Föstudagur 14. mars 2025

Brýr á Djúpa­fjörð við Grónes og Gufu­fjörð í útboð

Gróunes, Gróneshyrna og Gufufjörður í bakgrunni, séð til norðvesturs, Mynd: Mats Wibe Lund.

Vegagerðin hefur boðið út byggingu tveggja steyptra brúa á Vestfjarðavegi um Gufudalssveit. Annars vegar er um að ræða 58 m langa brú á Djúpafjörð við Grónes og hins vegar um 130 m langa brú á Gufufjörð. Innifalið í verkinu er rif á núverandi 119 m bráðabirgðabrú á Gufufirði ásamt efnisflutningum úr núverandi vinnuplönum og gerð grjótvarnar/rofvarnar. Verkinu skal að fullu lokið 30. september 2026.

Fram kemur í tilkynni Vegagerðarinnar að um stóran áfanga er að ræða í því markmiði að bæta samgöngur um Vestfirði með því að tryggja áreiðanlegar og öruggar samgöngur um Vestfjarðaveg.

Útboðsgögn eru aðgengileg og verða afhent í rafræna útboðskerfinu TendSign frá og með föstudeginum 14. mars 2025 og skal tilboðum skilað rafrænt í því útboðskerfi fyrir kl. 14:00 þriðjudaginn 29. apríl 2025.

Ekki verða haldnir sérstakir opnunarfundir en eftir lok tilboðsfrests verður bjóðendum tilkynnt um nöfn bjóðenda í útboðinu og verðtilboð. Útboðið er auglýst á Evrópska efnahagssvæðinu.

Helstu magntölur eru:

Vegagerð

  • Bergskeringar í námu                    38.000 m3
  • Fyllingar                                            53.500 m3
  • Grjótvörn/rofvorn                           19.000 m3

Brýr

  • Vegrið                                                        382 m
  • Gröftur                                               17.300 m3
  • Fylling við steypt mannvirki               6.000 m3
  • Bergskering                                              180 m3
  • Mótafletir                                             5.900 m2
  • Steypustyrktarstál                               260 tonn
  • Spennt járnalögn                                   58 tonn
  • Steypa                                                    3.120 m3

Samgöngur á Vest­fjörð­um – opinn íbúa­fundur á Patreks­firði

Vegagerðin, í samstarfi við Vestfjarðastofu, býður til opins íbúafundar í Félagsheimilinu á Patreksfirði þriðjudaginn 18. mars klukkan 17:30. Fulltrúar frá Vegagerðinni munu fjalla um ýmis samgöngumál sem tengjast svæðinu og boðið verður upp á spurningar og umræður.

Í kynningu á fundinum segir að Vegagerðin vilji eiga opið og hreinskilið samtal við íbúa á Vestfjörðum um samgöngumál svæðisins. Markmiðið með fundinum er að veita íbúum upplýsingar um yfirstandandandi og fyrirhugaðar framkvæmdir, fá innsýn í starfsemi Vegagerðarinnar á svæðinu og koma sínum sjónarmiðum á framfæri.

Til að tryggja að sem flestir geti fylgst með verður fundinum einnig streymt á netinu, auk þess sem hægt verður að senda inn spurningar í gegnum Slido.com.

Allir eru velkomnir, og að sjálfsögðu verður heitt á könnunni.

Dagskrá

  • Ávarp – Páll Vilhjálmsson, formaður innviðanefndar Fjórðungssambands Vestfirðinga.
  • Nýframkvæmdir – yfirstandandi framkvæmdir og hvað er fram undan. Sigurþór Guðmundsson, verkefnastjóri á framkvæmdadeild.
  • Jarðgangakostir – farið yfir þá jarðgangakosti sem til greina koma á svæðinu. Guðmundur Valur Guðmundsson, framkvæmdastjóri þróunarsviðs.
  • Staða vegakerfisins – aldur vega og brúa og hvað er til ráða. Pálmi Þór Sævarsson, svæðisstjóri Vestursvæðis.
  • Vetrarþjónusta – hvernig er þjónustunni háttað? Bergþóra Kristinsdóttir, framkvæmdastjóri þjónustusviðs.

