![hafstraumar](https://www.bb.is/wp-content/uploads/2022/03/hafstraumar.png)
Á vef Hafrannsóknastofnunar er sagt frá grein sem birtist nýlega í „Journal of Geophysical Research: Oceans”, um Norður Íslands Irmingerstrauminn. Einn af höfundum greinarinnar er Steingrímur Jónsson, sérfræðingur á Umhverfissviði Hafrannsóknastofnunar og prófessor við Háskólann á Akureyri.
Greinin fjallar um þann hluta hlýja og selturíka Atlantssjávarins sem flæðir norður um Grænlandssund og norður fyrir land og streymir þar til austurs yfir landgrunninu.
Straumurinn flytur með sér varma, salt og næringarefni inn á landgrunnið norðanlands og skiptir því miklu máli fyrir lífríkið en einnig fyrir veðurfar á svæðinu sem verður hlýrra fyrir vikið.
Margvísleg ný gögn voru notuð til að kanna feril straumsins og hvernig eiginleikar hans breytast á leiðinni. Hitastig og selta ásamt straumhraða voru mæld á sniðum með meiri upplausn en áður hefur verið gert og dekkuðu þau allan feril straumsins. Magn sjávar sem flyst með straumnum var metið og sýnt fram á að það minnkaði eftir því sem austar dregur. Sjórinn kólnar og seltan lækkar á leið straumsins austur eftir landgrunninu. Sjórinn breytist aðallega vegna blöndunar við umlykjandi sjó en í minna mæli vegna varmaflæðis milli sjávar og andrúmslofts.