Stuttleg samantekt af því helsta sem gerðist i viku 50 við gerð Dýrafjarðarganga . . . . .
Í vikunni hefur setlag verið að koma niður í göngin. Setlagið er á bilinu 3-5 m þykkt og er þörf á umtalsverður styrkingum til að tryggja öryggi þar inni og halda setlaginu á sýnum stað. Til viðbótar við hinar hefðbundnu styrkingar í göngunum eru nú þegar unnið er í gegnum setlagið settir upp svo kallaðir styrktarbogar á um 3 m fresti og þeir einnig boltaðir kyrfilega og ásprautaðir. Á milli styrktarboganna er síðan sett járnanet, boltar og síðan sprautað með steypu yfir allt saman.
Þrátt fyrir umtalsverðar styrkingar þá lengdust göngin í vikunni sem er að líða um 29,7 m. Lengd ganga Dýrafjarðarmegin er þá orðin 430,2 m sem er um 26,2% af Dýrafjarðarleggnum og á þá eftir að grafa um 1.213,2 m að gegnumbroti. Samanlögð lengd beggja leggja er nú orðin 4.087,8 m sem er um 77,1% af heildarlengd ganga.
Auk gangagraftrar er unnið við fyllingarvinnu í veg í Dýrafirði. Efni úr göngum er keyrt beint í veg í austurendanum en efni úr námu við Ketilseyri keyrt í fyllingar í sjó í vesturendanum og hefur sú vinna gengið ágætlega.
