Eyjólfur Ármannsson, samgönguráðherra segir að ákvörðun Icelandair um að hætta áætlunarflugi til Ísafjarðar sé áfall. Hann segir í færslu á facebook:
„Áætlunarflug til Ísafjarðar er gríðarlega mikilvægt fyrir svæðið og Vestfirði í heild. Ég mun óska eftir fundi með forstjóra Icelandair sem fyrst til að ræða þetta mál, sem kallar á viðbrögð stjórnvalda. Gríðarlega mikilvægt er að áætlanaflug til Ísafjarðar sé tryggt, sem og rekstrargrundvöllur þess. Það er verkefnið.“
Í tilefni 20 ára afmælis Háskólaseturs Vestfjarða verður gestum og gangandi boðið að fagna þessum tímamótum á opnu húsi í Vestrahúsi þann 14. mars næstkomandi. Kl. 13:00 verður haldinn aðalfundur Háskólaseturs, sem er opinn gestum, húsið opnar kl. 14:30 en formleg dagskrá hefst upp úr kl. 15:00 með ávörpum stjórnaformanns og fleiri gesta. Flestar stofnanir hússins taka þátt í opnu húsi og því geta bæjarbúar nýtt tækifærið og séð þá fjölbreyttu starfsemi sem fram fer í Vestrahúsi. Einhverjar stofnanir ætla að bjóða upp á veitingar og/eða leiki og verður það þá auglýst síðar.
Dagskrá:
14:30 – Húsið opnar fyrir gestum
15:00 – Ávörp í tilefni 20 ára afmælis Háskólaseturs og 20 metra afmæliskaka
16:00 – Tónlistaratriði
17:00 – Nemendur kynna námið og lífið á Ísafirði
Auk þessa munu verða ýmiskonar kynningar í stofum Háskólaseturs, s.s. á rannsóknum og ráðstefnum, myndasýningar og kynningar á afurðum nemenda. Einnig munu Háskólinn á Bifröst og Landbúnaðarháskóli Íslands mæta og kynna sína starfsemi
Uppsjávarveiðiskipin Aðalsteinn Jónsson og Polar Ammassak voru í samvinnu við Hafrannsóknastofnun við loðnurannsóknir í síðustu viku. Markmiðið var að kanna hvort meira af loðnu hefði skilað sér inn á norðvesturmið síðan loðnumælingar fóru fram þar í fyrri hluta febrúarmánuðar.
Þetta kemur fram í fréttatilkynningu frá Hafrannsóknarstofnun.
Magn af loðnu sem mældist nú var ívið lægra en fyrri mælingin og því ljóst að ekkert hafi bæst við loðnugönguna. Fyrri ráðgjöf Hafrannsóknastofnunar um veiðar á 8589 tonn loðnu á yfirstandandi vertíð stendur því óbreytt.
Mest af loðnunni var að finna á grunnunum út af Húnaflóa og Skagafirði (1. mynd). Hafrannsóknastofnun áformar ekki fleiri loðnumælingar þennan veturinn.
Icelandair tilkynnti í gærkvöldi að það myndi á næsta ári hætta áætlunarflugi til Ísafjarðar. Bogi Nilson, forstjóri sagðist gera ráð fyrir því að flugið muni afleggjast eftir sumarvertíðina árið 2026. Skýringin sem gefin er að hætt verður að nota Bombardier Dash 200-vélar í flugi til Grænlands og þá verður ekki lengur hagkvæmt að nota þær í flugi til Ísafjarðar.
Sigríður Júlía Brynleifsdóttir, bæjarstjóri í Ísafjarðarbæ sagði aðspurð að henni hafi ekkert orðið sérlega vel við.
„Ég verð að segja að það er frekar þungt í mér hljóðið vegna þessa. Við höfum nú þegar óskað eftir fundi með forstjóra og framkvæmdastjóra tekju-, þjónustu- og markaðssviðs Icelandair. Sá fundur verður núna á fimmtudaginn.
Við þurfum að vinna saman að því að finna lausnir en það er ekki inní myndinni að hingað sé ekkert áætlanaflug. Minni á að flugsamgöngur á norðanverða Vestfirði eru einu almenningssamgöngurnar við svæðið.
