Á vefsíðu Náttúrufræðistofnunar Vestfjarða er sagt frá því að glóbrystingur (Erithacus rubecula) hafi gert sig heimakominn í garði í Bolungarvík frá byrjun árs.

Eins og sést á mynd er glóbrystingur auðþekkjanlegur. Bringan og andlitið eru rauðgul ásamt því að hann er smár, um 14 cm að lengd og vænghafið um 20-22 cm.

Glóbrystingur er algengur haustflækingur á landinu þótt við fáum ekki oft fregnir af komu hans á okkar slóðir. Hann lifir oft af veturinn og hefur verpt á landinu. Þótt megin fæða hans séu ýmis smádýr étur hann einnig ber og fræ frá hausti fram á vor. Þegar hann flækist til landsins sækir hann því í garða þar sem fuglum er gefið.

Snæugla á Vestfjörðum 2023. Mynd Kristjana Einarsdóttir

Hinn gesturinn er snæugla sem Þórður Sigurðsson og fjölskylda sáu í Súðavík í byrjun febrúar.

Lengd snæugla er 53-66 cm og vænghafið 140-170 cm og er kvenfuglinn jafnan stærri.

Tegundin verpti af og til í Ódáðahrauni á árunum 1932-1974 og segir Sigurður Ægisson eitt til tvö hreiður hennar hafa fundist nær árlega á Vestfjörðum síðan árið 2008.

Snæuglan er hánorrænn fugl sem hér á landi hefur haldið sig mest á hálendi og heiðum þótt af og til sjáist hún í byggð.

Matvælastofnun varar við neyslu á tveimur framleiðslulotum af ferskum kjúklingi frá Matfugli ehf. vegna gruns um salmonellusmit.

Fram kem­ur í til­kynn­ingu að frek­ari rann­sókna sé þörf til þess að staðfesta grun­inn en þangað til þykir fyr­ir­tæk­inu rétt að innkalla vör­una.

Um er að ræða kjúk­ling með rekj­an­leika­núm­er­inu 011-24-09-3-66 og 011-24-09-2-07.

• Vöru­heiti: Ali, Bón­us
• Fram­leiðandi: Mat­fugl ehf, Völu­teigi 2, 270 Mos­fells­bæ

• Lot­u­núm­er: 011-24-09-3-66 og 011-24-09-2-07 (heill kjúk­ling­ur, bring­ur, lund­ir, læra­kjöt, bit­ar, kryddlegn­ar bring­ur), pökk­un­ar­dag­ur 02.04.2024 – 05.04.2024
• Dreif­ing: Bónusversl­an­ir, Krónu­versl­an­ir, Fjarðar­kaup, Hag­kaup, Hlíðar­kaup, Kaup­tún, Kass­inn, Nettó.

Neyt­end­ur sem keypt hafa kjúk­ling með þessu rekj­an­leika­núm­eri eru beðnir um að skila hon­um í viðkom­andi versl­un eða beint til Mat­fugls ehf., Völu­teigi 2, Mos­fells­bæ.

Vesturbyggð og Tálknafjarðarhreppur hafa samið við Brunavarnir Suðurnesja um að það taki að sér eldvarnareftirlit á þjónustusvæði sveitarfélaganna.

Tilgangur samningsins er að halda uppi reglubundnu eftirliti á grundvelli og í samræmi við lög um brunavarnir. Samningurinn gildir frá 1. ágúst 2023 til 31. desember 2024.

Slökkviliðsstjóri BS tekur að sér ábyrgð á eldvarnareftirliti í sveitarfélögunum eftir þeim lögum og reglum sem gilda um eldvarnareftirlit á þeim tíma sem samningurinn er í gildi. Tekur hann stjórnvaldsákvarðanir samkvæmt lögum um slökkvilið varðandi eldvarnareftirlit og getur beitt réttar- og þvingunarúrræðum í sveitarfélögunum.

Við framkvæmd eftirlits skal stuðst við brunavarnaráætlun Vesturbyggðar og Tálknafjarðarhrepps. Vísað er í brunavarnaráætlunina og meðfylgjandi forgangslist á skoðunarskyldu húsnæði í Vesturbyggð og Tálknafjarðarhrepp.

Eftirlitsmenn mæta til úttektar í sveitarfélögum tvisvar sinnum yfir veturinn og verða í eina viku í senn, eða skemur útfrá verkefnastöðu, og taka til eftirlits fasteignir í samræmi við forgangslista.

Gert er ráð fyrir að heildarkostnaður við skoðun fasteigna á gildistíma samningsins sé kr. 3.750.000.

Bæjarstjórn Vesturbyggðar samþykkti á fundi sínum fyrir páska viðauka við fjárhagsáætlun ársins til þess að mæta kostnaði við samninginn.

Svandís Svavarsdóttir, matvælaráðherra segir í svari við fyrirspurn frá Valgerði Árnadóttur, varaþingmanni að á landinu séu sex loðdýrabú með um það bil 7.600 dýrum í lok síðasta árs.

