Arnarlax hefur undirritað samning við norsku skipasmíðastöðina Moen Marin um smíði á þjónustubát sem verður með blendingslausn eða hybrid. Er þá báturinn knúinn áfram með rafmagni en hefur einnig möguleika á að nota venjulegt eldsneyti. Í einum svona bát er jafnmikið af batteríum og í 12 Teslum. Verður það fyrsti þjónustubáturinn hér á landi af þessu tagi, en nokkur reynsla er komin á svona báta í Noregi.

Verð er um 500 milljónir íslenskra króna og afhending er áætluð í mars 2025.

Með þessu leitast Arnarlax við að nota umhverfisvænar lausnir og draga úr kolefnismengun. Björn Hembre, forstjóri Arnarlax segir í fréttatilkynningu að sem stærsta eldisfyrirtæki á landinu vilji það vera leiðandi í grænum orkuskiptum.

Þorsteinn Másson, framkvæmdastjóri Bláma segir að þessi samningur marki nýtt skref í áformum um orkuskipti á Íslandi og sýni að Arnarlax er staðráðið í að draga úr kolefnislosun og þróa nýjungar sem stuðla að því.

Tónlistarfélag Ísafjarðar auglýsir styrki til tónleikahalds í Hömrum veturinn 2024-2025. Veittir verða styrkir til tónlistarmanna og/eða tónlistarhópa. Umsóknarfrestur er til 10. maí 2024. Nánari upplýsingar veitir tónlistarfélagið á netfanginu: tonlistarfelag.isafj@gmail.com
Styrkumsóknum ber að skila á netfangið tonlistarfelag.isafj@gmail.com á einu A4 blaði (sem PDF). Umsókn á að innihalda eftirtaldar upplýsingar:
Heiti tónleikanna
Hvaða verk verða flutt?
Æskileg tónleikadagsetning: mánuður eða dagur.
Nöfn og stutt lýsing á flytjendum.
1-2 slóðir á ítarefni.
Má fylgja mynd.
Sendist inn á einu A4 blaði sem PDF.
Styrkupphæð er 150 þúsund krónur.

Engin bensínafgreiðsla er á Suðureyri eftir að einu stöðunni var lokað þar sem hún stóðst ekki kröfur.Eftir þá lokun er aðeins afgreidd díselolía á báta og vinnuvélar á höfninni.

Erindi um þetta frá íbúa á Suðureyri var lagt fram á síðasta fundi bæjarráðs til kynningar.

Vakin er athygli á því að ýmis tæki eru í notkun sem nota jarðefnaeldsneyti. Tæki sem verður ekki ekið í gegnum göngin til að sækja eldsneyti á næstu stöð. Þetta eru td sláttuvélar og aðrar smávélar, neyðarafstöðvar björgunarsveitarinnar, vélsleðar og fjórhjól.

Eldsneytið kemur „undantekningalaust í skottinu á bílum í gegnum einbreiðann legg Vestfjarðaganganna og það sem ekki passar á tækið sem á sopann endar inní bílsskúr, geymslu eða iðnaðarhúsnæði. Þessir flutningar passa sennilega illa í áhættugreiningu slökkviliðis og vegagerðarinnar fyrir göngin.“

Þá segir: „Veturinn 2020 var ágætis áminning að hvert þorp þarf að vera sjálfbjarga í nokkar daga og hefur ýmislegt þegar verið gert t.d. með þjálfun fólks í sjúkraflutningum osfrv og er það vel. En það hefði td verið áhugavert að sjá hvernig hefði gengið að tappa af fólksbílum bæjarins yfir á neyðarbúnað ef það hefði þurft að nota hann í einhvern tíma á meðan fjörðurinn var lokaður.“

Hvatt er til þess að fundin verði lausn á þessu máli og að sett verði upp dæla í þorpinu.

Fjórðungssamband Vestfirðinga hélt í gær fjórðungsþing að vori. Þingið fór fram í Edinborgarhúsinu á Ísafirði og stóð aðeins dagspart. Þar komu saman kjörnir fulltrúar sveitarstjóra á Vestfjörðum. Á fundinum var farið yfir skýrslu stjórnar Fjórðungssambands Vestfirðinga og þeirra rekstrareininga sem það ber ábyrgð á. Auk þess fór fram afgreiðsla ársreiknings 2023  og samþykkt endurskoðuð fjárhagsáætlun.