Auðvitað verðum við líka að líta á þetta sem tækifæri til að gera betur, eins og einhver sagði í mótbyr felast tækifæri. Þrátt fyrir allt þá höfum við eitt og hálft ár til að finna lausnir sem þýðir að við verðum að vinna hratt og það gerum við saman, bæjar- og sveitarstjórar á norðanverðum Vestfjörðum sem og forsvarsfólk Vestfjarðastofu, auk þingmanna kjördæmisins.“
Lokagrein númer þrjú af þremur.
Árið 2025 markar þau tímamót að allt í einu eru liðin heil tuttugu ár frá stofnun Háskólasetursins og boðað hefur verið til ársfundar 14. mars nk. þar sem þess verður minnst.
Frá upphafi hefur verið lögð áhersla á að skapa aðstæður fyrir fjarnámsnema í verkefnavinnu, kennslu eða fundarhöldum og gera þeim um leið kleift að vera hluti af háskólasamfélaginu. Slíkt dregur úr einangrun fjarnámsnema og gerir námið aðgengilegra.
Boðið er upp á eins fjölbreytt úrval námskeiða og mögulegt er. Sumarnámskeiðin eru vel þekkt og heimamenn þekkja beiðnina frá Háskólasetri um að tala íslensku við nemana okkar.
Þá er mastersnámið sem staðnám í boði og er kennt á ensku eins og nefnt var í grein nr. 2. Þegar námið var ákveðið var horft til sérstöðu svæðisins og hvað hentaði best útfrá umhverfinu til kennslu. Haf- og strandsvæðastjórnun (Coastal and Marine Management) veitir MRM gráðu (Master of Resource Management) og útskrifar fólk sem hefur þá öðlast þekkingu í náttúru- og félagsvísindum við stjórnunarfræði innan haf- og strandkerfa.
Sjávarbyggðafræðin (Coastal Communities and Regional Development) gefur MA (Master of Arts) gráðu og útskrifar fólk sem hefur þekkingu í félagsvísindum, hagfræði og skipulagsmálum.
Auðvitað henta þessar námsleiðir hvort sem er Íslendingum eða útlendingum. Sem fyrr segir þá þarf staðnám sem kennt er á Ísafirði að hafa víða skírskotun og fá fólk til að koma á staðinn til að stunda námið. Fjöldi heimamanna nægir ekki til að halda uppi slíku námi.
Það er gaman að verða vitni að því hversu oft útskrifaðir nemar vitna til þess að þau hafi stundað nám við Háskólasetur Vestfjarða og hversu gagnlegt það hafi verið fyrir þau og í hversu stórkostlegu umhverfi þau hafi stundað sitt nám. Og útskriftarstaðurinn, Hrafnseyri við Arnarfjörð skilur eftir sérstaka þjóðlega tilfinningu og tengingu sem aldrei hverfur.
Greinarhöfundur var valinn til formennsku í stjórn Stúdentagarða Háskólasetursins sem jafnframt var byggingarnefnd þeirra 40 íbúða sem risu við Fjarðarstrætið á Ísafirði. Greining á leigumarkaðnum hafði sýnt fram á að vegna fjölgunar starfa á svæðinu og fjölgunar þyrfti stúdentaíbúðir.
Það fór aðeins um okkur sem völdumst í verkefnið þegar Peter Weiss sagði okkur að við hefðum ár til að koma með þessar 40 íbúðir klárar til útleigu fyrir nema. Þetta hafðist með góðu fólki og röskum verktökum. Tilvist þessara íbúða styrkir Háskólasetrið og býður upp á enn betri aðstöðu fyrir námsmenn til lengri og skemmri tíma. Og segir að Háskólasetrið er komið á fullorðinsstig.
Að lokum langar mig til að þakka öllum sem lagt hafa hönd á plóg. Frábær forstöðumaður og starfsfólk þar sem metnaðurinn skín af öllum. Stjórnarfólk sem svo sannarlega hefur sýnt metnað og er mjög hugleikið um að samfélagið þróist áfram og Háskólasetrið leggi sitt ríkulega framlag til þess.
