesi. Fram kemur í minnisblaði sviðsstjóra skóla- og tómstundasviðs fyrir bæjarráð að íþróttahreyfingin óski eftir því að lagt verði kostnaðarmat á að íþróttahreyfingin taki yfir rekstur íþróttamannvirkja á Torfnesi.

Gert er ráð fyrir að þau íþróttafélög sem eru notendur íþróttasvæðisins stofni rekstrarfélag sem Ísafjarðarbær myndi gera rekstrarsamning við um reksturinn. Forsvarmenn í íþróttahreyfingunni sjá fyrir sér að stofna vinnuhóp sem myndi hanna frekar útfærslu á tillögunni í samstarfi við starfsfólk skóla- og tómstundasviðs.

Í minnisblaðinu segir að til eru sambærilegar útfærslur hjá öðrum sveitarfélögum t.d. á Akureyri þar sem þau greiða rekstrarframlag til íþróttafélaga til þess að tryggja reksturinn.
Útfærslan yrði unnin í samstarfi við forstöðumann íþróttamannvirkja, íþróttahreyfinguna í Ísafjarðarbæ, sviðsstjóra skóla- og tómstundasviðs og íþrótta- og æskulýðsfulltrúa ásamt skóla-, íþrótta- og tómstundanefnd.

Bæjarráð óskaði eftir því að íþróttahreyfingin útfæri hugmyndina betur og leggi hana fram til umsagnar í skóla-, íþrótta- og tómstundanefnd.

Tilboð voru opnuð í síðustu viku í ofanflóðavarnir á Flateyri.

Í kjölfar snjóflóða sem urðu árið 2020 var ákveðið að styrkja núverandi varnir. Um er að ræða 27 keilur sem komið er fyrir á úthlaupssvæðum flóðanna úr Innra-Bæjargili og Skollahvilft, 16 stk Innra-Bæjargilsmegin og 11 stk Skollahvilftarmegin. Þá verður þvergarðurinn endurbyggður og bætt við tveim leiðigörðum, annarsvegar leiðigarði við Sólbakka og hinsvegar leiðigarði á Hafnarsvæði. Jafnframt verður úthlaupssvæðið (flóðrásin) neðan Skollahvilftar dýpkað á kafla neðan til við núverandi garð.

Garðana skal byggja úr jarðefnum sem eru fengin innan framkvæmdasvæðisins og úr námu, sem staðsett er ca. 1,5 km vestan við byggðina á Flateyri. Flóðmegin verða keilurnar og garðarnir byggðir upp þannig að ofan á jöfnunarlag verður byggt upp jarðvegsstyrkingarkerfi, sem samanstendur af bröttum hliðum og styrktri fyllingu. Hliðar keilanna verða einnig byggðar upp með þessum hætti. Hlémegin á görðum verða hefðbundnir jarðvegsfláar.

Tvö tilboð bárust. Borgarverk ehf. bauð í verkið liðlega tvo milljarða króna eða nákvæmlega 2.123.156.196 kr. Kostnaðaráætlun hljóðaði upp á tæpa 2,8 milljarða króna. Suðurverk hf. bauð 2.348.222.243 kr eða liðlega 200 m.kr. meira.

Framkvæmdasýslan – ríkiseignir fer síðan yfir tilboðin.

Fyrir liggur eftir umræður á bæjarráðsfundi í Ísafjarðarbæ að lækkun gjaldskrár í leikskólum í kjölfar kjarasamninga verður ekki fyrr en 1. ágúst næstkomandi. Gjaldskráin hækkaði um 6% um áramótin en í kjarasamningnum var samið um að gjaldskrárhækkanir sveitarfélaga yrðu endurskoðaðar og hækkunin á árinu 2024 yrði ekki meiri en 3,5%.

Í minnisblaði Örnu Láru Jónsdóttur, bæjarstjóra sem hún lagði fyrir bæjarráð leggur hún til að gjaldskráin fyrir leikskóla lækki ekki fyrr en 1. ágúst þannig að hækkun ársins verði einungis 3,5%. Bæjarráðið minnti á að starfshópur um málefni leikskóla sé að störfum og muni skila af sér tillögum um gjaldskrár leikskóla fyrir sumarfrí og telur bæjarráð farsælast að bíða eftir þeim tillögum.

