Íbúum á Vestfjörðum fækkaði um 308 um áramótum samkvæmt nýju tölum Hagstofunnar sem gefnar voru út 21. mars síðastliðinn. Voru íbúarnir 7.168 í stað 7.476, sem áður hafði verið gefið upp sem fjöldinn með lögheimili á Vestfjörðum 1. janúar 2024. Á landsvísu fækkaði íbúum landsins um nærri 17.000 manns og gætir breytinganna í öllum sveitarfélögum á landinu.

Hingað til hefur íbúafjöldi eingöngu byggt á skráningu lögheimilis í þjóðskrá. Hagstofan breytti aðferð sinni við útreikning á mannfjölda. Ný aðferð byggir á breiðari grunni opinberra gagna; skattagögnum og nemendagögnum auk þjóðskrár. Hagstofan telur meginástæðu misræmisins sem myndast hefur að mikill hvati er til þess að skrá alla útlendinga sem hingað koma með lögheimili en hins vegar sé lítill sem enginn hvati til þess að afskrá þá við flutning frá landinu.

Við þessa breytingu fækkar íbúum á Vestfjörðum um 4% eins og staðan var á nýársdag. Mest verður breytingin í Vesturbyggð, en þar fækkar íbúum um 7,1% eða úr 1.190 manns í 1.106. Næstmest fækkun verður í Tálknafjarðarhreppi en þar fækkaði íbúum um 4,2%. Þriðja mesta fækkunin er svo í Ísafjarðarbæ 3,6%. Í einu sveitarfélagi, Árneshreppi varð engin breyting, íbúarnir voru jafnmargir eftir breytinguna.

Borið er saman við íbúatölur Þjóðskrár Íslands.

Meðal verkefna ársins í Bolungavíkurhöfn verður að færa skeifuvog/karavog af núverandi
staðsetningu niður á Brimbrjót. Hvorki Fiskistofa né Húsnæðis- og mannvirkjastofnun gera athugasemd við breytinguna.

Hafnarstjórn hefur falið hafnarstjóra að fara í umræddar breytingar. Kostnaðaráætlun er 3m.kr.

Með færslunni verður dregið verulega úr akstri með fisk um hafnarsvæðið og einkum á þetta við um línu- og færafisk. Nýja staðsetningin er nær löndunarkantinum og fiskmarkaðnum.

Þá verður tekin upp aðgangsstýring á Brimbrjótinn sem verður til þess að tekið verður fyrir umferð bíla um Brjótinn en gangandi umferð mun áfram eiga greiða leið og hægt verður að veiða með stöng af Brjótnum sem verið hefur afar vinsælt.

Kristján Jón Guðmundsson hafnarstjórnarmaður segir að auk þessa verði hugað að flotbryggjum og skoða þurfi lengingu á þriðju flotbryggjunni þar sem útlit er fyrir aukna umferð sjóstangveiðibáta.

Ísafjarðarhöfn hefur samþykkt að kaupa húsnæði af olíufélagi útvegsmanna í Hafnarhúsinu á Ísafirði. Kaupverð er 85 m.kr. Höfnin hefur leigt húsnæðið sem er 398 fermetrar að stærð síðustu níu ár og hafnarstjón segir í bókun að full þörf sé á því fyrir starfsemi Ísafjarðarhafna.

Ekki er gert ráð fyrir kaupunum í fjárhagsáætlun 2024 og því leggur hafnarstjórn til við bæjarstjórn að samþykkja viðauka vegna kaupanna. Bæjarstjórnin tók málið fyrir á fundi sínum í gær og samþykkti þau.

Gylfi Ólafsson, formaður bæjarráðs segir að í raun verði ekki um útgjaldaaukningu að ræða, einkum þar sem breytingar verða á tekjuáætlun hafnarinnar sem vega upp kaupverðið.

Í dag var undirritaður samningur um byggingu nýs verknámshús við Menntaskólann á Ísafirði.

Ásmundur Einar Daðason barna- og menntamálaráðherra, Arna Lára Jónsdóttir bæjarstjóri Ísafjarðarbæjar, Jón Páll Hreinsson bæjarstjóri Bolungarvíkurkaupstaðar og Bragi Þór Thoroddsen sveitastjóri Súðavíkurhrepps undirrituðu samninginn ásamt Heiðrúnu Tryggvadóttur skólameistara Menntaskólans á Ísafirði.

