Sætabrauðsdrengirnir Bergþór Pálsson, Gissur Páll Gissurarson, Hlöðver Sigurðsson og Viðar Gunnarsson ásamt Ísfirðingnum Halldóri Smárasyni, útsetjara og píanóleikara mæta vestur og koma öllum í hátíðaskap. Tónleikarnir verða í Félagsheimilinu í Bolungarvík laugardagskvöld kl. 20:00
Þeir sem hafa verið á tónleikum drengjanna hafa orðið vitni að frábærum flutningi enda hafa þessir söngvarar verið meðal okkar bestu og þekktustu listamanna um árabil. Áheyrendur vita einnig að þótt hátíðleikinn og gæðin séu í fyrirrúmi þá er stutt í grínið og gamanið. Tónlistin er fengin víða að en Halldór Smárason píanóleikari hefur útsett megnið af tónlistinni sem flutt verður af einstöku listfengi. Miðasala við innganginn.
