Félag eldri borgara á Ísafirði og nágrenni fór í sumarferð sína 12.-13.júní undir nafninu „ Tvo daga í DALI „
Ferðin tókst mjög vel og góður hópur á aldrinum 60+ til 90+. Farið var sem leið liggur um Djúp með molasopa í Reykjanesi og síðan hádegissnarl á Café Riis á Hólmavík sem var mjög vel útilátið.
![](https://www.bb.is/wp-content/uploads/2019/06/feb_1-300x225.jpg)
Í Ólafsdal í Gilsfirði beið okkar Halla Steinólfsdóttir sem sagði sögu staðararins. Í Ólafsdal var fyrsti búnaðarskóli á Íslandi 1880 – 1907 og mjög merkur staður og er þar nýfundinn landnámsskáli frá 9.-10. öld.
![](https://www.bb.is/wp-content/uploads/2019/06/feb_2-300x225.jpg)
Gist var að Laugum í Sælindsdal þar sem fólk naut umhverfisins og skoðaði merkt byggðasafn Dalamanna. Næsta dag var farið í hina fallegu kirkju í Hjarðarholti í Dölum þar sem sóknarpresturinn Anna Eiríksdóttir og Melkorka Benediktsdóttir tóku á móti okkur og röktu sögu þessarrar fallegu kirkju sem tók fimm mánuði að fullgera 1904 og teiknuð var af Rögnvaldi Ólafssyni fyrsta íslenska arkitektinum og var kirkjan fyrsta verkefni hans.
![](https://www.bb.is/wp-content/uploads/2019/06/feb_4-225x300.jpg)
Heimleiðin lá um Fellsströnd þar sem komið var við á nýlegu sveitahóteli að Vogi og síðan lá leiðin um Klofning og heim að Skarði sem er heill kafli að segja frá. Á Skarði hefur sama ættin verið síðan á 11 öld. Þar var okkur sagt frá sögunni af þeim Birni bónda og Ólöfu Ríku og kirkjunni á Skarði með öllum sínum fallegu gripum.
Ferð þessi var mjög ánægjuleg í alla staði og ánægjulegt að fara aðeins út af þjóðveginum sem allt of fáir gera. Veðrið lék við okkur og strax er farið að undirbúa ferð 2020.
Sigrún C. Halldórsdóttir.