Lögreglan á Vestfjörðum kærði sjö ökumenn í síðustu viku fyrir að aka yfir leyfilegum hámarkshraða. Flestir þessara ökumanna voru í akstri í Strandasýslu, en einnig í Ísafjarðardjúpi, í Bolungarvíkurgöngum og á Ísafirði. Í yfirliti um verkefni vikunnar kemur fram að lögreglan hafði afskipti af fjórum ökumönnum sem ekki voru með ökuréttindi í lagi. Einn þessara ökumanna hafði verið sviptur ökuréttindum en ók þrátt fyrir það. Þungar refsingar eru við slíku broti. Hinir voru með útrunnin ökuréttindi. Þessir ökumenn voru stöðvaðir í Strandasýslu í Ísafjarðarbæ og í Vesturbyggð.
Tilkynnt var um eitt vinnuslys í vikunni, en það gerðist á vinnustað einum í Vesturbyggð. Hættulegur vökvi lenti í andliti starfsmanns þar. Maðurinn var fluttur á heilbrigðisstofnunina á Patreksfirði til aðhlynningar. Rannsókn á tildrögum slyssins er í höndum lögreglunnar á Vestfjörðum og Vinnueftirlitsins.
Þá voru tveir ökumenn sektaðir fyrir að vera ekki með öryggisbelti spennt. Báðir voru þessir ökumenn í akstri í Vesturbyggð. Lögreglan á Vestfjörðum vill minna á mikilvægi þess að nota þennan öryggisbúnað og eins að ökumenn noti ekki GSM síma við akstur, ekki nema þá að nota handfrjálsan búnað. Þessum mikilvægu þáttum ætlar lögreglan á Vestfjörðum að gefa sérstakan gaum næstu daga, vikur og mánuði
Eins og komið hefur fram í fjölmiðlum féll snjóflóð í botni Súgandafjarðar í síðustu viku. Fjórir fjallaskíðamenn voru þar á ferð. Þrír þeirra urðu fyrir flóðinu en komust sjálfir út úr því og hlutu ekki alvarlega áverka, utan einn var fluttur á sjúkrahús og mun hafa meiðst á fæti. Snjóflóðahætta er ekki í byggð á Vestfjörðum en hins vegar er hún talin töluverð til fjalla, utan byggðar. Lögreglan hvetur útivistarfólk til að gæta varúðar og fylgjast með spám á vefsíðu Veðurstofu Íslands.
smari@bb.is
