Sjö þingsæti af átta í Norðvesturkjördæmi eru nokkurn veginn ráðin, ef marka má þingsætaspá Kjarnans sem var birt í dag.
Í stuttu máli er aðferðafræðin Kjarnans sú að fylgi framboða í skoðanakönnunum er talin líklegasta niðurstaða kosninga að viðbættri óvissu sem byggir á sögulegu fráviki kannana frá kosningaúrslitum. Söguleg gögn sýna að fylgni er á milli þess að ofmeta/vanmeta fylgi flokks í einu kjördæmi og að ofmeta/vanmeta fylgi flokksins í öðrum kjördæmum.
Reiknilíkanið hermir 100.000 „sýndarkosningar“ og úthlutar kjördæma- og jöfnunarsætum út frá niðurstöðunum. Líkur frambjóðanda á að ná kjöri er þess vegna hlutfall „sýndarkosninga“ þar sem frambjóðandinn nær kjöri.
Haraldur Benediktsson og Lilja Rafney Magnúsdóttir náðu kjöri í öllum 100.000 sýndarkosningunum. Næst hæstu líkurnar á að ná kjöri fær Bergþór Ólason úr Miðflokki, eða 88 prósent líkur.
Guðjón S. Brjánsson náði kjöri í 87 prósent tilvika og Þórdís Kolbrún Reykfjörð Gylfadóttir er með 84 prósent líkur. Líkurnar á að Bjarni Jónsson nái kjöri eru 83 prósent og 79 prósent líkur á kjöri Ásmundar Einars Daðasonar.
Samkvæmt spá Kjarnans verður Eva Pandora Baldursdóttir áttundi þingmaður Norðvesturkjördæmis og eru 50 prósent líkur á kjöri hennar.
smari@bb.is
