Þann 2 september sl. var sambandsfundur vestfirskra kvenna haldinn í Félagsheimilinu í Hnífsdal. Kvenfélagið Hvöt var boðsfélag fundarins.
17 konur sátu fundinn frá 6 kvenfélögum á Vestfjörðum, þar sem slæmt veður hafði áhrif á mætingu.
Hefðbundin fundarstörf fóru fram og lögð voru drög að undirbúningi að landsþingi Kvenfélagsambands Íslands sem haldið verður á Ísafirði í október 2024.
Kvenfélagskonur í Hvöt buðu konum í heimsókn í Tónlistarskóla Ísafjarðar þar sem Albert Eiríksson og Bjarney Ingibjörg Gunnlaugsdóttir tóku á móti gestum og fóru yfir sögu Húsmæðraskólans og Tónlistarskólans. Að lokinni sögustund var boðið upp á hádegisverð á kennarastofu skólans og sá Albert Eiríksson um veitingarnar.
Að loknum fundi var boðið til hátíðarkvöldverðar, þar sem kvenfélagskonur elduðu dýrindis fiskisúpu og í eftirrétt var boðið upp á guðdómlegt gums.
Dagurinn heppnaðist vel og fara kvenfélagskonur fullar af orku inn í nýtt starfsár þar sem hefðbundið starf fer fram ásamt undirbúningi fyrir landsþing 2024 segir í frétt kvenfélagsins Hvatar um fundinn.
Hraðfrystihúsinu Gunnvör, Þresti Marzellíusar ehf, Örnu mjólkurvörum og Kampa ehf var sérstaklega þakkað fyrir góðan stuðning.
Bæjarráð Ísafjarðarbæjar hafnaði beiðni kvenfélagsins Hvöt í Hnífsdal um styrk til þess að halda hátíðarkvöldverð á Sambandsfundi Vestfirskra kvenna en tíðkast hefur að styrkja kvöldverðinn.
