40. landsþing Kvenfélagasambands Íslands (KÍ) verður haldið í Edinborgarhúsinu á Ísafirði dagana 11. – 13. október næstkomandi. Samband vestfirskra kvenna er gestgjafi landsþingsins. Yfirskrift landsþingsins er „Valkyrjur milli fjalls og fjöru”.
Kvenfélagskonur láta sig margvísleg málefni varða einsog sést á dagskrárliðum þingsins.
Þingsetning fer fram 11. október í Ísafjarðarkirkju kl: 18:00 og hafa aðstandendur þingsins; KÍ og Samband vestfirskra kvenna hvatt þingfulltrúa til að mæta sem flestar í þjóðbúning við þingsetninguna þar sem íslenski þjóðbúningurinn verður sérstaklega til umræðu á þinginu.
Að lokinni þingsetningu býður Samband vestfirskra kvenna þingfulltrúum í móttöku í Edinborgarhúsinu sem hefst klukkan 19.30. Móttakan hefst á ávarpi frá bæjarstjóra Ísafjarðarbæjar; Örnu Láru Jónsdóttir. Í móttökunni mun Heilbrigðisstofnun Vestfjarða taka formlega á móti Gjöf til allra kvenna, en tenging er nú að komast við tæknibúnaðinn sem safnað var í tilefni 90 ára afmælis KÍ 2020 við Fæðingadeildina á Ísafirði. Kristín Gréta Bjarnadóttir tekur formlega á móti gjöfinni.
Á vinnustofu á laugardagsmorgun mun meðal annars verða sýning og erindi frá Margréti Skúladóttur formanni í Þjóðbúningafélagi Íslands og félögum hennar í Þjóðbúningafélagi Vestfjarða. En mikill áhugi er nú á íslenska þjóðbúningnum og hefur KÍ lengi hvatt til fræðslu um búninginn og hvatt til notkunar á honum.
Klukkan 14:00 á laugardag verða framsöguerindi samkvæmt yfirskrift þingsins Valkyrjur milli fjalls og fjöru. Eftirfarandi erindi verða flutt:
- Sigríður Ólöf Kristjánsdóttir framkvæmdastjóri Vestfjarðastofu.
- Er byggðaþróun karlamál?
- Anna Jörundsdóttir Dropi
- Lúxuslýsisframleiðsla í Bolungarvík
- Dóra Hlín Gísladóttir – Kerecis
- Nýsköpun á landsbyggðinni – Reynslusaga
- Íris Ösp Heiðrúnardóttir listakona Netagerðinni á Ísafirði.
- YOGER – jógaspil fyrir heimaiðkun
Á vinnustofa á sunnudagsmorgun verða tvö mál til umræðu : hvernig kvenfélögin geta veitt konum af erlendum uppruna stuðning á sínum svæðum og hvað kvenfélögin geta gert til að styðja við fólk á sínum svæðum varðandi Einsemd og einmanaleika.
225 konur af öllu landinu eru nú skráðar á þingið og er það löngu uppselt. Öll kvenfélög á landinu eiga rétt á að senda fulltrúa á landsþingið með atkvæðisrétt en þingið er opið fyrir allar kvenfélagskonur sem hafa þar málfrelsi og tillögurétt.
Kvenfélagasamband Íslands (KÍ) var stofnað árið 1930 sem sameiningar og samstarfsvettvangur kvenfélaganna í landinu. Innan KÍ starfa 135 kvenfélög í 17 héraðs- og svæðasamböndum með um 4000 félaga.
Á landsþingum koma saman allar kynslóðir kvenna frá um 18 ára – 90 ára.
Á undanförnum árum hefur afrakstur vinnu kvenfélaganna, numið tugi milljóna á ári hverju, sem runnið hefur til hinna ýmsu menningar- og líknarmála auk annarra samfélagsverkefna. Í skýrslu stjórnar KÍ til þingsins kemur fram að kvenfélög innan KÍ hafa gefið 165.017.547 kr. alls til samfélagsins á árunum 2021 – 2023.
Landsþing KÍ er æðsta vald sambandsins og er haldið á 3ja ára fresti, var síðast haldið í Borgarnesi 2021.
