Stjórn Fjórðungssambands Vestfirðinga ræddi stöðu farnetsuppbyggingar á Vestfjörðum á fundi sínum 18. desember. Fyrir liggur Fjarskiptaáætlun Vestfjarða (apríl 2024) og stefnumörkun stjórnvalda um uppbyggingu farnets á stofnvegum fyrir árslok 2026.

Stjórn Fjórðungssambands Vestfirðinga bókaði að hún harmi þá ákvörðun stjórnvalda að skera af fjármagn
sem ætlað var til uppbyggingar farnets á stofnvegum og fara því gegn markmiðum í samþykktri Fjármálaáætlun 2025-2029. Tilgreint fjármagn var ætlað til samstarfs ríkisins (Öryggisfjarskipta ehf.) með fjarskiptafyrirtækjum og ljúka uppsetningu nauðsynlegra senda fyrir árslok 2026. Stjórn Fjórðungssambands Vestfirðinga bendir á að nú verða fjarskiptafyrirtækin ein með uppbyggingu farnetsins og vænta má að verkefninu seinki verulega. Stjórnvöld eru því hér ábyrg að viðhalda óöryggi vegfarenda á stofnvegum á Vestfjörðum til óljósar framtíðar jafnt á farneti sem og Tetrakerfi viðbragðsaðila.

Skorar á nýja ríkisstjórn að falla frá niðurskurðinum

Stjórn Fjórðungssambands Vestfirðinga skorar á komandi ríkisstjórn að snúa þessari ákvörðun og veita heimild í fjáraukalögum 2025 til að setja fjármagn að nýju í verkefnið. Á Vestfjörðum er um að ræða 24 senda sem þarf að byggja upp auk viðbótarbúnaðar fyrir Tetrakerfi. Verði ákvörðun um niðurskurð ekki snúið, verður að tryggja að þau verkefni sem fara af stað á vegum fjarskiptafyrirtækja verði forgangsraðað á Vestfirði.

Hverfisráð Önundarfjarðar bókaði á fundi sínum í byrjun desember 2024 um fyrirhugaða sölu Félagsheimilis Flateyrar sem bæjarráð Ísafjarðabæjar lýsti yfir um miðjan nóvember að það væri fylgjandi.

Var erindið tekið fyrir á bæjarráðsfundi á mánudaginn, rúmum mánuði síðar.

Í bókuninn lýsir Hverfisráð Önundarfjarðar yfir vonbrigðum með að ekki hafi verið haft samband við ráðið
og borið undir það að enn standi til að selja samkomuhúsið á Flateyri. Hverfisráðið bendir á að húsið hefur verið nýtt með góðum árangri fyrir þær tvær leiksýningar sem Leikfélags Flateyrar hefur sett upp síðan
það var endurvakið fyrir rúmum tveimur árum síðan.

Samfélagið á Flateyri sé samhent og mörgum mjög annt um húsið. Viðgerðir voru unnar í sjálfboðavinnu árið 2005 fyrir fé úr sjóðnum samhugur í verki og styrk frá fyrirtækinu Kambi. „Við viljum gjarnan fá tækifæri til samtals áður en skrefið um að auglýsa húsið til sölu verður tekið og skoða alla möguleika á áframhaldandi eigu Ísafjarðarbæjar á húsinu í samráði við samfélagið á Flateyri.“

Einnig var lagt fram erindi frá Leikfélagi Flateyrar. Það er einnig lýst yfir vonbrigðum með áform Ísafjarðarbæjar um sölu hússins. Gerð er athugasemd við fullyrðingar um viðhaldskostnað sem bærinn hafi borið af húsinu.

„Samkvæmt bestu vitund Flateyringa sem af húsinu hafa komið síðustu áratugina hefur húsinu ekki verið haldið við að nokkru leyti síðan árið 2005 þar sem vaskir Flateyringar lögðu vinnu sína fram og peningur í framkvæmdirnar kom úr sjóðnum Samhugur í verki, Hjálmi og öðrum frjálsum framlögum. Umsjón hússins var svo í höndum Lýðskólans frá 2018-2023.“

Þá segist Leikfélagið ósammála því sem kemur fram í fundargerð bæjarráðs og minnisblaði um að lítil notkun hafi verið á húsinu undanfarin ár.

Bæjarráð fól bæjarstjóra að ræða við bréfritara og leggja málið fyrir að nýju.

Hilmar Lyngmó, hafnarstjóri segir að engar afbókanir hafi borist enn frá skemmtiferðaskipum sem hafa boðað komu sína í sumar. Hann segist telja að skipafélögin fylgist með áformum nýrrar ríkisstjórnar og bíði átekta. Um áramótin tók gildi nýtt gjald á ferðamenn með skemmtiferðaskipum, svonefnd innviðagjald, sem er 2.500 kr. á hvern farþega fyrir hvern sólarhring sem skip er á ferð um landið. Hilmar sagði að fyrir stórt skemmtiferðaskip væri gjaldið um 55 m.kr. fyrir hverja ferð um landið og skip sem kemur átta sinnum yfir sumarið væri þetta 440 m.kr. útgjöld fyrir skipafélögin. Farþegarnir hafa þegar greitt ferðina og verður því skipafélagið að greiða gjaldið.

