Verkefnið Blábankinn, samfélagsmiðstöðin á Þingeyri, hlaut á dögunum sérstaka viðurkenningu sem nýsköpun í opinberri stjórnsýslu. Verðlaun og viðurkenningar voru veittar á ráðstefnunni Nýsköpun í opinberri þjónustu og stjórnsýslu 2018 -„Betri opinber þjónusta með öflugu samstarfi og nýtingu stafrænna lausna“ sem haldin var föstudaginn 9. júní 2018.
Í umsögn valnefndar kemur fram að „Blábankinn sé mjög hvetjandi nýsköpunar- og samfélagsverkefni þar sem íbúar höfðu frumkvæði að því að þróa og skipuleggja starfsemina með þjónustuveitendum.
Hér er um að ræða áskorun sem mörg minni samfélög í dreifðari byggðum standa frammi fyrir er varðar minnkandi nærþjónustu, en á sama tíma er þjónustukjarninn hannaður með þeim hætti að reyna að vekja áhuga nýrra aðila að samfélaginu. Verkefnið er tilraunaverkefni um þróun þjónustu og þekkingarkjarna sem vel er hægt að heimfæra á önnur byggðarlög.“
Af 33 tilnefningum hlutu 4 verkefni sérstaka viðurkenningu og var Blábankinn meðal þeirra, en verðlaunin féllu í skaut Akureyrarbæjar. Blábankinn er samvinnuverkefni opinberra- og einkaaðila en Ísafjarðarbær hlaut viðurkenninguna fyrir sitt framlag til verkefnisins.
Arnhildur Lilý Karlsdóttir, ein tveggja starfsmanna Blábankans, og Bragi Arnarsson 4 ára tóku á móti viðurkenningunni fyrir hönd Blábankans.
Sæbjörg
sfg@bb.is
