Föstudaginn 25. nóvember verður Sandra Borg Bjarnadóttir með erindið „Hvað er listmeðferð?“ í Vísindaporti.
Sandra Borg ætlar að bjóða upp á afslappaða vinnustofu um listmeðferð. Farið verður yfir hvað listmeðferð er og hvernig meðferðin virkar. Þátttakendur fá tækifæri til að kynnast aðferðum listmeðferðar í gegnum skapandi vinnu og þannig öðlast betri skilning á meðferðinni.
Sandra Borg Bjarnadóttir starfar í geðheilbrigðisteymi Heilbrigðisstofnunar Vestfjarða. Sandra lauk meistaragráðu í listmeðferð frá Háskólanum í Derby í Bretlandi árið 2022 og hefur bætt við sig námi í skynhreyfi-listmeðferð (e. sensory-motor art therapy, en þar er lögð áhersla á að tengja við og vinna með líkamsvitundina.
Vísindaportið er opið öllum og hefst stundvíslega klukkan 12:10 í kaffistofu Háskólaseturs Vestfjarða á 2. hæð. Erindið fer fram á íslensku.