Samtök hagsmunaaðila Cruise Iceland mótmæltu lagasetningunni og fóru fram á að gjaldið yrði innheimt í áföngum en ekki varð orðið við því við afgreiðslu fjárlaga 2025.

Á Akureyri segir Pétur Ólafsson hafnarstjóri Hafnasamlags Norðurlands að skipakomum muni fækka um 44 í Eyjafjörð eða um 17%. Eins hefur orðið vart við afbókanir á Grundarfirði, Vestmannaeyjum og hjá Faxaflóahöfnum.

Alls komu 186  skemmtiferðaskip til Ísafjarðarhafna í fyrra, allar til Ísafjaðar en þó þrjár til Þingeyrar. Farþegafjöldinn sem skemmtiferðaskipin báru var tæplega 235 þúsund manns og tekjur hafnarsjóðs af þessari starfsemi námu um það bil 756 milljónum króna. 

Erna Lea Bergsteinsdóttir hefur verið ráðin í starf verkefnastjóra farsældar hjá Vestfjarðastofu. Auglýst var eftir umsóknum í nóvember síðastliðnum og bárust 10 umsóknir um starfið.

Erna Lea er með meistaragráðu í félagsráðgjöf til starfsréttinda frá Háskóla Íslands. Hún hefur undanfarið starfað sem félagsráðgjafi í barna- og fjölskylduteymi hjá velferðarsviði Kópavogsbæjar. Jafnframt hefur hún reynslu af því að vinna með börnum og unglingum í félagsmiðstöðvum og hefur verið aðstoðarmaður dósents við Háskóla Íslands. Starfsnámi sínu í félagsráðgjöf sinnti Erna meðal annars hjá Vesturbyggð.

Erna er nýr íbúi á Vestfjörðum. Hún verður búsett á Bíldudal og mun vinna á starfsstöð Vestfjarðastofu í Ólafshúsi á Patreksfirði.

Farsældarverkefnið er samstarf Vestfjarðastofu og mennta- og barnamálaráðuneytisins og er til tveggja ára. Verkefnið nær yfir allt starfsvæði Vestfjarðastofu og verkefnastjóri mun vinna með hagaðilum um alla Vestfirði. Markmið verkefnisins eru að samhæfa farsældarþjónustu í sveitarfélögunum á Vestfjörðum og koma á fót svæðisbundnu farsældarráði í landshlutanum.

Húsnæðis og mannvirkjastofnun tekur reglulega saman yfirlit yfir bruna og slys af völdum rafmagns og gefur út í skýrslu.

Skýrslan er ætluð fagmönnum á rafmagnssviði og almenningi til að upplýsa um orsakir bruna og slysa af völdum rafmagns og tjón samfélagsins af þessum völdum. Markmiðið er að koma í veg fyrir bruna og slys af völdum rafmagns eins og kostur er.

Árin 2010-2023 voru 334 rafmagnbrunar skráðir hjá rafmagnsöryggisteymi HMS. Þetta er ekki nema hluti þeirra rafmagnsbruna sem verða því talið er að fjöldi „minni“ bruna sé aldrei tilkynntur eða aðeins tilkynntur til tryggingafélaga.

Fimm dauðsföll eru talin vera af völdum rafmagnsbruna á þessu tímabili, en á tímabilinu 2000-2009 urðu fjögur dauðsföll vegna rafmagnsbruna.

Árin 2010-2023 voru skráð 64 rafmagnsslys hjá HMS. Stofnunin telur að það sé aðeins lítill hluti allra rafmagnsslysa, en gerir ráð fyrir að skráningin nái til flestra alvarlegra slysa.

Í skýrslunni sem nú kemur út eru upplýsingar um bruna og slys sem rafmagnsöryggisteymi HMS tók þátt í að rannsaka eða fékk upplýsingar um á árunum 2010-2023 og ályktanir sem má draga af niðurstöðunum. Í henni er sett fram tölfræði um rafmagnsbruna, svo sem um fjölda og dauðsföll skipt niður á ár, brunastað, uppruna bruna og orsök. Einnig er þar að finna tölfræði um rafmagnsslys, svo sem fjölda skipt niður á ár, tegund slysa, orsök og orsakavald sem og fjölda sjúkradaga og kunnáttusvið slasaðra.

Hafrannsóknastofnun fékk í gær afhendan nýjan fjarstýrðan kafbát í þeim tilgangi að auka möguleika til rannsókna í fjörðum og flóum umhverfis landið og gera þeim betri skil en tæki af þessu tagi hafa verið nefnd djúpkannar til að forðast samanburð við stærri og mannaða kafbáta.

