Gefum íslensku séns hefur haldið úti viðburðum í vetur víða um Vestfirði, sem er liður í því að virkja samfélagið til þátttöku í inngildingu íbúa með annað móðurmál en íslensku. Þeir viðburðir sem hafa verið í boði eru hraðstefnumót við íslensku, Þriðja rýmið og leiklestur. Nú er komið að bókaklúbb.
Fyrsta bókin sem tekin verður fyrir er „Hildur“ eftir Satu Rämö. Fyrsti bókaviðburðurinn verður á Ísafirði í Fræðslumiðstöð Vestfjarða á síðasta vetrardegi, miðvikudaginn 23. apríl klukkan 19:30.
Í auglýsingu um viðburðinn segir: „Langar þig að lesa meira á íslensku og ræða spennandi bækur með öðrum? Við byrjum bókaklúbbinn á metsölubókinni ‘Hildur’ eftir Satu Rämö – íslensk glæpasaga með einstöku ísfirsku andrúmslofti. Höfundurinn sjálfur, Satu Rämö, ætlar að koma á bókakynningu nr. tvö sem verður haldin 6. maí nk. klukkan 19:30 á sama stað. Þetta er frábær leið til að dýpka lestrarskilning, kynnast nýjum bókum og mynda tengsl við aðra lesendur.“
Tökur á þáttum sem unnar hafa verið upp úr bókinni „Hildur“ stóð yfir hér á norðanverðum Vestfjörðum í síðasta mánuði og verða þeir sýndir hjá Sjónvarpi Símans í fyllingu tímans. Það er því tími til að setjast niður, lesa og ræða um efni bókarinnar áður en hún verður frumsýnd í sjónvarpinu.
Að lesa góða bók gefur okkur tækifæri til að hugsa og finna, hvernig tungumálið talar til okkar. Mikilvægt að gefa íslenskum texta séns!
Verið öll velkomin – hvort sem þú ert nýbyrjaður að lesa á íslensku eða lifandi bókaormur.
