Bæjarráð Ísafjarðarbæjar ályktaði á mánudaginn um ástand farsíma- og tetrakerfanna á þjóðvegum
Vestfjarða í framhaldi af áskorun sameinuðu almannavarnanefndar Ísafjarðarbæjar og Súðavíkurhrepps.
Almannavarnanefndin segir í sinni ályktun að hún skori á stjórnvöld að skilgreina farsímakerfi og tetrakerfi sem mikilvægt öryggiskerfi fyrir almannavarnir á landinu. Á þjóðvegum og helstu stofnbrautum Vestfjarða sé kerfið alls ekki nógu þétt sem skapi hættu við slys og óhöpp og komi í veg fyrir að almannavarnir á svæðinu geti starfað með fullnægjandi hætti.
Bæjarráð tók undir bókun sameinaðrar almannavarnarnefndar um að efla þurfi enn frekar farsímakerfi og tetrakerfi á þjóðvegum á Vestfjörðum. Síðan segir: „Þó samanlögð reiknuð útbreiðslusvæði símafyrirtækjanna bendi til að sambandið sé stöðugt sýna vegamælingar á raunútbreiðslu farsímasambands marga skugga á aðalsamgönguæðum, svo sem í Seyðisfirði, Hestfirði, Skötufirði, Ísafirði, Staðardal í Steingrímsfirði, Vattarfirði, Kjálkafirði, Dynjandisheiði og Patreksfirði. Þetta hefur hamlandi áhrif á störf viðbragðsaðila, minnkar öryggi og skapar hættu við slys og óhöpp. Þá eru ótalin óþægindi af því að vera ótengdur í æ nettengdari heimi.“
