Við gleymum stundum að nýta það sem er okkur næst. Það er ýmislegt sem við getum nýtt úr fjörunni. Þessar uppskriftir fann ég á sínum tíma á vef Reykhóla. Gaman líka að gera að fjölskylduferð að sækja í snakkið og matinn.
Þangsnakk
Takið 300 g nýfengið bóluþang og krydd að eigin vali. Skolið þangið vel og hreinsið burtu ásætur (snigla og slíkt). Klippið þangið í bita, t.d. 3×3 cm. Dreifið kryddinu yfir og setjið á bökunarplötu og álpappír undir. Bakið í 30-40 mín við 130°C eða þar til þangið er orðið stökkt.
Súpa með maríusvuntu
5 dl vatn
2 saxaðar gulrætur
2 stórar maríusvuntur
2 dl kjúklingabitar
4 msk sojasósa
svartur pipar úr kvörn
Skolið svunturnar úr fersku vatni, skerið kjúklinginn og svunturnar í ferkantaða bita, látið suðuna koma upp á vatninu og setjið gulrætur, svuntur og kjúkling út í. Látið sjóða í um 5 mínútur þar til allt er orðið meyrt. Kryddið með sojasósu og pipar.
Verði ykkur að góðu.