Breyting var á skipan stjórnar Fjórðungssambandsins. Jóhann Birkir Helgason var kosinn aðalmaður í stjórn Fjórðungssambands Vestfirðinga í stað Aðalsteins Egils Traustasonar sem lét af störfum. Dagný Finnbjörnsdóttir var kosinn varamaður í stjórn og Guðbjörg Stefanía Hafþórsdóttir var kosin varamaður í fjárhagsnefnd Fjórðungssambands Vestfirðinga. Fyrir þinginu lá að kjósa kjörnefnd fyrir Fjórðungsþing að hausti en var því frestað vegna væntanlegra kosninga í nýju sveitarfélagi á suðursvæði Vestfjarða. Kosning verður kláruð á sumarþingi sem fer fram á netinu 19. júní.

Samþykkt var að halda 69. Fjórðungsþing að hausti á Laugarhóli í Bjarnarfirði dagana 18. og 19. október.

Rekstrartekjur Fjórðungssambands Vestfirðinga á síðasta ári voru 233 milljónir króna og rekstrarafgangur varð tæpar 5 m.kr. Eignir sambandsins voru um síðustu ármót 162 m.kr. og þar af eigið fé 37 m.kr.

Frá Jöfnunarsjóði sveitarfélaga fékk Fjórðungssambandið 50 m.kr. auk þess sem Jöfnunarsjóðurinn lagði til 12 m.kr. vegna sóknaráætlunar. Frá ríkissjóði í nafni sóknaráætlunar komu 119 m.kr. Þá komu 47 m.kr. frá ráðuneytum vegna verkefnaframlaga. Útgjaldamegin þá greiddi Fjórðungssambandið 47 m.kr. til aðkeyptra verktaka. Greiddir styrkir í sóknaráætlun voru 55 m.kr.

Formaður Fjórungssambandsins er Jóhanna Ösp Einarsdóttir, sveitarstjórnarmaður í Reykhólahreppi.

Landsmót UMFÍ 50+ er blanda af íþróttakeppni og annarri keppni, hreyfingu og því að fá fólk á besta aldri til að hafa gaman saman.

Mótið verður haldið í Vogum á Vatnsleysuströnd dagana 7. – 9. júní og er það opið öllum sem verða 50 ára á árinu og eldri. Einnig verða í boði greinar fyrir yngri þátttakendur. Þátttakendur þurfa ekki að vera skráðir í íþróttafélag, allir geta tekið þátt og á sínum forsendum.

Mótið fer fram á tiltölulega litlu svæði sem er í hjarta bæjarins. Íþróttavöllur, golfvöllur, sundlaug og íþróttahús er allt í göngufæri.

Keppt verður í allskonar greinum – en svo eru allir velkomnir að koma og prófa og taka þátt.

Greinar mótsins eru: Biatholon – Boccía – Borðtennis – Bridds – Frisbígolf – Frjálsar íþróttir – Golf – Strandarhlaup – Hjólreiðar – Línudans – Petanque – Pílukast – Pútt – Pönnukökubakstur – Ringó – Skák – Stígvélakast – Sund.

Hjá Landhelgisgæslunni eru starfandi tvær varðskipsáhafnir sem starfa um borð á varðskipunum Þór og Freyju.

Að undanförnu hefur varðskipið Freyja verið í smávægilegu viðhaldi og því hefur áhöfnin á Freyju verið við störf um borð í varðskipinu Þór.

Síðustu dagar hafa verið annasamir um borð í Þór en áhöfnin var meðal annars til taks á Austfjörðum vegna snjóflóðahættu um liðna helgi.

Eins og gengur hefur töluvert verið um æfingar. Í síðustu viku fóru meðal annars fram æfingar í reykköfun og notkun á línubyssu.

Þá hefur áhöfn varðskipsins farið til eftirlits í þrettán skip og báta að undanförnu. Í flestum tilfellum hefur allt verið eftir bókinni en smávægilegar athugasemdir um lagfæringar þurfti að gera hjá einhverjum.

69. Fjórðungsþing Vestfirðinga að vori verður haldið í dag á Ísafirði.

Ekki verður streymt frá þinginu að þessu sinni en upptökur munu koma af erindum á heimasíðu Vestfjarðastofu fljótlega eftir þingið.

Þingið verður haldið í Bryggjusal Edinborgarhúsins á Ísafirði.

 Ársfundur Byggðastofnunar 2024 verður svo haldinn miðvikudaginn 17. apríl í félagsheimili Bolungarvíkur.