Gerður Sveinsdóttir, bæjarstjóri Vesturbyggðar, verður fundarstjóri

Fundinum verður streymt beint í gegnum þessa slóð: https://youtube.com/live/CT28JO3Fu3o?feature=share

Hægt er að senda inn spurningar á Slido með þessum kóða #samgongur

Vikuviðtalið: Guðmundur M. Kristjánsson

Ég heiti Guðmundur M. Kristjánsson, en flestir þekkja mig einfaldlega sem Mugga. Ég hef átt viðburðaríkt líf, bæði á sjó og í landi, og það er óhætt að segja að ég hafi komið víða við. Lengst af var ég hafnarstjóri á Ísafirði, en í dag hef ég loksins meiri tíma til að sinna því sem gleður mig mest eftir að ég fór á eftirlaun– tónlistinni. Ég syng með Karlakórnum Erni þar sem ég er núna nýskipaður formaður, spila á básúnu í Lúðrasveit Ísafjarðar og hitti félaga mína í hljómsveitinni Drumbar vikulega. En leiðin hingað var löng og full af ævintýrum.

Tónlistarhátíð sem spratt af hugmynd í góðu bjórsulli útí London en mér og syni mínum, Erni Elíasi – betur þekktum sem Mugison – datt eitt sinn í hug að halda tónlistarhátíð á Ísafirði, og ákváðum að prófa þetta einu sinni, bara til gamans. Okkur datt ekki í hug að þetta yrði að árlegum viðburði, en hér erum við, tuttugu árum síðar, með Aldrei fór ég suður enn við líði en við báðir höfum komið þessu af okkur til annarra og gott að vita að Ísafjarðarbær hefur núna tekið virkan þátt í að viðhalda þessum viðburði. Frá upphafi lögðum við áherslu á að hátíðin yrði fyrir alla – alvöru rokkhátíð alþýðunnar. Þar fær nýliði á sviði sömu athygli og þekktar hljómsveitir, og það hefur verið lykillinn að þessu öllu saman.

Ég tók við sem hafnarstjóri Ísafjarðarbæjar árið 2002 eftir að hafa búið og unnið í Malasíu í þrjú ár. Ég hafði verið sjómaður frá fimmtán ára aldri, en þótt ég hefði siglt um allan heim var löngunin til að koma heim sterkari en nokkru sinni fyrr. Ísafjarðarhöfn var á þeim tíma að byggja sig upp sem viðkomustað fyrir skemmtiferðaskip, og það var mitt hlutverk að kynna höfnina fyrir erlendum skipafélögum þar sem forveri minn í starfi Hermann Skúlason heitinn ruddi brautina og tók ég við keflinu og hafnarstjórn Ísafjarðarbæjar ákvað að setja meira púður í markaðssóknina sem heldur betur hefur skilað árangri og gaman að sjá hve miklu máli þetta skiptir fyrir samfélagið og styður við allskonar fyrirtæki í bænum. Ísafjarðarhöfn er nú einn helsti áfangastaður skemmtiferðaskipa á Íslandi. Ég átti góðan vin í þessu starfi, Hjalta Þórarinsson. Við kynntumst þegar ég kom aftur heim til Ísafjarðar og hann var hafnarstarfsmaður. Við urðum fljótt óaðskiljanlegir vinir og tókum okkur fyrir hendur að fara um bæinn fyrir jólin og syngja fyrir fyrirtæki. Það var hans hugmynd, og margir í bænum litu á þetta sem upphaf jólanna. Já svona getur nú lífið verið skemmtilegt.

