Lögreglan á Vestfjörðum hefur sent frá sér tilkynningu um aðgerðirnar í Bolungavík í dag.

Fram kemur að sá sem ógn var talin stafa af er ekki staddur á landinu. Aðgerðin var því tilefnislaus.

„Á níunda tímanum í morgun barst lögreglunni á Vestfjörðum tilkynning frá einstaklingi sem taldi sér og börnum sínum ógnað. Fjölskyldan býr í Bolungarvík.

Tilkynnandinn taldi að ákveðinn aðili, búsettur erlendis, væri kominn til Bolungavíkur og vildi vinna fjölskyldunni mein.

Fjórir lögreglumenn fóru þá þegar frá Ísafirði á vettvang og voru viðbúnir því að þurfa að grípa til vopna. Til öryggis var sérsveit ríkislögreglustjóra kölluð til aðstoðar, en hún var flutt með þyrlu Landhelgisgæslunnar vestur.

Öryggi fjölskyldunnar og íbúa í Bolungarvík var tryggt meðan leitað var þess aðila sem tilkynnt var um.

Eftir mikla upplýsingaöflun lögreglunnar í dag er niðurstaðan sú að tilkynnandinn hafi ekki metið aðstæður rétt og sá aðili sem ógnin var talin stafa af ekki á landinu.

Aðgerðum er lokið.“

Ísborg ÍS 250 kemur hér til hafnar á Húsavík í ágústmánuði árið 2010 en hún landaði oft hér úthafsrækju.

Ísborg hét upphaflega Hafþór NK 76 og var einn af tólf austur þýskum, svokölluðum tappatogurum, sem voru smíðuð í Stralsund fyrir Íslendinga.

Hafþór var smíðaður árið 1959 og var gerður út frá Neskaupsstað til ársins 1968 en þá keypti Ríkissjóður Íslands skipið og var hann notaður til hafrannsókna við Ísland.

Árið 1978 var Hafþór seldur til Grundarfjarðar þar sem hann fékk nafnið Haffari SH 275.

Fiskverkun Garðars Magnússonar hf. í Njarðvík keypti bátinn frá Grundarfirði sumarið 1983 hélt hann nafni sínu en varð GK 240.

Haffari GK 240 var seldur Álftfirðingi hf. á Súðavík árið 1986 og varð þá Haffari ÍS 430.

Frá miðju ári 1997 og fram til aldamóta bar báturinn nöfnin Haffari SF 430, Erlingur GK 212 og Vatneyrin BA 238.

Það var svo haustið 2000 sem báturinn fékk nafnið Ísborg ÍS 250 sem hann bar all til loka en hann fór í brotajárn sumarið 2019.

Af skipamyndir.com

Jón Páll Hreinsson, bæjarstjóri í Bolungavík segist hafa orðið var við aðgerðir sérsveitarinnar og aðspurður sagðist hann vilja hrósa lögreglunni fyrir viðbrögð hennar og nærgætni gagnvart bæjarbúum.

Viðbrögð lögreglunnar beindust að heimili í bænum auk leikskóla og grunnskóla bæjarins og skólayfirvöld sendu út pósta á forseldra barna til upplýsingar.

Jón Páll segir að ekki hafi verið hætta á ferðum og að lögreglan hefði fulla stjórn á aðstæðum.

Föstudaginn 21. mars frá 15:30-18:30 er stefnt að því að halda Vestfjarðamót í skólaskák í Grunnskólanum á Ísafirði.

Nemendur úr öllum vestfirskum grunnskólum hafa þátttökurétt. Keppt verður í eftirfarandi flokkum:

1.-4. bekkur

5.-7. bekkur

8.-10. bekkur

Sigurvegarar í hverjum flokki vinna sér inn keppnisrétt á Landsmótinu í skólaskák, sem verður að þessu sinni haldið á Ísafirði helgina 3.-4. maí.

Áhugasamir skólar/keppendur/forráðamenn vinsamlegast skráið þátttakendur með því að senda tölvupóst á Halldór Pálma Bjarkason, 822-7307,  halldorpb@gmail.com

Lögreglan var með sérsveitaraðgerð í Bolungavík fyrr í dag. Haft var samband við lögregluembættið á Vestfjörðum en þaðan fengust aðeins þau svör að ekkert yrði sagt um málið að svo stöddu.

Eftir því sem næst verður komist er aðgerðinni lokið og ekkert hættuástand.

Vesturbyggð hefur gert samstarfs­samn­inga við tvær tónlist­ar­há­tíðir, annars vegar við Alþjóð­legu píanó­hátíð Vest­fjarða og hins vegar við blús­há­tíðina Blús milli fjalls og fjöru um tónlistarhátíðir í ágúst á komandi sumri.

