Viðburðarrík helgi er nú að baki í körfuboltanum hjá Vestra en leiknir voru níu útileikir á höfuðborgarsvæðinu frá föstudegi til sunnudags; einn unglingaflokksleikur, fjórir leikir í 9. flokki drengja og fjórir leikir í minnibolta eldri stúlkna. Fór svo að allir leikirnir unnust og er því Vestri karfa með fullt hús stiga eftir þessa annasömu helgi. Allir hóparnir þrír hafa í vetur æft undir stjórn Yngva Páls Gunnlaugssonar, yfirþjálfara körfuknattleiksdeildar Vestra.
Unglingaflokkur karla lék sinn síðasta leik á tímabilinu gegn Stjörnunni í Ásgarði á föstudagskvöld og hafði sigur í framlengdum leik, 72-64. Liðið lék í 2. deild í vetur og hafnaði í 5. sæti.
Bikarmeistarar 9. flokks drengja spiluðu síðan fjóra leiki í síðustu umferð Íslandsmótsins í B-riðli, en mótið fór fram hjá ÍR-ingum í Hertz hellinum fræga. Þar mættu þeir heimamönnum ásamt Þór Akureyri, Keflavík og sameiginlegu liði Borgnesinga og Reykdæla. Drengirnir sigruðu alla sína leiki með verulegum yfirburðum. Þeir eru því komnir upp í A-riðil á ný, ásamt fjórum bestu liðum landsins í þeirra aldurshópi.
Stelpurnar í minnibolta eldri, 10-11 ára, tóku þátt í fimmta og síðasta Íslandsmóti vetrarins í þeirra aldurshópi en mótið fór fram hjá Fjölni í Dalhúsum í Grafarvogi. Uppskar liðið sigur í öllum sínum leikjum en þær léku í C-riðli mótsins. Þær hefja því leik í B-riðli á næstu leiktíð.