Um er að ræða fjarstýrðan djúpkanna af gerðinni Revolution framleiddan af kanadíska fyrirtækinu Deep Trekker. Djúpkanninn er einn sá tæknilegasti sinnar tegundar hér á landi en hann er sérlega vel útbúin búnaði sem hentar verkefnum stofnunarinnar. Hann er búinn 4K upptökuvél, tveimur laserum og fjórum led ljósum og mun safna myndefni af hafsbotni.

Myndefnið verður notað við ýmsar rannsóknir, til dæmis kortlagningu búsvæða, skráningar á lífríki og botngerð, mat á áhrifum og margt fleira. Griparmur fylgir með sem veitir möguleika á söfnun sýna. Með þessu tæki opnast margir nýir möguleikar sem leiða til aukinnar þekkingar á grunnsævi í kringum landið.

Djúpkanninn er einungis 26 kg á þyngd, kemst á 300 metra dýpi og er knúinn af sex seguldrifnum skrúfum sem ráða við allt að 4 hnúta straum.

Hann gengur fyrir tveimur batteríum og duga í allt að 6 klst en auk þeirra var keyptur búnaður sem beintengir bátinn við aflgjafa á yfirborðinu svo notkunartími takmarkast aðeins af aðstæðum tengdum ytri aflgjafa.

Fiskistofa hefur birt upplýsingar um aflahlutdeild í grásleppu.  Alls fá 262 bátar úthlutað aflahlutdeild.  Krókaaflamarksbátar eru með 61%, bátar á aflamarki 32% og aðrir með 7%.

Samkvæmt lista Fiskistofu fá eftirtaldir aflahlutdeild hærri en 1%.

Samtals er aflahlutdeild þessara 8 báta 10%.

Á svæðinu Breiðafjörður -Vestfirðir eru þetta þeir bátar sem fengu mesta úthlutun en samtals fengu 75 bátar á því svæði úthlutað aflahlutdeild samtals um 20% af heildar úthlutun.

Frédérik Chabanel er franskur maður fæddur 1975. Hann er með fæðingarblett á hálsinum.
Hann kom til Íslands þann 26. júní 1999. Þann 21. júlí fréttist af honum á hótel Ísafirði og 22 ágúst tók hann peninga úr heimabanka í Reykjavík.
Í ágústmánuði 1999 hringdi hann nokkrum sinnum í fjölskyldu sína í Frakklandi. Hann talaði um að honum liði vel á Íslandi, að hann hefði fengið vinnu á fiskibáti eða í byggingarvinnu.
Eftir það hefur ekkert heyrst frá honum, hvorki símtal né bréf. Gerð hefur verið leit að honum á Íslandi en án árangurs. Nafn hans hefur ekki fundist í opinberum gögnum.
Varð hann fyrir slysi? Var hann ef til vill tekinn af lífi? Yfirgaf hann Ísland og lét sig hverfa?
Við biðjum um ykkar hjálp. Frédérik hafði gaman af göngum úti í náttúrunni. Hann hafði einnig ánægju af að hitta og spjalla við Íslendinga á börum. Ef þú manst eftir að hafa hitt hann þætti okkur vænt um að þú hefðir samband og segðir okkur um hvað þið töluðuð. Var hann með einhver plön?
Ræddi hann um einhver lönd sem hann langaði til að heimsækja?
Er kannski einhver ennþá í sambandi við hann?
Í 25 ár hefur fjölskylda hans leitað að honum án árangurs. Samtökin ARPD sem hjálpa við leit á týndu fólki óska eftir aðstoð við að komast að því hvað kom fyrir Frédérik Chabanel.
Ef einhver telur sig hafa upplýsingar sem geta hjálpað, vinsamlegast hafið samband við international@arpd.fr . það má vera á Íslensku,Frönsku,Ensku
Bestu þakkir!
ARPD (Assistance et Recherche de Personnes Disparues)
(Aðstoð og leit að týndum einstaklingum)

Skipulags- og mannvirkjanefnd Ísafjaðarbæjar hefur fengið yfirlýsingu um samþykkti landeiganda við áform um gerð deiliskipulags fyrir gagnaver í Veðrarárdal. Veitt er samþykki fyrir því að unnið verði deiliskipulag og mögulegar aðalskipulagsbreytingar því tengdum.

Erindi frá Birni Davíðssyni f.h. óstofnaðs hlutafélags var lagt fram 12. desember. Þá vildi nefndin fá undirritaða heimild landeigenda þar sem þeir heimila breytingar. Nú liggur það fyrir og leggur skipulags- og mannvirkjanefnd til við bæjarstjórn að heimila Birni Davíðssyni að hefja vinnu við deiliskipulag.