Elías Jónatansson, forstjóri Orkubús Vestfjarða og Hörður Arnarson, forstjóri Landsvirkjunar, undirrituðu í dag samning um sölu á forgangsorku til fjarvarmaveitna á Vestfjörðum næstu fjögur árin. Þannig verður hægt að reka fjarvarmaveiturnar án þess að reiða sig á olíu sem varaafl þegar afhending raforku er skert. Í nýjum samningi eru heimildir til skerðinga en þær eru takmarkaðar við fjóra daga en ekki 120 líkt og í eldri samningi.
Fjarvarmaveitur hafa hingað til keypt skerðanlega orku sem er seld á töluvert lægra verði en forgangsorka, enda er hún aðeins í boði í góðum vatnsárum. Samningurinn tryggir fyrirsjáanleika í rekstri fjarvarmaveitna á Vestfjörðum með tryggri raforkuafhendingu næstu fjögur árin segir í tilkynningu Landsvirkjunar um samninginn.
Jarðhita hefur lengi verið leitað í grennd við Ísafjörð og í sumar fannst 58 gráða heitt vatn í Tungudal.
Samningnum er ætlað að brúa bilið á meðan Orkubú Vestfjarða þróar veiturnar þannig að þær geti nýtt þann jarðhita og bætt raforkunýtingu með varmadælum.
Orkubúið hefur skoðað framtíðarrekstur fjarvarmaveitna á Vestfjörðum og komist að þeirri niðurstöðu að þessi blandaða leið jarðvarmanýtingar og varmadælna henti best. Umbreytingin sem fram undan er dregur þannig úr þörf fyrir raforku og tryggir rekstur veitnanna til lengri tíma.
Elías Jónatansson, forstjóri OV sagði í samtali við Bæjarins besta að samningurinn myndi spara fyrirtækinu hundruð milljóna á ári miðað við að þynda með því að brenna olíu eins og verið hefur reyndin síðustu ár. Í vetur var raforkuskerðingin í samtals 104 sólarhringa en samkvæmt nýja samningnum verður hámarkið 4 sólarhringar.
Elias sagði að ætlunin væri að eftir 4 ár væri fjarvarmaveiturnar á Ísafirði og ef til vill Patreksfirði komnar með jarðhita. Þessi samningur væri millileikur til fjögurra ára.
Hörður Arnarson, forstjóri Landsvirkjunar:
„Það er ákaflega ánægjulegt að hafa náð þessu mikilvæga samkomulagi við Orkubú Vestfjarða. Orkubúið hefur metnaðarfull áform um þróun fjarvarmaveitnanna í átt að kolefnishlutleysi og Landsvirkjun styður þá framtíðarsýn. Það er von okkar að þessi samningur marki upphaf fullra orkuskipta fjarvarmaveitna um allt land.“
