Arctic Fish verður einn af aðalstyrktaraðilum Vestra knattspyrnu næstu árin. Skrifað hefur verið undir samning þar sem að merki Arctic Fish verður á keppnistreyjum meistaraflokks karla og kvenna en jafnframt styrkir félagið barnastarf Vestra.

„Nú þegar við höfum blásið í seglinn í kvennaknattspyrnu á Vestfjörðum er ánægjulegt að finna velvilja fyrirtækja á svæðinu sem gerir okkur kleift að halda úti metnaðarfullu starfi“ segir Kristján Þór Kristjánsson, formaður meistaraflokksráðs kvenna.

„Það er frábært að fá Arctic Fish í lið með okkur og stuðningur þeirra er okkur mikils virði“ segir Samúel Samúelsson, formaður meistaraflokksráðs karla.

„Það fyllir okkur stolti að geta tekið þátt í velgengni Vestra í knattspyrnu og vera þáttrakendur í því metnaðarfulla starfi sem þar fer fram. Meistaraflokkur karla í efstu deild, aukinn kraftur í kvennaknattspyrnu og öflugt barna- og unglingastarf Vestra lýsir vel þeim krafti og meðbyr sem er á Vestfjörðum þessi misserin“ segir Stein Ove Tveiten, forstjóri Arctic Fish.

Á meðfylgjandi myndum er Stein Ove Tveiten með forsvarsfólki Vestra og fulltrúum iðkenda. Aðalbúningurinn er með merki Arctic Fish en á varabúninginum verður Mowi Arctic merkið en undir því nafni eru vörur félagsins seldar.

Áfram Vestri

Í Ísafjarðarkirkju sunnudaginn 7. apríl kl. 11:00 verður Velkomin sértu guðsþjónusta!

Þetta er guðsþjónusta fyrir forvitna, fyrir þau sem vilja kynnast messunni og skilja, og þetta er guðsþjónusta fyrir þá útlendinga sem vilja læra íslensku og kynnast íslensku þjóðkirkjunni.

Einstakir messuliðir verða útskýrðir og sungið verður á íslensku, ensku, þýsku, spænsku og latínu.

Og rúsínan í pylsuendanum er að boðið verður upp á kaffi og kleinur eftir guðsþjónustuna.

Hollenska dýpkunarskipið Hein er komið til Ísafjarðar og mun vera við dýpkun við Sundabakka næstu vikur.

Hein mun dæla um 48.000 rúmmetrum af efni upp við Sundabakkann og um 50.000 rúmmetrum úr innsiglingunni. Efnið verður að hluta notað til að hækka land á Suðurtanga.

Í sumar á svo dýpkunarskipið Álfsnes að koma og klára að dæla upp.

Álfsnes mun dæla efninu sem þá verður tekið í fjöruna við Fjarðarstræti, en um sama leyti verður fyrirstöðugarðurinn við Norðurtanga tilbúinn.

Aðgengi að fjörunni verður bætt samhliða vinnu við fyrirstöðugarðinn og lýsing sett á garðinn og göngustíginn meðfram Sundstræti.

Vegagerðin rekur tvær vaktstöðvar og umferðarþjónustuna 1777.

Eitt af hlutverkum vaktstöðvanna er að fylgjast með jarðgöngum landsins en 1777 veitir upplýsingar til vegfarenda til dæmis þegar eitthvað kemur uppá í jarðgöngum.

Vaktstöðvar Vegagerðarinnar eru á Ísafirði og í Garðabæ.

Á Ísafirði er vakt frá hálf sex á morgnana til klukkan tíu á kvöldin en í Garðabæ er vakt allan sólarhringinn. Vaktstöðin í höfuðborginni fylgist með Hvalfjarðargöngum en á Ísafirði er fylgst með öllum öðrum göngum nema á nóttunni þegar vöktun þeirra færist til Garðabæjar.

Jarðgöngin eru stór hluti af verkefnum vaktstöðva, sérstaklega Hvalfjarðargöngin þar sem reglulega bila bílar.

Þeir sem koma að lokuðum göngum geta fengið upplýsingar hjá 1777 eða skoðað vefsíðuna umferdin.is.

Katrín Jakobsdóttir, forsætisráðherra heur ákveðið að gefa kost á sér til embættis forseta Íslands. Þetta tilkynnti hún fyrir skömmu. Hún mun biðjast lausnar sem forsætisráðherra. Í stuttu ávarpi sagði Katrin að reynsla hennar úr stjórnmálunum myndi nýtast vel sem forseti ekki síst sú að leiða fólk saman. Sagðist hún vilja gera gagn fyrir samfélagið og tala fyrir grunngildum þess.