Reykhólahreppur og Árneshreppur eru einnig aðilar að samningnum en fulltrúar þeirra gátu ekki verið viðstödd undirritunina í dag. Undirritunin fór fram á bókasafni MÍ að viðstöddum nemendum, starfsfólki, skólanefnd, sveitastjórnarfólki og ýmsum aðilum úr atvinnulífinu.

Samningurinn kveður á um skiptingu byggingarkostnaðar milli sveitarfélaganna og ríkisins. Sveitarfélögin munu lögum samkvæmt greiða samtals 40% af byggingarkostnaði en ríkið 60%.  Vinna við frummatsskýrslu fyrir bygginguna er langt komin og að henni lokinni mun framkvæmdasýsla ríkisins undirbúa hönnunarvinnu og tilheyrandi útboð. 

Með nýju verknámshúsi verður loks komin viðunandi aðstaða fyrir nám í trésmíði, háriðngreinum og rafiðngreinum sem hingað til hafa verið í kjallara heimavistar og á efri hæð núverandi verknámshúss. Nýja byggingin bætir við allt að 1000 fermetrum í aðstöðu til náms í verkgreinum og mun gera skólanum kleift að taka á móti fleiri nemendum í starfs- og verknám. Nú stundar rúmlega helmingur nemenda í dagskóla nám í verkgreinum við MÍ og hefur hlutfall þeirra farið vaxandi.

,,Menntaskólann á Ísafirði er ekki bara mikilvægur fyrir Ísafjörð sem kaupstað heldur fyrir Vestfirði alla. Það verður spennandi að fylgjast með uppbyggingunni á komandi árum og ég óska Vestfirðingum öllum til hamingju með þennan nýja áfanga.“  Segir Ásmundur Einar Daðason.

Heiðrún Tryggvadóttir skólameistari sagði það mikið fagnaðarefni fyrir skólann að þessi áfangi væri í höfn og gæfi skólanum aukinn byr í seglin fyrir komandi framþróun í skólastarfinu

Hagstofa Íslands gaf nýlega út ný gögn um íbúafjölda á Íslandi.

Þann 1. janúar 2024 voru íbúar landsins 383.726, þar af voru erlendir íbúar 63.528. Búið er að uppfæra mælaborð Byggðastofnunar um með þessum nýju gögnum.

Í mælaborðunum má sjá að 365.256 (95%) búa í byggðakjörnum og 18.470 (5%) í dreifbýli.

Á höfuðborgarsvæðinu eru 244.177 íbúar (64% landsmanna) en 139.549 (36%) utan höfuðborgarsvæðis. 

Hæst hlutfall erlendra íbúa er áfram í Mýrdalshreppi (58%) og þar næst í Skaftárhreppi (37%) og Bláskógabyggð (34%).

Meðalaldur erlendra ríkisborgara er 33,2 ár en íslenskra ríkisborgara 39,3 ár.

Mest hlutfallsleg fjölgun íbúa í einu sveitarfélagi á árinu 2023 var í Árneshreppi (13%), Sveitarfélaginu Vogum (12%) og Fljótsdalshreppi (12%). Í stærri sveitarfélögum var mest fjölgun í Sveitarfélaginu Árborg og Reykjanesbæ eða um 5%. Í Reykjanesbæ fjölgaði um 967 en í Árborg um 513 íbúa.

Hagstofan beitir nú nýrri aðferð við mat á íbúafjölda en hingað til hefur fjöldinn aðeins byggt á lögheimilisskráningum.

Með gömlu aðferðinni voru íbúar landsins rúmlega 400.000 en Hagstofan skoðar líka skattagögn og nemendagögn til að sjá hvort skráðir íbúar séu í raun með búsetu hérlendis. Með þeirri aðferð eru landsmenn um 15 þúsundum færri en lögheimilisskráningar gefa til kynna.

Drög að stjórnunar- og verndaráætlun fyrir Látrabjarg hafa verið lögð fram til kynningar næstu 6 vikurnar. 

Látrabjarg var friðlýst sem friðland í mars árið 2021. 

Áætlunin er unnin af fulltrúum Umhverfisstofnunar, fulltrúum landeigenda og fulltrúa Vesturbyggðar. 
Eins er áætlunin unnin í góðu samstarfi við Náttúrufræðistofnun Íslands. 

