Í ár standa yfir umfangsmiklar endurbætur á ratsjárkerfum Atlantshafsbandalagsins hér á landi.
Á ratsjár- og fjarskiptastöðvunum á Miðnesheiði, Bolafjalli, Gunnólfsvíkurfjalli og Stokksnesi eru langdrægar þrívíddar ratsjár sem notaðar eru fyrir loftrýmisgæslu og loftrýmiseftirlit Atlantshafsbandalagsins en hluti kerfisins einnig nýttur af Isavia fyrir almenna flugleiðsögu og flugöryggi.
Verkefnið hófst á Miðnesheiði í febrúar og heldur áfram á Stokksnesi í vikunni.
Meðan verið er að breyta ratsjánum er notast við færanlega ratsjá sem kanadíski flugherinn kom með til landsins í febrúar.
Kanadíska ratsjáin hefur nú verið flutt á Stokksnes og sett þar upp og síðan kemur röðin að Gunnólfsvíkurfjalli og Bolafjalli
Með búnaðinum fylgja 24 sérfræðingar frá kanadíska flughernum. Færanlega ratsjárkerfið er hér í þeim tilgangi að tryggja órofinn rekstur og eftirlit með loftrýminu yfir og við Ísland.
