Í Stjórnartíðindum hefur verið birt breyting á reglugerð um hrognkelsaveiðar árið 2023.
Með henni verður heimilt að stunda veiðar í innanverðum Breiðafirði til og með 31. ágúst.
Áður hafa verið gerðar þrjár breytingar á upphaflegri reglugerð. Dögum var fjölgað úr 25 í 35 og síðar í 45.
Jafnframt var veiðitímabil lengt. Í stað þess að lokadagur væri 30. júní var ákveðið að hann verði 12. ágúst á öllum svæðum.
Alls hafa grásleppubátar nú veitt 3.610 tonn, en á sama tíma í fyrra var veiðin 4.121 tonn. Landssamband smábátaeigenda áætlar að verð hafi hækkað um 40% frá í fyrra.
Þrátt fyrir að vertíðin hafi verið lengd er ólíklegt að takist að veiða leyfilegt magn 4.411 tonn.
