Covid.is, upplýsingasíða landlæknis og almannavarnadeild ríkislögreglustjóra, hefur nú verið þýdd yfir á átta tungumál til að tryggja betra aðgengi að upplýsingum og leiðbeiningum varðandi COVID-19 faraldurinn fyrir innflytjendur sem tala ekki íslensku, en þeir eru um 12,5% af þjóðinni.
Upplýsingarnar eru nú aðgengilegar á pólsku, ensku, arabísku, persnesku, kúrdísku, spænsku, litháensku og tælensku. Félagsmálaráðuneytið sá um allar þýðingar fyrir utan ensku og pólsku.
Á síðunni má nálgast helstu upplýsingar varðandi aðgerðir stjórnvalda, forvarnir, samkomubann, leiðbeiningar um sóttkví, einangrun og fyrir einstaklinga með áhættuþætti fyrir alvarlegri sýkingu kórónuveirunnar.
Þýðingar hafa íslensk yfirheiti þannig að starfsmenn í heilbrigðisþjónustu og félagsþjónustu geta auðveldlega leiðbeint einstaklingum sem tala ekki íslensku á viðeigandi upplýsingar á þeirra móðurmáli.
Við erum öll almannavarnir og eigum að benda einstaklingum sem tala ekki íslensku á upplýsingar sem finna má á covid.is
