Það er sannlega vöxtur í starfi Gefum íslensku séns – íslenskuvænt samfélag. Fólk hefir ef til vill eigi farið varhluta af þeirri staðreynd að viðburðum á vegum verkefnisins hefir fjölgað til muna. Bjóða nú fleiri staðir á Vestfjörðum reglulega upp á viðburði þar sem unnið er samkvæmt hugmyndafræði verkefnisins. Reglulega eru haldnir viðburðir í Bolungarvík, á Flateyri og Ísafirði. Svo voru Patreksfjörður og Þingeyri að bætast í hópinn. Gott mál. Auk þess hefir einnig verið unnið samkvæmt hugmyndafræðinni á Akureyri hjá Símey. Við bindum og vonir við að fleiri staðir bætist í hópinn á þessu ári.
Við megum því til með að vekja athygli á vetrardagskrá verkefnisins sem komin er á veraldarvefinn. Þessi hlekkur leiðir ykkur þangað. Ekki er loku fyrir það skotið að fleiri staðir og viðburðir bætist í hópinn. Það er von vor fróm. Tékkið endilega á hraðíslensku sem er núna á laugardaginn 1.2.
Því kristaltært er að ekki hefir gengið sem skyldi að bjóða fólk (innflytjendur) velkomið í íslenskt (mál)samfélag. Tölulegar staðreyndir benda sterklega til þess. Og án kunnáttu í málinu er ljóst að fólk mun ávallt standa fyrir utan málsamfélagið, fyrir utan íslenskt samfélag. Það er þyngra en tárum tekur. Gefum íslensku séns telur það þar af leiðandi einstaklega brýnt samfélagslegt verkefni að búa til aðstæður þar sem fólk (innflytjendur) fær tækifæri til að æfa sig í notkun málsins, fær hvata (og smá pressu) til að nota það og þeir sem hafa málið að móðurmáli hjálpi þar til.
Tungumál lærist nefnilega seint og illa (oft alls ekki eins og mörg dæmi sýna fram á og við þekkjum) sé það ekki notað, sé því ekki haldið að fólki. Það er alls ekki hægt að kvarta undan íslenskuleysi í samfélaginu geri samfélagið ekkert til að veita fólki liðsinni við máltileinkunina ef samfélagið fer ekki fram á íslensku (án alls gæsagangs og uppréttra handa á ská). Þar af leiðandi hvetjum við allt áhugafólk um íslensku, íslenskt málsamfélag, íslenskt samfélag til að tékka á viðburðum verkefnisins og láta sjá sig. Eins oft og efni standa til. Best væri þá auðvitað að bjóða einhverjum með sér sem vill eða þarf að læra íslensku, sem vill komast inn í íslenskt málsamfélag sem vill fá fleiri tækifæri í samfélaginu. Við vitum öll að lykillinn að íslensku samfélagi er tungumálið og því ótækt að stór hluti þess fólks sem á Fróni býr kunni ekki góð skil á því. Það er kominn tími til að bjóða innflytjendur hjartanlega velkomna í (mál)samfélagið og leyfa allra handa íslensku að heyrast og njóta sín.
Vilt þú ekki leggja þitt lóð á vogarskálina? Málið er jú í okkar höndum ellegar tröntum. Við berum ábyrgðina.
Með íslenskuvænum kveðjum.
Ólafur Guðsteinn Kristjánsson
Tékkið líka á Gefum íslensku séns á Facebook
