Í kjölfar snjólflóðsins á Flateyri í janúar síðastliðnum lagði sérstök verkefnisstjórn nokkurra ráðuneyta undir forystu forsætisráðneytisins meðal annars til að að veitt verði
stofnframlag úr ríkissjóði vegna nemendagarða Lýðskólans á Flateyri, allt að 6 milljónir gegn sambærilegu framlagi frá Ísafjarðarbæ. Ætlunin er að nota féð til endurbóta á húsnæði nemendagarðanna sem er að Eyrarvegi 8, Flateyri.
Stjórn nemendagarðanna hefur nú sent erindi til bæjarráðs Ísafjarðarbæjar og þar kemur fram að málið er í vinnslu hjá Húsnæðis- og mannvirkjastofnun (HMS) og er svara um framkvæmd þessa að vænta á næstu dögum.
Minnt er á að afgreiðsla á stofnframlagi HMS er háð því að til komi sambærilegt framlag frá Ísafjarðarbæ og óskað eftir því að bæjarráð Ísafjarðarbæjar taki málið til efnislegrar umfjöllunar og afgreiðslu á fundi sínum sem allra fyrst.
Bæjarráðið tók erindið fyrir í síðustu viku og samþykkti að fá stjórn nemendagarðanna til fundar.
Bæjarstjórn Ísafjarðarbæjar samþykkti á fundi sínum í síðasta mánuði að styðja við byggingu nemendagarða við Lýðskólann á Flateyri með því að fella niður gatnagerðargjöld og einnig með því að innheimta ekki gjald fyrir vinnuframlag fulltrúa bæjarins í byggingarnefnd nemendagarðanna.
