Niðurstöður liggja fyrir frá sameiginlegum uppsjávarleiðangri Íslendinga, Færeyinga, Norðmanna og Dana sem farinn var á tímabilinu 1. júlí til 3. ágúst 2023. Þetta kemur fram í frétt Hafrannsóknastofnunar frá í morgun.
Meginmarkmið þessa árlega leiðangurs var að meta magn uppsjávarfiska í Norðaustur-Atlantshafi að sumarlagi en jafnframt að rannsaka vistkerfi og umhverfi sjávar. Leiðangurssvæðið var 2,4 milljón ferkílómetrar sem er 19% minna en síðasta ár þar sem ekki var farið inn í Grænlenska landhelgi og einungis suður að 62°N breiddargráðu í Íslandsdjúpi.
Vísitala lífmassa makríls var metin 4,30 milljón tonn sem er 42% lækkun frá árinu 2022 og er minnsti lífmassi sem mælst hefur síðan 2007.
Vísitalan í ár er tæplega 40% lægri en langtímameðaltal gagnaseríunnar (7,1 milljónir tonna). Byggir vísitalan á afla í alls 218 stöðluðum yfirborðstogum á fyrirfram ákveðnum stöðvum. Engar togstöðvar voru með einstaklega mikinn afla líkt og sumarið 2022, og óvissumörk í kringum matið því mun minni í ár.
Útbreiðsla makríls við Ísland í ár var minni en síðasta ár.
Mesti þéttleikinn var fyrir sunnan land og var hann að finna bæði yfir landgrunninu og við landgrunnsbrúnina.
Lítið mældist af makríl fyrir vestan land samanborið við 2022. Um 10,3% af heildarlífmassa makríls mældist í íslenskri landhelgi samanborið við 18,9% síðasta ár. Líkt og undanfarin ár var meiri hluti stofnsins í Noregshafi og þá sérstaklega norðaustan til.
Niðurstöður leiðangursins fyrir makríl voru kynntar innan stofnmatsvinnunefndar Alþjóðahafrannsóknaráðsins (ICES) í gær.
Þær eru, ásamt öðrum gögnum, notaðar við mat á stofnstærð makríls en ICES mun birta ráðgjöf um aflamark næsta árs fyrir makríl, norsk-íslenska síld og kolmunna þann 29. september.