Spurt var hvort ráðherra muni „beita sér fyrir því að banna loðdýrarækt á Íslandi vegna dýravelferðarsjónarmiða og í ljósi þess að 25 ríki í Evrópu hafa bannað loðdýrarækt af þeim sökum og sífellt fleiri bætast við.“

Því svarar ráðherrann þannig að samkvæmt 75. gr. stjórnarskrárinnar sé öllum frjálst að stunda þá atvinnu sem þeir kjósa. „Þessu frelsi má þó setja skorður með lögum, enda krefjist almannahagsmunir þess. Því er ljóst að ef banna skal ákveðna tegund búfjárhalds þarf Alþingi að setja lög þess efnis. Ekki stendur til að svo stöddu að leggja fram frumvarp á Alþingi um bann við loðdýrarækt. „

Ennfremur segir í svarinu að mikilvægt sé að gæta að velferð dýra í hvívetna, þar á meðal loðdýra. „Markmið laga um velferð dýra er að stuðla að því að dýr séu laus við vanlíðan, hungur og þorsta, ótta og þjáningu, sársauka, meiðsli og sjúkdóma í ljósi þess að dýr eru skyni gæddar verur. Enn fremur er það markmið laganna að dýr geti sýnt sitt eðlilega atferli eins og frekast er unnt.“

Halla Hrund Logadóttir orkumálastjóri og aðjúnkt við Harvard háskóla gefur kost á sér til embættis forseta Íslands í forsetakosningunum sem fram fara þann 1. júní nk. 

Halla Hrund er fædd í Reykjavík 12. mars 1981. Eiginmaður hennar er Kristján Freyr Kristjánsson, framkvæmdastjóri og meðstofnandi hugbúnaðarfyrirtækisins 50skills. Þau eiga tvær dætur, Hildi Kristínu, 11 ára, og Sögu Friðgerði, 4 ára. 

Halla Hrund er með BA gráðu í stjórnmálafræði frá Háskóla Íslands, meistaragráðu í alþjóðasamvinnu með áherslu á hagfræði og orkumál frá The Fletcher School við Tufts háskóla, og meistaragráðu í opinberri stjórnsýslu frá Harvard háskóla með áherslu á umhverfis- og orkumál.

Halla Hrund var skipuð orkumálastjóri árið 2021, fyrst kvenna. Hún starfar jafnframt sem aðjúnkt við Harvard þar sem hún kennir á meistarastigi. Frá árinu 2017 hafði hún starfað sem meðstofnandi og framkvæmdastjóri við miðstöð Norðurslóða, Arctic Initiative, við Harvard. Árið 2019 var Halla Hrund valin Young Global Leader og kom Halla Hrund að kortlagningu breytingaþátta Norðurslóða á vettvangi World Economic Forum. Frá árinu 2015-2021 vann  Halla Hrund að nýsköpunarverkefninu Arctic Innovation Lab í samvinnu við fjölda háskóla og var leiðbeinandi í ýmsum orkutengdum nýsköpunarhröðlum. 

Halla Hrund hefur setið í stjórn Orkusjóðs frá árinu 2015. Sama ár hóf hún störf sem stundakennari við Háskólann í Reykjavík (HR), þar sem hún kennir námskeið um stefnumótun á sviði orkumála með áherslu á loftslagsmál. Halla Hrund var framkvæmdastjóri Iceland School of Energy við HR frá árinu 2013 fram til ársins 2016. Árin 2011 til 2013 var Halla Hrund forstöðumaður alþjóðaþróunar við HR. 

Fyrst eftir útskrift úr stjórnmálafræði árið 2005 lá leið Höllu Hrundar til Brussel í Belgíu þar sem hún starfaði á vegum utanríkisráðuneytisins að menningarmálum. Þar hélt hún meðal annars eina stærstu menningarhátíð sem Ísland hefur haldið erlendis með þátttöku Þjóðleikhússins, Íslenska dansflokksins, Iceland Airwaves, Listasafns Reykjavíkur og fleiri aðila. 

Frá Brussel fór Halla Hrund til Tógó í Vestur-Afríku þar sem hún tók þátt í nýsköpunar- og kennsluverkefni í höfuðborg landsins, Lomé. Halla Hrund fór síðan til Parísar og vann í nokkra mánuði hjá OECD, Efnahags- og framfarastofnun Evrópu, áður en hún hélt áfram í námi. 

Hafrannsóknarstofnunin norska hefur birt niðurstöður rannsóknar sem gerð var í fyrra á mögulegum smiti frá eldisfiski í villtan lax. Veiddir voru laxar sem gengu um hafsvæði þar sem mikið er um sjókvíaeldi, svo sem Harðangursfjörð. Athugað var hvort finna mætti í villta laxinum einhverja af fjórum tegundum vírusa, PD, ILA, PRV-1 og PMCV. Alls voru 22 fiskar af 138 með einhvern vírusinn. Þrír fiskar voru með PD, þrír með ILA, sex með PRV-1 og 10 fiskar með þann síðastnefnda. Í skýrslunni segir að tilvikin séu fá og staðfesti fyrri rannsóknir á þessu sviði. Haft er eftir talsmanni rannsóknarinnar að niðurstaðan sé að tíðni smita frá eldislaxi í villtan lax og sjóbirting sé mjög lág og að ekki sé að sjá að eldið auki smittíðnina.

Á fyrsta ársfjórðungi 2024 hafa slökkvilið landsins farið í 683 útköll.

Af þeim eru 278 útköll vegna elds og þar af er 31 tilfelli þar sem orsök er talin vera íkveikja.

Á meðal verkefna slökkviliða voru 92 útköll vegna vatnstjóns og 25 útköll vegna viðvörunarkerfa þar sem ekki var eldur.

Slökkviliðin hafa sinnt 13 útköllum á fyrsta ársfjórðungi 2024 þar sem manneskja hefur verið í neyð. 

Þetta er á meðal þess sem kemur fram útkallsskýrslugrunni slökkviliða, sem HMS hefur unnið tölfræðiupplýsingar úr, fyrir fyrsta ársfjórðung 2024.