Mig langar að nota sömu lokaorð í þessa grein og ég notaði í opnunarræðu mína þegar við héldum formlega opnunarhátíð Háskólasetursins fyrir 20 árum.
,,Um leið og menntamálaráðherra og aðrir forsvarsmenn ríkisstjórnarinnar sem hlýða á mál mitt eru hvattir til að leggja sérstaka áherslu á að vinna með okkur að uppbyggingu þekkingariðnarins og sköpun nýrra starfa vil ég þakka fyrir gott samstarf og mikilvægan áfanga sem náðst hefur með stofnun Háskólaseturs Vestfjarða og fjármögnun á rekstri þess. Nú er hátíðarstund – að nokkrum árum liðnum munum við líta til baka og segja; þetta var gæfuspor.”
Halldór Halldórsson
formaður Háskólaseturs fyrstu 10 árin.
Samfylkingin eykur fylgi sitt verulega á landsvísu samkvæmt nýrri skoðanakönnun Gallup, sem unnin var í febrúar fyrir RUV. Ríkisútvarpið hefur einnig veitt aðgang að kjördæmaniðurbroti könnunarinnar.
Á landsvísu eykst fylgi Samfylkingarinnar um 5% og mælist flokkurinn með 26% fylgi. Sjálfstæðisflokkurinn mælist með 21,5% í könnuninni, sem er 2,1% meira fylgi en flokkurinn fékk í alþingiskosningunum í lok nóvember sl. Flokkur fólksins missir um 5,5% fylgi frá kosningunum og mælist með 8,3%.
Í Norðvesturkjördæmi tekur Samfylkingin mikið stökk frá úrslitum alþingiskosninganna og eykur fylgi sitt úr 15,9% upp í 24,6% og mælist langstærsti flokkurinn í kjördæminu. Sjálfstæðisflokkurinn bætir einnig við sig og fer í 19,3%, en var með 18% í kosningunum. Hinir stjórnarflokkarnir, Viðreisn og Flokkur fólksins tapa báðir um þriðjungi fylgis síns. Litlar breytingar eru á fylgi annarra flokka. Svo virðist sem fylgisaukning Samfylkingarinnar sé að mestu á kostnað hinna stjórnarflokkanna tveggja.
Ef þetta yrðu úrslit kosninga myndi þingsæti Viðreisnar í kjördæminu flytjast til Samfylkingarinnar, sem fengi þá tvo kjördæmakjörna þingmenn. Sjálfstæðisflokkur, Framsóknarflokkur, Miðflokkur og Flokkur fólksins fengju hver sitt þingsæti. Ekki er spáð fyrir um það hvaða flokkur fengi jöfnunarþingsætið.
Niðurstöður sem hér birtast um fylgi flokkanna á landsvísu eru úr netkönnun sem Gallup gerði dagana 3. febrúar – 2. mars 2025. Heildarúrtaksstærð var 9.652 og þátttökuhlutfall var 47,2%. Vikmörk á fylgi við flokka eru 0,6-1,4%. Einstaklingar í úrtaki voru handahófsvaldir úr Viðhorfahópi Gallup.
Alls er byggt á 3.820 svörum og þar af voru 313 úr Norðvesturkjördæmi.
Heildarafli íslenskra skipa árið 2024 var 995 þúsund tonn sem er 28% minni afli en árið 2023. Samdrátturinn er að mestu til kominn vegna þess að engin loðna veiddist árið 2024. Aflaverðmæti samkvæmt bráðabirgðatölum voru tæplega 171 milljarður króna sem er 14% samdráttur frá fyrra ári.
Árið 2024 veiddust 423 þúsund tonn af botnfiski sem er 5% aukning frá árinu 2023. Á sama tíma jókst verðmæti botnfiskaflans um 1%, fór úr 126 milljörðum króna í tæplega 128 milljónir. Af botnfiski var þorskaflinn tæp 224 þúsund tonn og aflaverðmæti hans við fyrstu sölu um 82 milljarðar króna. Afli uppsjávartegunda árið 2024 var um 547 þúsund tonn sem er 42% minni afli en árið 2023.