Alþjóðlega píanóhátíð Vestfjarða, eða International Westfjords Piano Festival, var stofnuð af píanóleikaranum Andrew J. Yang árið 2022 og býður bæjarbúum upp á klassíska píanótónleika á heimsklassa ár hvert, auk þess sem mikil áhersla er lögð á námskeiðahald og kennslu. Hún verður haldin í fjórða skipti dagana 6.-13. ágúst næstkomandi. Hún hlaut hvatningarverðlaun Eyrarrósarinnar árið 2023 en hún er „veitt verkefnum sem eru 3 ára eða yngri sem hafa listrænan og samfélagslegan slagkraft og hafa alla burði til að festa sig varanlega í sessi.“ Samstarfssamningurinn felur í sér árlegan styrk fyrir framkvæmd píanóhátíðarinnar og ákvæði um framboð á kennslustundum fyrir íbúa með að minnsta kosti grunnþekkingu í píanóleik.

Tónlistarhátíðin Blús milli fjalls og fjöru hefur fyrir löngu fest sig í sessi í menningarlandslagi Vestfjarða. Þar koma fram fremstu listamenn landsins á sviði blústónlistar en einnig á öðrum sviðum, svo sem rokktónlistar. Sigurjón Páll Hauksson hefur staðið að hátíðinni með glæsibrag árum saman og hún hefur verið vel sótt bæði af heimafólki jafnt sem öðrum gestum. Samstarfssamningurinn tekur til niðurfellingar á leigu félagsheimilis Patreksfjarðar yfir hátíðarhelgina og tryggir forgang hátíðarinnar að félagsheimilinu þá helgi ár hvert. Hátíðin verður haldin í 14. skipti síðustu helgina í ágúst næstkomandi, nánari upplýsingar um dagskrá og miðasölu verða birtar þegar nær dregur.

Heimastjórn fyrrum Rauðasandshrepps og Barðastrandarhrepps hélt fund með íbúum á Barðaströnd í byrjun mánaðarins.

Tímasetning moksturs á Kleifaheiði var rædd á fundinum en skólabörn á Barðaströnd sækja skóla til Patreksfjarðar og fara yfir Kleifaheiði tvisvar á dag. Fundarmenn telja að tryggja þurfi að heiðin sé fær þegar skólabíllinn er á ferðinni um áttaleytið að morgni. Í fundargerð segir: „Samkvæmt því sem fram kom liggur það fyrir í síðasta lagi klukkan 6:30 hvort kalla þurfi út bíl og heiðin á, skv. áætlunum, að vera
opin frá klukkan 8 árdegis til 20:00. Fram kom að snjómoksturstækin væru á Patreksfirði en mokstursmenn á Tálknafirði og allur gangur væri á því hvort búið væri að moka leiðina þar á milli á tilhlýðilegum tíma svo tryggja megi aðgengi skólabílsins á réttum tíma.
Fram kom að jafnvel þó heiðin væri mokuð þá væri stundum óvissustig á Raknadalshlíð og því í raun ófært fyrir skólabörnin.“

börnum ekki ekið frá Bíldudal til Tálknafjarðar

Þá var rætt á fundinum um skólahald annars staðar í sveitarfélaginu og borið saman við stöðuna á Barðaströnd. Í fundargerðinni stendur:

„Umræða fór fram um byggingu nýs skóla á Bíldudal og aðstöðumun barna í þéttbýli annars vegar og dreifbýli hins vegar innan sveitarfélagsins. Enginn viðstaddra vissi til þess að umræða um það að aka bíldælskum börnum til skyldunáms í Tálknafirði hefði farið fram. Það er mun styttri leið en börn á Barðaströnd þurfa að leggja á sig dag hvern. Á leik- og grunnskólaaldri eru nú 16 börn á Barðaströnd en verða brátt 17.
Í máli viðstaddra kom fram að rök sveitarfélagsins væru helst þau að ekki væri hægt að halda uppi faglegu skólastarfi á Barðaströnd og í seinni tíð, að mygla sé í skólahúsnæðinu auk þess sem áhyggjur af félagsþroska barna í fámennum skólum hafi verið viðraðar.“

Á 20 ára afmælishátíð Háskólaseturs Vestfjarða, síðasta föstudag barst setrinu vegleg gjöf frá hjónunum Þorsteini Jóhannessyni og Margréti Hreinsdóttur. Gáfu þau Háskólasetrinu kennslutæki sem mun nýtast sérstaklega við við fjarfundi og kennslu. Tækið er geysiöflugt og er mikill fengur að því fyrir starfsemi setursins.