Áður en ég settist við landfestarnar á Ísafirði, átti ég ótal ævintýri víða um heim. Ég var skipstjóri á íslenskum togurum, en tók síðan þátt í þróunarverkefnum í fiskveiðum í Grænhöfðaeyjum við Afríku. Þaðan lá leiðin til Falklandseyja, þar sem ég var svona reddari við nýtt útgerðarverkefni. Það reyndist heldur snúið – þegar reksturinn fór í þrot stóð ég skyndilega frammi fyrir æstum sjómönnum sem höfðu ekki fengið borgað. Ég þurfti lögregluvernd dögum saman til að sleppa óskaddaður frá þessu öllu saman. Ég fór líka til Argentínu og starfaði þar við fiskveiðiráðgjöf. Þar voru peningar ekki vandamál, en þeir sem stóðu að verkefninu virtust hafa hulið tengsl við valdamikla aðila og kannski ekki allt með felldu.

Lífsháskar og hættuleg augnablik Lífið á sjó er aldrei hættulaust. Ég hef legið undir skothríð í Suður-Ameríku, en hættulegasta augnablikið var líklega þegar ég var hársbreidd frá því að vera hálshöggvinn með sveðju í Malasíu. Skipstjórinn, sem var undarlegur maður og tuggði gras sér til friðþægingar, vaknaði við skruðninga og hélt að sjóræningjar væru komnir um borð. Hann tók sveðjuna sína og réðst á mig. Ég rétt náði að forða mér á síðustu sekúndu – sveðjan fór í stýrishúsið í staðinn fyrir hálsinn á mér. Ég hef líka verið einn á báti í óveðri á Biscayaflóa og þurft að treysta á bæði reynslu og heppni til að komast lífs af. Lífið í dag – tónlist, félagsskapur og fjölskylda.

Eftir þessi ævintýri er lífið nú orðið mun rólegra. Við Halldóra Magnúsdóttir konan mín tókum uppá því að byggja hús í fyrra í endanum á Hlíðarvegi á Ísafirði sem er bara mjög vel heppnað og tók ekki langan tíma. Við fluttum inn 5 mánuðum eftir að við byrjuðum.

Ég nýt þess líka að vera með fjölskyldunni við Halldóra eigum saman tíu barnabörn sem veita okkur mikla gleði. Ég hugsa stundum um allt sem ég hef lent í á ferðum mínum, og ég sé ekki eftir neinu. Ævintýrin hafa kennt mér margt, en tónlistin, félagsskapurinn og fjölskyldan eru það sem skipta mestu máli í dag.

Háskólasetur Vestfjarða – Sterk stoð í samfélaginu í 20 ár

Arna Lára Jónsdóttir, alþm.

Háskólasetur Vestfjarða fagnar 20 ára starfsafmæli þann 14. mars. Frá stofnun þess árið 2005 hefur Háskólasetrið skipað sér sess sem öflugt mennta- og rannsóknasetur á landsbyggðinni og leitt til mikilvægra efnahagslegra, samfélagslegra áhrifa á Vestfjörðum. Háskólaseturið hefur sannað sig sem mikilvægur hlekkur í nýsköpun og samfélagslegri þróun á Vestfjörðum.  

Mikilvægi og hlutverk Háskólaseturs

Þegar Háskólasetur Vestfjarða var stofnað var markmiðið skýrt: Að efla háskólamenntun á Vestfjörðum og stuðla að efnahagslegri og samfélagslegri þróun svæðisins. Þetta var stórt skref á þeim tíma, enda höfðu landsbyggðirnar löngum glímt við fólksfækkun og takmarkað aðgengi að háskólanámi. Með því að koma á fót Háskólasetri Vestfjarða var lagður grunnur að menntunartækifærum á svæðinu og aukinni háskólasókn.

