Strandagangan fer fram á skíðasvæði Skíðafélags Strandamanna í Selárdal á Steingrímsfirði, laugardaginn 9. mars 2024.
Strandagangan er almenningsganga fyrir fólk á öllum aldri, jafnt byrjendur sem lengra komna og er hluti af Íslandsgöngumótaröð SKÍ.
Þetta er 30. árið í röð sem gangan er haldin en fyrsta Strandagangan var haldin árið 1995.
Sunnudaginn 10. mars heldur fjörið áfram með leikjadegi fyrir börn og unglinga, skíðaferð með Rósa og skíðaskotfimimóti.
Skíðaskotfimi er íþrótt sem blandar saman skíðagöngu og skotfimi og er sívaxandi áhugi á þessu nýja skíðasporti á Íslandi.
Gengnir eru 3 x 2,5 km hringir og skotið tvisvar á skotmörk með skíðaskotfimirifflum, fyrst liggjandi og síðan í standandi stöðu. Yngri þátttakendur munu þó ganga styttri vegalengd. Á skotsvæðunum er skotið fimm skotum í senn en fyrir hvert feilskot þarf að fara einn refsihring. Refsihringur er stuttur hringur til hliðar við brautina.
Sá keppandi sigrar sem lýkur keppni með stystan heildartíma.
Aldursflokkar í karla- og kvennaflokki:
- 11-15 ára laser rifflar
- 16-35 ára .22 kalibera rifflar
- 36 ára og eldri .22 kalibera rifflar
Mótið er samstarfsverkefni Skíðasambands Íslands og Skíðafélags Strandamanna til kynningar á íþróttinni.