Meginmarkmið með gerð stjórnunar- og verndaráætlunar er að leggja fram stefnu um verndun svæðisins og hvernig viðhalda skuli verndargildi þess þannig að sem mest sátt ríki um. Í áætluninni er lögð fram stefnumótum til framtíðar, ásamt aðgerðaáætlun til þriggja ára. 

Áætlunin er sett fram í samræmi við 81. gr. laga nr. 60/2013 um náttúruvernd. 

Óskað er eftir athugasemdum frá almenningi við drög að áætluninni. ( Sjá nánar hér.)

Skilafrestur athugasemda er til og með 7. maí 2024. 

Í Vísindaporti 5. apríl mun Albert Eiríksson halda erindi sem hann nefnir „Matur er fyrir öllu“

Það má með sanni segja að að matur sé fyrir öllu. Hins vegar getur verið snúið að finna út hvað fer vel í okkur og hvað fer síður vel í okkur. Gott er að hafa í huga: Að stórum hluta erum við ábyrg fyrir eigin heilsu og muna að það er aldrei of seint að byrja. Hollur kjarngóður alvöru matur gerir okkur gott, hreyfing og nærandi félagsskapur hefur einnig mikil áhrif.

„Þó ég sé frekar upptekinn af hollum mat þá er markmiðið ekki að verða 125 ára heldur að líða vel og lifa sæmilega góðu lífi núna og það sem ég á eftir. Að tengja næringu og líðan ásamt því að skilja af hverju sumt sem var að hrjá mig hefur lagast gerir mig mun meðvitaðri um hvernig ég vil hafa áframhaldið.” segir Albert.

Albert Eiríksson lærður matreiðslumaður og hárgreiðslumaður. Hann stofnaði safnið Fransmenn á Íslandi á Fáskrúðsfirði og rak það í fjölmörg ár. Þá starfaði hann lengi við leiklistar- og tónlistardeildir Listaháskóla Íslands en hefur síðustu ár verið aðstoðarskólastjóri Tónlistarskóla Ísafjarðar. Albert og eiginmaður hans Bergþór Pálsson eru annálaðir gestgjafar og hafa í mörg ár tekið á móti hópum heim og haldið veislur, auk þess að vera með fyrirlestra um borg og bý.

Albert hefur notið handleiðslu Elísabetar Reynisdóttur næringarfræðings og saman voru þau með námskeið um bætta líðan fólks með góðri næringu.

Ein vinsælasta matarbloggsíða landsins, alberteldar.is er hugarfóstur Alberts. Auk fjölbreyttra uppskrifta er þar fróðleikur um áhrif matar og kurteisi svo eitthvað sé nefnt.

Erindið fer fram í kaffistofu Háskólaseturs Vestfjarða kl 12.10.

Morgunblaðið hefur dregið til baka fullyrðingu sem fram kom í frétt blaðsins í síðustu viku um fyrirtækið Jakob Valgeir í Bolungavík. Sagði blaðið að salan á Guðbjörgu ÍS hefði lagt grunninn að fyrirtækinu Jakob Valgeir og hafði það eftir Þorsteini Má Baldvinsyni. Segir í leiðréttingu Mbl að þetta hafi ranglega verið haft eftir Þorsteini Má.

Áfram stendur sú fullyrðing Þorsteins Más að þeir fjár­mun­ir sem fengust út úr Sam­herja hafi verið nýtt­ir til að kaupa veiðiheim­ild­ir sem voru miklu meiri en á Guðbjörg­inni á sín­um tíma. Lætur hann þar með í veðri vaka að salan hafi verið til góðs fyrir Vestfirðinga.

Með sölunni á Guðbjörgu ÍS til Samherja á sínum tíma fylgdu 3.400 þorskígildistonna kvóti samkvæmt frétt á Bæjarins besta 15. janúar 1997. Ásgeir Guðbjartsson átti 25% í útgerðarfélagi Guðbjargar ÍS. Hann stofnaði síðar útgerðarfélagið Guðbjart ásamt syni sínum, sem gerði út smábát. Það var árið 2005 selt til Jakobs Valgeirs ehf með um 360 tonna kvóta fyrir um 300 m.kr. Forsvarsmenn Jakobs Valgeir segja það hafa verið viðskipti en ekki fjármagnstilfærsla.

Í lok árs 2022 átti Jakob Valgeir ehf 2.821 þorskígildis kvóta í aflamarkskerfinu og 1.337 þorskígildiskvóta í krókaaflamarkskerfinu ssamkvæmt því sem fram kemur í ársreikningi félagsins.