Katrín Jakobsdóttir, forsætisráðherra, hefur í samstarfi við Jafnréttisráð boðað til jafnréttisþings undir yfirskriftinni Jafnrétti í breyttum heimi. Þingið verður haldið í Hörpu þann 20. febrúar 2020.
Hlutverk Jafnréttisþings er að efna til umræðna um jafnréttismál milli stjórnvalda og almennings og gefa áhugasömum kost á að hafa áhrif á stefnumótun málaflokksins. Á þinginu verður fjallað um samspil jafnréttis- og umhverfismála í tengslum við Heimsmarkmið Sameinuðu þjóðanna um sjálfbæra þróun. Sérstaklega verður litið til framtíðaráskorana hvað varðar tæknibreytingar, loftslagsbreytingar og nýja atvinnu- og lifnaðarhætti og velt upp hvaða áhrif þessir þættir kunna að hafa á stöðu kynjanna í íslensku samfélagi.
Jafnréttisþing er haldið annað hvert ár í samræmi við lög nr. 10/2008 um jafnan rétt og jafna stöðu kvenna og karla og er undirbúningur þess í höndum Jafnréttisráðs í samráði við ráðherra jafnréttismála, sem nú er jafnframt forsætisráðherra.
Nánari dagskrá þingsins verður kynnt síðar.