Þá leggur bæjarstjóri til að dægradvöl taki ekki hækkunum eða hámarkshækkunum, þ.e. 3,5% frá 1. ágúst 2024, fyrir veturinn 2024/2025. Taka þurfi afstöðu til gjalds vegna hressingar í dægradvöl, 150 kr. pr. dag.

Bæjarráð ákvað að skólamáltíðir grunnskóla verði fríar frá 1. ágúst 2024, í samræmi við samkomulag ríkis og Sambands íslenskra sveitarfélaga.

Gjaldskrá á sundstöðum og skíðasvæði hækkaði almennt um 6% um áramótin og leggur bæjarstjóri til að gjaldskrár skíðasvæða verði breytt á eftirfarandi hátt:
a. endurgjaldslaust verði fyrir börn að 18 ára aldri. (núgildandi gjaldskrá er frítt fyrir börn 5 ára og yngri, og 50% afsláttur fyrir börn 6-18 ára). Ath. frítt er í sund fyrir öll börn 18 ára og yngri.
b. 50% afsláttur er veittur af búnaðarleigu til barna undir 18 ára aldri.

Tillagan var ekki afgreidd og fól bæjarráð bæjarstjóra að vinna áfram að tillögunum.

Út er komin bókin ADHD fullorðinna fyrir þá sem vilja skilja og ná betri tökum á ADHD einkennum sínum.
Bókin varpar ljósi á ADHD eins og það kemur fram á fullorðinsárum.
Farið er yfir lykileinkenni og orsakir ADHD, þróun einkenna yfir æviskeiðið, birtingarmyndir og mögulega fylgikvilla, eins og kvíða og þunglyndi.
Fjallað er um greiningarferli, meðhöndlun og helstu styrkleika sem fylgt geta því að vera með ADHD.
Eins er greint frá leiðum til að bæta skipulag, einbeitingu, tímastjórn og minni, sem og aðferðum til að draga úr frestun.

Þótt ADHD verði ekki upprætt með bókalestri má draga úr þeirri hömlun sem einkennin valda.

Höfundar eru sálfræðingar og hafa áralanga reynslu af greiningu og ráðgjöf vegna ADHD.

Bára Sif Ómarsdóttir stýrir ADHD-teymi við Kvíðameðferðarstöðina. Sóley Dröfn Davíðsdóttir er yfirsálfræðingur við Kvíðameðferðarstöðina.

Embætti landlæknis leiðir tvö stór lýðheilsuverkefni á sviði heilbrigðismála sem nýlega hafa hlotið nærri 1,0 milljarð kr. í styrk frá Evrópusambandinu.

Um 800 m.kr. renna til verkefnis sem felst í innleiðingu árangursríkra aðgerða til að koma í veg fyrir ósmitbæra sjúkdóma eins og krabbamein, sykursýki og hjarta- og æðasjúkdóma.

Alls taka 22 aðildarríki Evrópusambandsins þátt í verkefninu ásamt Íslandi, Noregi og Úkraínu og nemur heildarfjárhæð Evrópusambandsins til verkefnanna 11 milljörðum króna.

Hitt verkefnið snýr að aðgerðum til að sporna við útbreiðslu sýklalyfjaónæmra baktería. Sá styrkur nemur um 113 m.kr. og mun styðja við framkvæmd verkefna í nýrri aðgerðaáætlun stjórnvalda á þessu sviði.

Verkefnastyrkirnir eru fjármagnaðir af Heilbrigðisáætlun Evrópusambandsins sem hefur aldrei veitt jafn háa fjárhæð til lýðheilsuverkefna og nú.

Styrkirnir sem fara til sambærilegra verkefna í öðrum Evrópulöndum nema samtals um 18,5 milljörðum króna. 

Í dag lifir fólk almennt lengur en áður. Það er líka virkara og hraustara en nokkru sinni fyrr.

Á tímamótum nýs æviskeiðs er mikilvægt að búa sig vel undir það sem koma skal.
Sum kvíða því að láta af störfum á meðan önnur fagna. Gott er að byrja snemma að sjá þetta tímabil fyrir sér og huga að því hvernig best verður að verja tímanum.

Nú í fyrsta sinn má finna upplýsingar um hvað eina sem tengist þjónustu fyrir eldra fólk, réttindum þess og heilsueflingu á einum stað á vefnum island.is undir heitinu Að eldast.

Upplýsingagáttin er hluti af verkefninu Gott að eldast. Stjórnvöld taka þar utan um þjónustu við eldra fólk með nýjum hætti.

Að eldast | Ísland.is (island.is)