Páskahátíðin er sannkölluð listahátíð í Ísafjarðarbæ. Rokk og ról á Ísafirði og í Kómedíuleikhúsinu í Haukadal í Dýrafirði verða haldnir sérstakir leikhúspáskar. Sýndar verða tvær vinsælar sýningar. Hefst leikhúsgleðin á skírdag fimmtudaginn 28. apríl kl. 17.00 með sýningu á hinni vinsælu leik- og söngskemmtun Lífið er lotterí. Hér er á ferðinni skemmtun þar sem listaskáldinu Jónasi Árnasyni eru gerð skil í tónum, söng og tali. Það eru þau Dagný Hermannsdóttir og Guðmundur Hjaltason er flytja söngtexta Jónasar mörg hver við lög hans bróður Jóns Múla. Elfar Logi stígur einnig á stokk og segir frá skáldinu Jónasi, sko Árnasyni. Lífið er lotterí var frumsýnt síðasta haust í Kómedíuleikhúsinu og hefur fengið afar góðar viðtökur enda er hér á ferðinni ósvikin skemmtan þar sem allir geta tekið undir og þá ekki bara í viðlaginu. Lífið er sannarlega lotterí í Haukadal í Dýrafirði á páskum.
Á hinum langa föstudegi 29. apríl verður svo á fjölum Kómedíuleikhússins í Haukadal vinsælasta ævintýri allra tíma Dimmalimm eftir Bílddælinginn Mugg. Dimmalimm er einstaklega falleg og ævintýraleg brúðusýning sem hefur notið fádæma vinsælda og verið sýnd um land allt í mörg, mörg ár.
Miðasala á báðar sýningarnar er í síma 891 7025. Einnig er hægt að kaupa miða á midix.is