Háskólasetrið hefur byggt upp námsleiðir sem höfða til alþjóðlegra nemenda og háskólasamfélagsins almennt. Námsbrautir í haf- og strandsvæðastjórnun og sjávarbyggðafræði hafa laðað til sín nemendur víðs vegar að úr heiminum og gert Ísafjörð að mikilvægum punkti í fræðilegrar umfjöllunar um vistkerfi sjávar, nýtingu náttúruauðlinda og samfélagsþróun á breiðum grunni. Þannig hefur setrið ekki aðeins opnað dyr fyrir Vestfirðinga til háskólanáms heldur einnig gert Ísafjörð og Vestfirði að kjörsvæði fyrir rannsóknir og fræðastarf.

Lyftistöng fyrir atvinnulífið

Efnahagsleg áhrif Háskólaseturs Vestfjarða á svæðinu eru fjölþætt. Háksólasetrið hefur skapað störf fyrir sérfræðinga og kennara og dregið að sér námsmenn og fræðafólk sem leggur sitt af mörkum til samfélagsins. Á sama tíma hefur það skapað ný tækifæri fyrir ferðaþjónustu, húsnæðismarkað og nýsköpun.

Nemendur sem koma til Vestfjarða til náms hafa margir hverjir ákveðið að setjast að á svæðinu eða komið aftur eftir nám. En á hverju ári eru um 80 nemendur búsettir á Vestfjörðum á vegum Háskólaseturs. Þessi þróun hefur styrkt byggð og veitt svæðinu nauðsynlega innspýtingu í formi ungs, menntaðs fólks.

Starfsemi Háaskólasetur Vestfjarða hefur líka leitt af sér mikilvæg störf og þekkingaruppbyggingu. Fjölmörg dæmi eru um ný fyrirtæki sem nemendur hafa byggt upp á svæðinu sem hafa auðgað vestfirskt samfélag. Nemendur og kennarar Háskólasetur hafa líka verið mikilvægir starfsmenn í atvinnulífinu t.a,m. í vaxandi ferðaþjónustu og hjá nýsköpunarfyrirtækjum á borð við Kerecis svo eitthvað sé nefnt.

Rannsóknir á vegum Háskólaseturs hafa leitt til nýrra tækifæra og aukið stuðning við nýsköpun á sviði sjávarútvegs, ferðaþjónustu og sjálfbærrar nýtingar náttúruauðlinda.

Það voru stór tímamót í sögu Háskólaseturs Vestfjarða þegar stúdentagarðarnir í Fjarðarstrætinu voru opnaðar 1. desember 2024 sl. Húsin tvö eru stórglæsileg (nema kannski umdeildu lofttúðurnar) og með 40 íbúðum. Þar með var leyst úr brýnni húsnæðisþörf háskólanema og samhliða losaði líka um á almennum leigumarkaði.

Háskólasetur Vestfjarða – það lengi lifi

Á tuttugu árum hefur Háskólasetrið sannað mikilvægi sitt fyrir Vestfirði og íslenskt fræðasamfélag. Það hefur verið burðarás í menntun, samfélagsuppbyggingu og efnahagsþróun á svæðinu og veitt Vestfirðingum aðgang að menntun sem áður var einungis aðgengileg á höfuðborgarsvæðinu. Áframhaldandi starfsemi og þróun Háskólaseturs er ekki aðeins mikilvæg fyrir háskólamenntun heldur einnig fyrir framtíð byggðar á Vestfjörðum. Með skýrri framtíðarsýn og öflugu samstarfi mun Háskólasetrið áfram vera hornsteinn fræðastarfs, nýsköpunar og samfélagslegrar þróunar í fjórðungnum.

Við Vestfirðingar fögnum þessum merku tímamótum og erum þakklát fyrir það gæfuskref sem tekið var fyrir tuttugu árum með stofnun Háskólasetur Vestfjarða. Horfum bjartsýn til framtíðar og til hamingju með daginn!

