Eftir að skólaárinu lauk brugðu kennarar Tónlistarskólans á Ísafirði sér til Ungverjalands til þess m.a. að kynna sér aðferðir og nýja strauma í sínu fagi. Bea Joó píanókennari er frá Szeged í Ungverjalandi og hún skipulagði ferðina. Nýtti hún sér m.a. góð tengsl sín í Tónlistarskólanum í Szeged til að koma á kynningum á forskólakennslu, byrjendakennslu í hljóðfæranámi og tónfræðikennslu.
Á vefsíðu Tónlistarskólans segir að það hafi verið „einstaklega ánægjulegt að sitja þessar kynningar, öll kennsla er eins og leikur og í fullkomnu flæði, þannig að aldrei er gefinn kostur á að beina athyglinni annað. Nemendur eru vel þjálfaðir í að standa og sitja eins og fullorðið fólk. Forskólabörnin komu meira að segja í sparifötunum og höfðu meðal annars undirbúið að syngja fyrir okkur Fann ég á fjalli (Óskasteinar) á íslensku, en lagið er raunar ungverskt þjóðlag.“
Að loknum heimsóknum í Tónlistarskólann í Szeged hélt hópurinn til Búdapest og brá sér á tónleika í stórglæsilegum sal Franz Liszt akademíunnar, en þar var Sálumessa Mozarts á dagskrá í mikilfenglegum flutningi.
Tengill á frásögn af ferðinni https://tonis.is/frettir/endurmenntunarferd-til-budapest-og-szeged/?fbclid=IwAR1_n6nvxrTg9PBTvgBbgW8SJ-YJvFP6LOd1bJaAPezzYMPdILKXvXn9D5I.
Myndir: Tónlistarfélag Ísafjarðar.
