Þrír frambjóðendur af T lista, Strandabandalagsins, þar af tveir sveitarstjórnarmenn, hafa sent inn erindi til sveitarstjórnar og óska eftir lausn frá störfum. Erindi þeirra verður afgreitt á fundi sveitarstjórnar á morgun, þriðjudag.
Þeir eru Sigríður Guðbjörg Jónsdóttir, Óskar Hrafnkell Halldórsson og Þröstur Áskelsson. Þau skipuðu 3. , 5. og 7. sæti framboðslistans. Áður hafa þau sem voru í 2. og 4. sæti listans misst kjörgengi vegna brottflutnings úr sveitarfélaginu.
Vænta má þess að sveitarstjórnin samþykki erindin og þá verða eftir af T lista aðeins fimm af tíu frambjóðendum. T listinn fékk þrjá menn kjörna í kosningunum 2022.
Eftir þessar breytingar verða sveitarstjórnarmenn T lista þau Þorgeir Pálsson, sem var í 1. sæti, Grettir Örn Ásmundsson, sem var í 6. sæti og Júlíana Ágústsdóttir sem skipaði 8. sætið.
Varamenn verða þá þær Þórdís Karlsdóttir og Marta Sigvaldadóttir sem voru í 9. og 10. sæti listans.