Arna Lára Jónsdóttir

Oddviti Samfylkingarinnar í Norðvesturkjördæmi

Strandabyggð: verulegar skerðingar á framlögum úr Jöfnunarsjóði sveitarfélaga

Þorgeir Pálsson sveitarstjóri Strandabyggðar. Mynd: visir.is

Þorgeir Pálsson, sveitarstjóri Strandabyggðar segir aðspurður um afstöðu Strandabyggðar til tillagna um breytta úthlutun framlaga úr Jöfnunarsjóðis veitarfélaga að það sé í sjálfu sér lítið um það að segja, þar sem legið hefur fyrir í nokkurn tíma að regluverkinu yrði breytt, enda sé vel tímabært. 

„Fyrir Strandabyggð felur breytingin í sér verulega skerðingu á framlögum á næstu árum.  En, í þeirri mynd sem breytingarnar voru kynntar fyrir sveitarstjórn nýlega, er skerðingin minni en áætlað var.   Það sem er jákvætt við þessar breytingar er að nýtt regluverk er einfaldara  og þá er það jákvætt að meta allar breytur saman, en ekki sem stakar stærðir og áður var.“

Samkvæmt tillögunum munu framlögin lækka um 51 m.kr. og verða 148 m.kr. en eru 197 m.kr. samkvæmt úthlutun miðað við gildandi reglur.

Snæhagl eða íshagl

Sunnudaginn 13. mars 2022 birtust myndir frá Vestmannaeyjum þar sem að bæjarbúar tóku eftir risa hagli en hver er munurinn á snæhagli og íshagli?

Hagl er yfirleitt flokkað í snæhagl og íshagl, en íshagl er sjaldgæft á Íslandi.  Yfirleitt er hagl á Íslandi einungis 2-5 mm að þvermáli, og nær sjaldan yfir 10 mm.  Erlendis eru dæmi um yfir 10 cm hagl-klumpa sem geta valdið miklu tjóni á mannvirkjum og uppskeru.

Hagl myndast í skúra- og éljaflókum, sem myndast þegar loft verður óstöðugt með því að rakt loft nálægt yfirborði verður á einhvern hátt eðlisléttara en loftið fyrir ofan og það verður lóðrétt hreyfing.  Þegar rakt loft rís, þá lækkar loftþrýstingur og hiti og raki loftsins þéttist og myndar skýjadropa.  Við það léttist loftið enn meira.  Þegar skýjadropar fara hærra í uppstreymi þá frjósa þeir og rifna í ísflísar.  Í uppstreymisvindinum hnoðast snjó- og ísflísar í haglkorn.  Haglkornin stækka og á  endanum verða þau of þung og falla á móti uppstreyminu og ná til jarðar.  Í skúraflókum myndast líka hagl, en munurinn er að það bráðnar áður en það nær til jarðar.

Til að ná mikilli stærð þarf haglið að ferðast upp og niður skýið nokkrum sinnum og þarf þá uppstreymisvindurinn að vera mjög hár.  Í íshagli er unnt að sjá lagskiptingu ís/frauð ef korn eru skorin í sundur, líkt og árhringir í trjám, fyrir hverja ferð upp og niður éljaflókann. Yfirleitt fer íslenskt hagl einungis eina ferð upp og niður.

Sama skýjagerð og myndar hagl, getur einnig framleitt eldingar, en engar eldingar mældust yfir Vestamannaeyjum 13. mars.

Samkvæmt veðursjám fór mjög öflugur éljaflóki yfir Vestmannaeyjar 13. mars 2022.  Flókinn kom úr suðri og fór yfir Vestmannaeyjar og náði fyrir tilviljum mestum styrk á sama tíma.  Styrkur endurkasts ofan við Vestmannaeyjar fór hæst upp í 55 dBZ kl. 17:30 séð frá veðursjá í Keflavík, sem er mjög hátt gildi.

Af vefsíðunni vedur.is

Útboð á flugi til Bíldudals og Gjögurs

Bíldudalsflugvöllur. Bíldudalsvegur er frá flugvellinum og inn Arnarfjörðinn og upp á Dynjandisheiði að Helluskarði.

