Heimastjórn Arnarfjarðar hefur sent bæjarráði Vesturbyggðar bókun sína um aðflugsljós á Bíldudal og nauðsyn þess að þau verði sett upp sem fyrst.
Þar segir að heimastjórn Arnarfjarðar leggi mikla áherslu á að aðflugsljós við Bíldudalsflugvöll verði í forgangi við vinnu við samgönguáætlun vegna mikilvægis flugvallarins sem sjúkraflugvallar og sem samgönguleiðar inn á sunnanverða Vestfirði.
„Heimastjórn Arnarfjarðar hvetur bæjarstjórn Vesturbyggðar til að leggja áherslu á að aðflugsljós við flugvöllinn á Bíldudal verði sett upp sem allra fyrst til að auka öryggi í aðflugi að flugvellinum og tryggja að hægt sé að lenda á flugvellinum allan sólarhringinn. Sjúkraflug á Bíldudal jafngildir sjúkrabíl til að koma sjúklingum sem fyrst undir læknishendur í Reykjavík.
Brýnt er að koma uppsetningu aðflugsljósa inn í fyrsta hluta samgönguáætlunar og í forgangsröðun í
framkvæmdaáætlun Isavia sem ber ábyrgð á innanlandsflugi. Jafnframt verði að tryggja að stöðugar endurbætur á flugleiðsögn og tækninýjungar þar að lútandi skili sér í uppbyggingu og viðhaldi á aðstöðunni á Bíldudalsflugvelli til að tryggja öryggi sjúkraflugs og farþegaflugs.“
Heimastjórnin segir í ályktun sinni að Bíldudalsflugvöllur sé skilgreindur sem flugvöllur í grunnneti samgangna og gegni veigamiklu hlutverki í samgöngum á Vestfjörðum. Fjórðungsþing Vestfirðinga hafi ítrekað ályktað um nauðsyn þess að flugöryggi sé tryggt á Vestfjörðum með sérstakri áherslu á flugleiðsögn og gervihnattarflugleiðsögn á vestari hluta landsins og að þeirri uppbyggingu beri að flýta sem mest.
