![Samgongusattmali2024_01](https://www.bb.is/wp-content/uploads/2024/08/Samgongusattmali2024_01-696x464.jpg)
Eigendur Betri samgangna ohf undirrituðu í gær samkomulag um 311 miljarða króna framkvæmdir við samgöngumannvirkki á höfuðborgarsvæðinu á næstu 16 árum fram til 2040. Á næstu 5 árum verður framkvæmt fyrir 80 milljarða króna. Um helmingur þess fer í svokallaða Borgarlínu einkum í leiðina Ártún – Hlemmur – Hamraborg. Ríkið leggur til 87,5% af frramkvæmdakostnaði en sveitarfélögin 12,5%.
Gert er ráð fyrir að afla með flýti- og umferðargjöldum á umferðina 143 milljörðum króna. Ekki er gert ráð fyrir þeim gjöldum fyrr en árið 2030.
Auk þess er fyrirhugað að ríkið taki þátt í rekstri almenningssamganga , þ.e. Strætó og greiði um þriðjunginn af kostnaðinum.
Í tilkynningu frá stjórnarráðinu segir að styttri ferðatími, minni tafir, aukið umferðaröryggi, áhersla á að draga úr kolefnisspori, stórbættar almenningssamgöngur, fjölgun hjóla- og göngustíga og uppbygging stofnvega séu kjarninn í uppfærðum samgöngusáttmála höfuðborgarsvæðisins.
„Markmiðið er að samgöngur á höfuðborgarsvæðinu verði í fremstu röð þannig að svæðið og Ísland allt sé samkeppnishæft um bæði fólk og fyrirtæki.“
![](https://www.bb.is/wp-content/uploads/2024/08/samgongu_24-1024x348.png)
![](https://www.bb.is/wp-content/uploads/2024/08/samgongusattmali24-1024x516.jpg)