Síðastliðinn föstudag vísiteraði biskup Íslands, frú Agnes M. Sigurðardóttir, Hrafnseyri. Með í för voru sr. Hildur Inga Rúnarsdóttir, prestur á Þingeyri og sr. Magnús Erlingsson, prófastur Vestfjarðaprófastsdæmis ásamt Elínu Elísabetu Jóhannsdóttur, fræðslustjóra Þjóðkirkjunnar. Ingi Björn Guðnason, staðarhaldari á Hrafnseyri tók á móti biskupi og fylgdarliði ásamt Hreini Þórðarsyni, bónda á Auðkúlu og formanni sóknarnefndar Hrafnseyrarsóknar.
Ingi Björn segir í færslu á facebook um heimsóknina að það hafi verið ánægjulegt að taka á mót frú Agnesi sem er þessa dagana að ljúka síðustu embættisverkum sínum áður en nýr biskup tekur við 1. september.
Hrafnseyri er forn kirkjustaður og má ætla að kirkja hafi verið byggða á staðnum á 11. öld. Tóftir miðaldakirkjunnar og kirkjugarðsins eru vel sýnilegar friðlýstar fornminjar sem standa sunnan við núverandi kirkju sem reist var árið 1886. Einnig er á staðnum kapella sem er hluti af aðalbyggingu staðarins. Oftast nær er messað tvisvar á ári á Hrafnseyri, í kapellunni á 17. júní og í kirkjunni síðsumars.
