Fiskvinnslan Íslandssaga og hausaþurrkunarfyrirtækið Klofningur á Suðureyri hlutu hvatningarverðlaun skóla-, íþrótta- og tómstundanefndar Ísafjarðarbæjar fyrir framúrskarandi skólaumhverfi 2024.
Fyrirtækin hafa boðið grunnskólanemendum í heimsókn í yfir 20 ár, til að kynna þá fyrir fiskvinnslu og sjávarútvegi. Á hverju vori bjóða fyrirtækin nemendum í 1. bekk í Grunnskólanum á Ísafirði í sérstaka heimsókn auk þess að bjóða nemendum í Grunnskólanum á Suðureyri reglulega í heimsókn. Í heimsóknunum er fiskvinnslan skoðuð og nemendur sjá hvernig fisknum er breytt í verðmæta útflutningsvöru. Allir nemendur eru svo sendir heim með fisk í soðið sem þeir borða með bestu lyst. Oft tala nemendur um að þetta sé besti fiskur í heimi. Mikil tilhlökkun er meðal nemenda, kennara og jafnvel foreldra fyrir þessari heimsókn og í Íslandssögu og Klofningi kallast hún vorboðinn ljúfi.
Óðinn Gestsson, framkvæmdastjóri Íslandssögu, og Einar Ómarsson hjá Klofningi tóku við verðlaununum þann 14. janúar, frá Nanný Örnu Guðmundsdóttur, formanni skóla-, íþrótta- og tómstundanefndar. Einnig voru viðstaddar þær Hafdís Gunnarsdóttir, sviðsstjóri skóla- og tómstundasviðs, og Guðrún Birgisdóttir, skóla- og sérkennslufulltrúi.
Alls bárust sex tilnefningar til verðlaunanna en þetta er í fjórða sinn sem þau eru veitt. Árið 2023 féllu verðlaunin í skaut Guðlaugar Jónsdóttur, Diddu, fyrir heimilisfræðival við Grunnskólann á Ísafirði. Árið 2022 hlaut Grunnskóli Önundarfjarðar verðlaunin fyrir verkefnið Samstarf leik og grunnskóla – brú milli skólastiga og Grunnskólinn á Ísafirði fyrir verkefnið Útistærðfræði á unglingastigi. Árið 2021 féllu verðlaunin í skaut Tanga vegna öflugs útináms sem þar er boðið upp á.