Vegagerðin hefur auglýst rekstur á áætlunarflugi á Íslandi – sérleyfissamningur, á eftirfarandi flugleiðum:

1. (F1) Reykjavík – Gjögur ‐ Reykjavík
2. (F2) Reykjavík – Bíldudalur ‐ Reykjavík

Samningstími er 3 ár, frá 16. nóvember 2025 til 15. nóvember 2028, með möguleika á framlengingu tvisvar sinnum, eitt ár í senn.

Útboðsgögn eru aðgengileg og verða afhent í rafræna útboðskerfinu TendSign  frá og með fimmtudeginum 27. febrúar 2025 og skal tilboðum skilað rafrænt í því útboðskerfi fyrir kl. 14:00 þriðjudaginn 1. apríl 2025.

Norlandair sem sinnir áætlunarflugi á milli Reykjavíkur og Bíldudals hefur flogið þangað flesta daga vikunnar og til Gjögurs hefur flugfélagið flogið tvisvar í viku.

Haustið 2020 gekk Vegagerðin frá samkomulagi við Norlandair um flug á þessum flugleiðum sem var kært til kær­u­nefnd­ar útboðsmá­la. Eft­ir að kær­u­nefnd útboðsmá­la aflétti stöðvun­ar­kröfu tók Vega­gerðin nýja ákvörðun um val til­boða þann 14. októ­ber, það val var einnig kært. 

Kær­u­nefnd útboðsmá­la aflétti stöðvun og heim­ilaði samn­inga þann 30. októ­ber 2020. 

Að endurheimta gæðasvefn og sofa vel

Sofduvel.is er nýr upplýsinga- og fræðsluvefur átaks til vitundarvakningar um skaðsemi svefnlyfja. Markmiðið er að fræða fólk um virkni og margvíslegar aukaverkanir svefnlyfja, stuðla að skynsamlegri notkun þeirra og leiðbeina fólki hvernig það getur bætt svefn sinn án lyfja. Alma D. Möller heilbrigðisráðherra var meðal gesta þegar vitundarvakningunni var ýtt úr vör og ræddi þar um ýmsar skuggahliðar svefnlyfjanotkunar, ekki síst þegar eldra fólk á í hlut. Hún fagnar vitundarvakningunni og leggur áherslu á að til séu öruggari og betri lausnir við svefnvanda en lyf.

Allar upplýsingar og ráðleggingar eru byggðar á gagnreyndri þekkingu um svefnvandamál og voru þróaðar vegna sambærilegs átaks sem ráðist var í í Kanada og nefnist Sleepwell og hefur verið notað þar með góðum árangri.

Íslenska átakið var þróað af Önnu Birnu Almarsdóttur, prófessor við Kaupmannahafnarháskóla í nánu samstarfi við Landssamband eldri borgara, ásamt fjölda aðila í heilbrigðisþjónustu á Íslandi. 

Í ávarpi sínu sagði Alma með sanni mega segja að svefn sé undirstaða lífsgæða og vandamál tengd svefni sem flestir glími við einhvern tíma á lífsleiðinni geti valdið vanlíðan sem jafnvel heltaki daglegt líf. Margir leiti bót á vandanum með töku svefnlyfja, en það sé hvorki örugg né áhrifarík langtímalausn. Ávinningurinn sé takmarkaður, áhrif svefnlyfjanna séu mest í upphafi en dvíni eftir fjórar vikur. Veruleg hætta sé á að fólk festist í þeim vítahring að telja sig ekki geta án lyfjanna verið og verði háð þeim, því þau eru ávanabindandi Þetta sé alvarlegt, því skaðsemi svefnlyfja er mikil: „Þau auka líkur á byltum og beinbrotum, þau skerða jafnvægi, einbeitingu og minni, og þau geta aukið hættu á heilabilun og lungnabólgu.“

Alma benti einnig á langtímaafleiðingar beinbrota á heilsu eldra fólks og að þess séu fjölmörg dæmi að beinbrot á efri árum marki þáttaskil hjá fólki um getu þess til að búa áfram heima hjá sér í sjálfstæðri búsetu.

