Auk þeirra tveggja meistarprófsvarna við Háskólasetur Vestfjarða sem þegar hefur verið sagt frá á bb.is voru tvær aðrar sem fram fóru í vikunni.
Sú fyrri fór fram á miðvikudaginn og fjallaði Erin Kathleen Wilson um endurheimt marhálms í Nova Scotia. Ritgerðin ber titilinn Absence of recovery in an eelgrass (Zostera marina L.) bed in Nova Scotia, Canada: Results from a transplant study.
Marhálmur hefur verið á undanhaldi á austurströnd Kanada frá aldamótum vegna tilkomu bogkrabba þar um slóðir. Sumstaðar hafa marhálmsbreiður náð sér á strik aftur en við víkina Benoit Cove í Nova Scotia hefur endurheimt ekki tekist. Viðfangsefni ransóknar Erin er að komast að því hversvegna endurheimtin við þessa vík hefur ekki tekist. Í rannsókninni er einnig lagt mat á efnahagslegt gildi endurheimtar marhálm við austurströnd Kanada og kortleggja stefnu og stjórnun yfirvalda hvað varðar verndun marhálms. Nánari lýsingu má nálgast í útdrætti á ensku.
Leiðbeinandi verkefnisins var dr. David Garbary, prófessor við St. Francis Xavier háskóla í Kanada. Prófdómari var dr. Halldór Pálmar Halldórsson, forstöðumaður Rannsóknaseturs Háskóla Íslands á Suðurnesjum.
Sú síðari fór fram í gær og bar heitið Loftslagsbreytingar og vatnsgæði í Vaðhafinu.
Ritgerðin ber titilinn Green Infrastructure and Water Quality in the Wadden Sea under Future Changes in Climate.
Sara Pino Cobacho beinir sjónum sínum að áhrifum loftslagsbreytinga á vatnsgæði í Vaðhafinu við strendur Hollands. Ítarlega lýsingu á verkefninu má nálgast í útdrætti á ensku.
Leiðbeinendur verkefnisins eru dr. Ghada El Serafy, sérfræðingur við Deltares vatnarannsóknarstofnunina í Hollandi og dr. Zoi Konstantinou, stefnumótunarráðgjafi við stjórnsvið sjávarútvegsmála hjá framkvæmdarstjórn ESB. Prófdómari er dr. Pamela Woods, fiskifræðingur við Hafrannsóknastofnun – Rannsókna- og ráðgjafastofnun hafs og vatna.
Lokið er meistaraprófvörnum við Háskólasetrið að sinni.