Þorsteinn var um árabil forystumaður í bæjarmálum á Ísafirði og tók þátt í stofnun háskólasetursins og starfi þess fyrstu árin.

Samtök ferðaþjónustunnar og Hvalaskoðunarsamtök Íslands hafa ritað bréf til atvinnuvegaráðherra og farið fram á að Ísafjarðardjúp verði skilgreint sem griðasvæði hvala og að ráðherrann setji reglugerð um það.

Í bréfinu kemur fram að tilefnið er að veitt hefur verið leyfi til fimm ára til hrefnuveiða og að hrefnuveiðimenn hafi lýst því yfir að veiðarnar muni fara fram í og við Ísafjarðardjúp. Aðeins sáust tvær hrefnu í Djúpinu við rannsóknir á síðasta ári sem fram fóru frá júní til september.

Vísað er til þess að ferðaþjónusta hafi verið að byggjast upp við Ísafjarðardjúp, þar á meðal hvalaskoðun.

Þá segir í bréfinu að árið 2017 hafi bannsvæði við hvalveiðum í Faxaflóa verið stækkað að ósk hvalaskoðunarsamtaka.

Undir bréfið rita Jóhannes Þór Skúlason og Sigursteinn Másson.

Bæjarins besta innti Jóhannes eftir því hvað liggi fyrir um möguleg áhrif af hrefnuveiðum á ferðaþjónustu sem gefur tilefni til þess að samtökin fara fram á þetta bann. Ekki barst svar við því en í svarinu segir að við Ísafjarðardjúp hafi verið „að byggjast upp fjölbreytt ferðaþjónusta undanfarin ár, meðal annars í siglingum með ferðamenn og skipulagðri hvalaskoðun. Það er mat samtakanna að mikilvægt sé fyrir áframhaldandi uppbyggingu þeirrar atvinnustarfsemi að Ísafjarðardjúp verði skilgreint sem griðasvæði hvala, þannig að hvalveiðar og hvalaskoðun fari ekki fram hlið við hlið.“

Bæjarráð Ísafjarðarbæjar áréttar þá afstöðu sína að það ekki fylgjandi auknu vægi strandveiða, hvorki á gildistíma nýrrar reglugerðar né með nýjum lögum sem boðuð hafa verið.

Þetta er gert i tilefni af því að atvinnuvegaráðherra hefur kynnt í samráðsgátt stjórnvalda drög að reglugerð um breytingar á strandveiðum. Bæjarráðið segir í bókun að það fái ekki séð af texta reglugerðarinnar hvernig henni er ætlað að ná fram þeim markmiðum sem lagt er upp með, að tryggja 48 daga strandveiðar, þar sem ekki er gert ráð fyrir auknum kvóta til að mæta því markmiði. 

En hins vegar séu settar nýjar takmarkanir sem væntanlega er ætlað að þrengja nægjanlega að strandveiðum til að ná bæði 48 daga markmiðinu og halda veiðunum innan núverandi ramma.

kvótakerfið hefur sannað sig

þá segir í bókun bæjarráðs:

„Bæjarráð telur að þrátt fyrir ýmsa galla hafi fiskveiðistjórnunarkerfið sannað gildi sitt. Fyrir utan almenna kerfið eru að minnsta kosti tvö byggðakvótakerfi, hið almenna og sértæka. Þessi kerfi, einkum hinn svokallaði Byggðastofnunarkvóti, hafa haft veruleg jákvæð áhrif á útgerðir og vinnslur á Vestfjörðum. Sem slík hafa kerfin stuðlað að stöðugri atvinnu árið um kring og þar með fjölbreyttu lífi í sjávarbyggðum, ekki bara á höfnum og fiskvinnslum, heldur í skólum og félagsheimilum. Strandveiðikerfið, sem einungis er virkt yfir sumartímann, nær þessu ekki fram.

Ánægjulegt er að takmarkanir séu settar á eignarhald á bátum. Ekki eru þó gerðar neinar kröfur um launahlutfall. Er það nefnt hér þar sem greiningar hafa sýnt að launahlutfall er verulega lægra í strandveiðum en í öðrum veiðum, þrátt fyrir að telja mætti að mannaflsfrekar veiðar krefðust þess. Sveitarfélög hafa sínar tekjur af útsvari, og lægri laun hafa því áhrif á tekjur sveitarfélaga. Þetta verður enn skýrara ef sjómenn búa ekki árið um kring í sveitarfélaginu og hafa ekki lögheimili þar.

Samandregið er Ísafjarðarbær fylgjandi því að breyta strandveiðum í þá átt að meira af afleiddum áhrifum verði eftir í sjávarbyggðunum, en misbrestur hefur verið á því.“