Í gær voru fjörutíu ár liðin síðan TF-RAN, þyrla Landhelgisgæslunnar, fórst í Jökulfjörðum með allri áhöfn. Slysið varð skömmu eftir flugtak þyrlunnar frá varðskipinu Óðni undan Kvíum á Jökulfjörðum að kvöldi 8. nóvember 1983.
Þyrlusveit Landhelgisgæslunnar fór í sérstakt flug vestur í Jökulfirði gær þar sem þeirra sem fórust í þessu hörmulega slysi var minnst.
![](https://www.bb.is/wp-content/uploads/2023/11/lhg-1024x827.jpg)
Í áhöfn þyrlunnar voru flugstjórarnir Björn Jónsson og Þórhallur Karlsson auk Sigurjóns Inga Sigurjónssonar stýrimanns og Bjarna Jóhannessonar flugvélstjóra.
![01.-Bjarni-Johannsson-fluv.-og-Bjorn-Jonsson-flugm.-Thingeyri-1977](https://www.lhg.is/media/uncategorized/large/01.-bjarni-johannsson-fluv.-og-bjorn-jonsson-flugm.-thingeyri-1977.jpg)
Bjarni Jóhannsson, flugvélstjóri, og Björn Jónsson, flugstjóri.
![10-Thorhallur-Karlsson-flugstj.-i-flugi](https://www.lhg.is/media/uncategorized/10-thorhallur-karlsson-flugstj.-i-flugi.jpg)
Þórhallur Karlsson, flugstjóri.
![Sigurjon-Ingi-Sigurjonsson](https://www.lhg.is/media/uncategorized/sigurjon-ingi-sigurjonsson.jpg)
Sigurjón Ingi Sigurjónsson, stýrimaður.
TF-RAN, kom í flugflota Landhelgisgæslunnar árið 1980. Þyrlan var sérhönnuð til leitar-, björgunar-, löggæslu- og eftirlitsstarfa. Hún var af gerðinni Sikorsky S-76 og fékk kallnúmerið TF-RAN.