Nú er að koma að því. Hin árlega Sturluhátíð, sem kennd er við sagnaritarann mikla, Sturlu Þórðarsonar, verður haldinn 15. júlí nk. Hátíðin hefst kl. 13 að Staðarhóli í Saurbæ í Dölum, bæ Sturlu Þorðarsonar, með því að við afhjúpum söguskilti sem Sturlufélagið hefur látið gera. Mjög hefur verið vandað til þessarar framkvæmdar. Sérfrótt fólk hefur ritað texta á skiltin og eru þeir bæði á íslensku og ensku. Listamenn myndskreyttu, myndirnar unnar af mikilli kúnst og var þess gætt að útlitið væri í samræmi við söguskilti sem sett hafa verið upp á þekktum sögustöðum í Dalasýslu.
Að lokinni afhjúpun skiltanna verður farið í stutta sögugöngu með sérfróðu leiðsögufólki um Staðarhólinn. Þar verður í senn sagt frá fornleifauppgreftri sem þar hefur staðið yfir og varpað ljósi á sögu þessa merka staðar.
Hátíðinni verður síðan fram haldið á Hótel Laugum í Sælingsdal kl. 15 með eftirfarandi dagskrá:
- Einar K. Guðfinnsson formaður Sturlufélagsins, setur hátíðina.
- Ármann Jakobsson, prófessor: Hverjum augum leit Sturla Þórðarson, vígið á Snorra Sturlusyni?
- Vilborg Davíðsdóttir, rithöfundur: Völvur og væringjar
- Torfi Tulinius prófessor: Sturla og sálin. Sýn Sturlu á mannssálina eins og hún birtist í verkum hans.
Soffía Meldal ung söngkona úr Dölunum, flytur löng á milli dagskráratriða.
Aðgangur að hátíðinni er ókeypis og einnig býður Sturlufélagið upp á kaffiveitingar að vanda.
Það er ástæða til að hvetja sem flesta til að koma. Í fyrra var metaðsókn að hátíðinni og mættu um 140 manns. Sturlunga og ævi og verk Sturlu Þórarsonar sagnaritara, eins helsta höfðingja og geranda á Sturlungaöldinni, lifir nefnilega í hugum ótrúlega margra nútímamanna.
Sturlungaöldin er einstæður tími í sögu okkar. Í senn tími ófriðar og mannskæðra bardaga sem ekki verður jafnað til neins annars í sögu okkar. En Sturlungaöldin var líka tími óviðjananlegra sagna og bókmennta og nægir í því sambandi að nefna afrek þeirra frændanna Snorra Sturlusonar og Sturlu Þórðarsonar.
Við í Sturlunefndinni bjóðum ykkur öll velkomin og hlökkum til að sjá ykkur sem flest laugardaginn 15. júlí á Staðarhóli, Saurbæ í Dölum og á Laugum á Sælingsdal.
![](https://www.bb.is/wp-content/uploads/2023/07/EinarKGudfinnsson-681x1024173-1.jpg)
Einar K. Guðfinnsson, formaður stjórnar Sturlufélagsins.
![](https://www.bb.is/wp-content/uploads/2023/07/sturluhatid_EKG-1024x768.jpg)