Erla Margrét ráðin skipulags- og umhverfisfulltrúi hjá Ísafjarðarbæ

Erla Margrét Gunnarsdóttir hefur verið ráðin sem skipulags- og umhverfisfulltrúi hjá Ísafjarðarbæ og hefur hún störf þann 1. maí næstkomandi.

Erla lauk stúdentsprófi frá Verslunarskóla Íslands 2001. Hún lauk B.Sc. gráðu sem byggingartæknifræðingur frá Háskólanum í Reykjavík 2006 og hlaut löggildingu sem tæknifræðingur sama ár. Þá lauk hún M.Sc. gráðu sem skipulagsfræðingur í Fachhochschule Frankfurt am Main, í Þýskalandi árið 2011.

Erla hefur meðal annars starfað við burðarvirkjahönnun hjá VSÓ ráðgjöf, við verkefnastjórn, sem deildarstjóri hjá BM-Vallá og hjá Rannsóknarstofnun byggingariðnaðarins við rannsóknir á steinsteypudeild. Frá 2023 hefur hún starfað sem kennslustjóri við Lýðskólann á Flateyri.

Innviðafélag Vestfjarða: bregðast verður við hruni í bókunum skemmtiferðaskipa

Tvö skemmtiferðaskip í Ísafjarðarhöfn sumarið 2023. Innviðagjaldið vinnur gegn jákvæðum áhrifum af skipakomunum. Mynd: Kristinn H. Gunnarsson.

Innviðafélag Vestfjarða lýsir yfir miklum áhyggjum vegna fækkunar bókana skemmtiferðaskipa til Ísafjarðar árið 2027. Í tilkynningu frá félaginu segir að ljóst sé að nýtt innviðagjald, sett á með skömmum fyrirvara og án fullnægjandi samráðs, hafi skapað óvissu og leitt til verulegrar fækkunar skipakoma.

Bókanir skemmtiferðaskipa fyrir árið 2027 eru einungis um helmingur þess sem bókað hafði verið fyrir árið 2026 á sama tíma í fyrra.

innviðagjaldið getur unnið gegn innviðauppbyggingu

„Skemmtiferðaskip greiða nú þegar hafnargjöld og önnur gjöld tengd komu sinni á svæðið, og þau gjöld hafa reynst ómetanleg við uppbyggingu á höfnum og öðrum innviðum tengdum þeim. Það er því sorglegt að svokallað innviðagjald hins opinbera muni mögulega leiða til mun minni fjármuna til handa innviðauppbyggingu á Vestfjörðum.“

Þá segir í tilkynningunni:

„Fyrir utan hafnargjöld verja skipverjar fjármunum í höfn, sem styðja við atvinnustarfsemi árið um kring, sem aftur styður við áframhald efnahagsævintýrisins á Vestfjörðum. Atvinnustarfsemi og verðmætasköpun er forsenda skatttekna sem aftur nýtast við uppbyggingu innviða. Neikvæð áhrif gjaldtökunnar eins og hún er í dag koma verst minni byggðum og samfélögum, þar sem jákvæð áhrif skemmtiferðaskipa eru hvað mikilvægust.

Innviðafélagið telur nauðsynlegt að stjórnvöld endurskoði strax þessa skattheimtu og endurhugsi álagningu þeirra á þannig hátt að þau fæli ekki mikilvæga tekjustólpa úr samfélaginu.

Sanngjörn skattheimta og greiðslur til samfélagsins eru algjört skilyrði, en hið opinbera verður að mæta því með fyrirsjáanleika og sanngirni.

Aðgerðir nú munu hafa mikil áhrif á velferð og uppbyggingu Vestfjarða til framtíðar.“

123...2.377Síða 1 af 2.377

Nýjustu fréttir

Bæjarins besta
Allt um Vestfirði og Vestfirðinga Hafið samband: bb(hja)bb.is
Hafa samband: bb@bb.is
© Steig ehf