Aflaverðmæti uppsjávarafla dróst saman um 50% á milli ára og nam 29 milljörðum króna árið 2024. Af uppsjávarafla árið 2024 veiddist mest af kolmunna, tæp 324 þúsund tonn en aflaverðmæti hans við fyrstu sölu voru um 12 milljarðar króna. Síldaraflinn var rúm 133 þúsund tonn og nam aflaverðmæti hans rúmum 9 milljörðum króna.
Fjármála- og efnahagsráðuneytið hefur móttekið tillögur frá Félagi íslenskra tryggingastærðfræðinga um nýjan reiknigrundvöll fyrir örorku til að nota við tryggingafræðilegar athuganir lífeyrissjóða. Hinar nýju forsendur voru samþykktar á félagsfundi félagsins 29. janúar sl. Fram kemur í erindi félagsins að reiknigrundvöllurinn byggist á upplýsingum frá öllum lífeyrissjóðum. Mat félagsins er að hinar nýju forsendur leiði til lækkunar á mati örorkuskuldbindinga lífeyrissjóða.
Í reglugerð um skyldutryggingu lífeyrisréttinda og starfsemi lífeyrissjóða er kveðið á um að við mat á örorku- og endurhæfingarlíkum skuli nota örorku-og endurhæfingartöflur byggðar á innlendri reynslu um tíðni örorku og sem útgefnar eru af ráðherra að fengnum tillögum Félags íslenskra tryggingastærðfræðinga.
Ráðuneytið fellst á tillögur félagsins og tilkynnir hér með að við næstu tryggingafræðilegu athugun hjá lífeyrisjóðum skuli byggt á hinum nýja reiknigrundvelli við mat á örorku.
Listahátíð í Reykjavík, Byggðastofnun og Icelandair auglýsa nú í nítjánda sinn eftir umsóknum um Eyrarrósina, viðurkenningu sem veitt er framúrskarandi menningarverkefni í landsbyggðunum.
Horft er til þess að verkefnið hafi fest sig í sessi, verið starfrækt í yfir þrjú ár og hafi áhrif á menningarlíf á sínu landssvæði.
Menningarstarf í Alþýðuhúsinu á Siglufirði hlaut Eyrarrósina árið 2023 en meðal fyrri verðlaunahafa má nefna Handbendi á Hvammstanga, Bræðsluna á Borgarfirði eystra, Skaftfell, Frystiklefann á Rifi, Aldrei fór ég suður, Ferska vinda í Garði, List í ljósi á Seyðisfirði og Skjaldborg á Patreksfirði.
Eyrarrósarhafinn hlýtur 2,5 milljón króna peningaverðlaun. Framleitt verður sérstakt myndband um verkefnið og því gefinn kostur á að standa að viðburði á aðaldagskrá Listahátíðar í Reykjavík 2026.
Hvatningarverðlaun Eyrarrósarinnar verða nú veitt í þriðja sinn til þriggja nýlegra verkefna sem sýna faglegan metnað bæði í rekstri og listrænni sýn. Hver hvatningarverðlaun eru 750 þúsund krónur.
Verndari Eyrarrósarinnar er Hr. Björn Skúlason, maki forseta Íslands
Strandagangan fer fram á skíðasvæði Skíðafélags Strandamanna í Selárdal í Steingrímsfirði, laugardaginn 8. mars 2025.
Strandagangan er almenningsganga fyrir fólk á öllum aldri, jafnt byrjendur sem lengra komna og er hluti af Íslandsgöngumótaröð SKÍ.
Þetta er 31. árið í röð sem gangan er haldin en fyrsta Strandagangan var haldin árið 1995.
Að lokinni keppni er hið margrómaða kökuhlaðborð í Félagsheimilinu á Hólmavík en þar mun verðlaunaafhendingin einnig fara fram. Áhorfendur og aðrir sem vilja styrkja gönguna geta keypt sig inn á kökuhlaðborðið á staðnum og þegar keppnisgögn eru afhent,
Sunnudaginn 9. mars heldur fjörið áfram með leikjadegi fyrir börn og unglinga og skíðaskotfimimóti.
Skráning og nánari upplýsingar hér.
