Indriði á Skjaldfönn hefur leik í vísnaþættinum:
Úr mörgu er að moða hvað vísur varðar og líklega er best að hafa þær sem mest samsinni hafa fengið á flettismettinu og þá í aldursröð.
Flest tilefni seru svo nýskeð að lesendur ættu ekki að þurfa að brjóta heilann mjög mikið.
Ódauðlegt er fjarskafátt.
Fúlt að Dorrit missti Sám.
Klausturs geta apar átt
athvarf sitt í pálmatrjám.
Ólafur Stephensen og Andrés Magnússon málaliðar innflutningsauðvaldsins linna ekki látum í fjölmiðlum til að vegsama gæði og hollustu á innflutningi á hráu kjöti, mjólkurvörum, grænmeti og eggjum.
Andstyggð hef á Óla og Drésa
ei af þolinmæði ríkur.
Innrætið má af þeim lesa
auðvaldsþjófa senditíkur.
Nýjustu Klausturmannavendingar hljóta að koma hér við sögu.
Ástandið á okkar skeri
aumt er það.
Sigmundur á sinni meri
sækir að.
Himinn gerist hroða rokkinn.
Heldur dvínar sumra þokkinn.
Æruvottur alveg sokkinn
í einni sæng nú Klausturblokkin.
Klaustjálkarnir komnir heim.
Kannski má gleðjast ögn með þeim.
Eflaust er best á einum stað
að ávaxta sitt hrossatað.
Áttatíu og tvö prósent launahækkun Landsbankastýrunnar er hrópandi siðblindudæmi.
Bankastjórabandíta er brýnt að reka.
Öll og Bjarna yfirkokkinn
á að setja í gapastokkinn.
Óli í Samskip er kominn heim með eitthvað af sínum fyrirhrunsránsfeng og er auðvitað tekið fagnandi.
Ekki þrotnar þrælslundin á þessu skeri.
Óli í Samskip afturkominn
allir skulu tigna vominn.
Svo slæ ég hér botn í með orðum Drífu Snædal forseta ASÍ, en hún sagði sig úr Vg við síðustu stjórnarmyndun. Sagðist ekki vilja taka þátt í því með Katrínu að éta allt kjörtímatímabilið skítinn úr Sjálfstæðisflokkinn.
Stjórnar nú er voðinn vís.
Þeir vinstri tökum glata.
Etur það sem úti frýs
auminginn hún Kata.
Jón Atli Játvarðsson, Reykhólum hefur heldur ekki látið vísnatilefni fram hjá sé fara.
Um inngöngu hinna brottreknu þingmanna Flokks fólksins í Miðflokkinn yrkir Jón Atli og hefur þennan formála:
Ég veit ekki hvort Inga Sæland nær að sætta sig við að tapa eldiviðnum í kamínuna. Hún veit þó vel núna hvar hún getur kastað eldspýtunum.
Á Klausturbarnum sótti sigra
Sigmundur með höndum tveim.
Rak á fjöru drumba digra,
en dáldill maðkur var í þeim.
Svo voru boðuð mótmæli við Austurvöll :
Ríkisstjórn sem ráðlaus tröllin,
reynir sig við boðaföllin.
Niður treðst hin mjúka mjöllin
ef mætum við á Austurvöllinn.
Þá var sem fyrr tekist á um virkjun Hvalár og umhverfissamtök kynntu nýja skýrslu sem sagði að mest væri upp úr því að hafa að gera ekki neitt.
Jón Atli hafði um það þetta að segja:
Það hefur byggst upp andóf við virkjun rennslisvatns af heiðum Vestfjarða. Hafa jafnvel fossar verið taldir og myndaðir í röðum. Lítið hefur birst af því hins vegar að efnahagslegi þátturinn við uppátækið verður þyrluflug með auðmenn sem geta þá skrifað um rassa þeirra á Twitter, sem ganga örna sinna í víðernunum. Eða þá myndskeið á facebook.
Úfnir læknar örna sinna ganga
í úðanum frá Drynjanda um nótt.
Yfir þrotlaust þyrluflokkar hanga
og þurrka sveitta rassa undur skjótt.
Ekki fleira að sinni.
með góðum kveðjum úr vorblíðunni
Kristinn H. Gunnarsson
