Orkubú Vestfjarða auglýsir eftir umsóknum um samfélagsstyrki 2016, en úthlutun samfélagsstyrkja er árlegur viðburður hjá fyrirtækinu. Við styrkúthlutun er leitast við að styrkja verkefni vítt og breitt um Vestfirði og miðað við að einstakar styrkveitingar geti verið á bilinu 50.000 til 500.000.- þúsund krónur. Við síðustu úthlutun hlutu hæstu styrkina Björgunarsveitin Blakkur á Patreksfirði sem fékk 300.000.- króna styrk og Björgunarsveitin Tálkni á Tálknafirði sem fékk 200.000. – vegna kaupa á tetrastöðvum.
Í fréttatilkynningu vegna styrkjanna segir að með þeim vilji OV sýna stuðning í verki við þá aðila og félög sem sinna ýmsum samfélagsmálum á Vestfjörðum. Þar geti verið um að ræða ýmiskonar starfsemi eða félagasamtök, s.s. björgunarsveitir, íþrótta- og æskulýðsstarf, menningarstarfsemi og listir eða einhver önnur áhugaverð verkefni sem skipta máli fyrir vestfirskt samfélag.
Verkefnin þurfa að uppfylla þau skilyrði að þau séu til eflingar vestfirsku samfélagi, en að öðru leyti er umsækjendum gefnar nokkuð frjálsar hendur varðandi verkefni. Umsóknum skal skilað rafrænt með því að fylla út rafrænt eyðublað á heimasíðu OV. Umsóknarfrestur er til og með 16. desember.
